అమెరికా ట్రెజరీపై చైనా హ్యాకర్లు సైబర్ దాడి.. డ్రాగన్ చేతికి కీలక రహస్యాలు

చైనా అధికారిక హ్యాకర్లు తమ ట్రెజరీ డిపార్ట్‌మెంట్‌పై సైబర్ దాడికి పాల్పడినట్టు అగ్రరాజ్యం అమెరికా సంచలన ఆరోపణలు చేసింది. వర్క్‌స్టేషన్లలో కీలకమైన పత్రాలను తస్కరించేందుకు చైనా ప్రయత్నించినట్లు ఆరోపించింది. ఈ మేరకు కాంగ్రెస్‌కు రాసిన లేఖలో ఈ విషయాలను వెల్లడించినట్లు ప్రముఖ అంతర్జాతీయ మీడియా సీఎన్ఎన్ నివేదించింది. థర్డ్‌ పార్టీ సైబర్‌ సెక్యూరిటీ సర్వీస్‌ ప్రొవైడర్‌ బియాండ్‌ ట్రస్ట్‌ నెట్‌వర్క్‌ లోపాలను తన అనుకూలంగా చేసుకుని డిసెంబరు మొదటి వారంలో చైనాకు చెందిన అడ్వాన్సడ్ పెర్సిస్టెంట్ థ్రెట్ (ఏపీటీ) హ్యాకర్లు దాడి చేసినట్టు తెలిపింది.

వర్క్‌స్టేషన్లు, కీలకమైన పత్రాలను యాక్సెస్ చేయగలిగారని పేర్కొంది. డిసెంబర్‌ 8న బియాండ్‌ ట్రస్ట్‌ అప్రమత్తమై ఈ విషయాన్ని తమ దృష్టికి తీసుకొచ్చిందని ట్రెజరీ విభాగం అసిస్టెంట్ సెక్రెటరీ (మేనేజ్‌మెంట్) అదితి హర్దికర్ తెలిపారు. దీంతో సైబర్‌ సెక్యూరిటీ అండ్‌ ఇన్‌ఫ్రాస్ట్రక్చర్‌ సెక్యూరిటీ ఏజెన్సీ, ఎఫ్‌బీఐ‌లకు సమాచారం ఇచ్చినట్టు ఆయన వెల్లడించారు. ఇది భారీ సైబర్‌ దాడి అని వ్యాఖ్యానించారు. ట్రెజరీ ప్రతినిధి సీఎన్ఎన్‌తో మాట్లాడుతూ.. సైబర్ దాడిలో అప్రమత్తమై ట్రెజరీ సేవలను ఆఫ్‌లైన్‌లోకి మార్పు చేసి.. దర్యాప్తు సంస్థ సమన్వయంతో చర్యలు తీసుకుంటున్నామని చెప్పారు. హ్యాకర్లు ట్రెజరీ వ్యవస్థ లేదా సమాచారాన్ని తస్కరించిన ఆధారాలు లేవని అన్నారు.

దీనిపై ఎఫ్‌బీఐ అధికారులు ఇంకా స్పందించలేదు. మరోవైపు, అమెరికాలోని చైనా రాయబార కార్యాలయం ఈ ఆరోపణలను తోసిపుచ్చింది. తమపై అమెరికా చేస్తోన్న నిరాధారమైన ఆరోపణలను గట్టిగా ఖండిస్తున్నామని ప్రకటించింది. ఇదిలా ఉండగా, జార్జియాలోని బియాండ్‌ ట్రస్ట్‌ సైతం ఈ సైబర్‌ దాడిపై స్పందించకపోవడం గమనార్హం. ట్రెజరీ విభాగం రాసిన లేఖలో మాత్రం, ట్రెజరీ డిపార్ట్‌మెంట్ క్లౌడ్ ఆధారిత సేవల కోసం వినియోగించే టెక్నాలజీని హ్యాకర్లు యాక్సెస్ చేసినట్టు పేర్కొంది. ఆ సంస్థ అధికారిక వెబ్‌సైట్‌లో ఇటీవల తమ కస్టమర్ల భద్రత ముప్పునకు సంబంధించిన ఘటనలు గుర్తించినట్లు పేర్కొంది. దీనిపై దర్యాప్తు జరుగుతున్నట్లు స్పష్టం చేసింది.

‘బియాండ్‌ ట్రస్ట్‌ పేర్కొన్న భద్రతా ముప్పు అంశం ట్రెజరీ నివేదించిన హ్యాకింగ్‌ ఘటనకు దగ్గరగా ఉన్నట్లు గుర్తించాం.. అయినప్పటికీ దీనిపై దర్యాప్తు జరగాల్సి ఉంటుంది ’ అని సైబర్‌ సెక్యూరిటీ సంస్థ అధికారి పేర్కొన్నారు. అయితే, సైబర్ దాడిపై విశ్లేషణకు వచ్చే వారం వైట్‌హౌస్ ఫైనాన్షియల్ సర్వీసెస్ కమిటీ‌ కీలక సమావేశం నిర్వహించే అవకాశం ఉంది. కానీ, కచ్చితమైన సమయం ఇంకా నిర్ణయించలేదని ఆ కమిటీలోని సీనియర్ అధికారి వివరించారు. సైబర్ దాడి వల్ల జరిగిన నష్టం గురించి ఇంకా ఎటువంటి సమాచారం రాలేదు.