కేజ్రీవాల్‌పై పోటీగా మాజీ ఎంపీ.. ఢిల్లీ అసెంబ్లీ ఎన్నికల్లో బీజేపీ తొలి జాబితా

 ఢిల్లీ అసెంబ్లీ ఎన్నికల షెడ్యూల్ విడుదల కాకముందే అధికార ఆమ్ ఆద్మీ పార్టీ.. ప్రతిపక్ష బీజేపీ ఎన్నికల ప్రచారాన్ని చేస్తూనే ఉన్నాయి. ఇక ఇప్పటికే మొత్తం ఢిల్లీ అసెంబ్లీ ఎన్నికల్లో పోటీ చేసే అభ్యర్థుల జాబితాను ఆప్ ప్రకటించగా.. తాజాగా బీజేపీ తొలి జాబితాను విడుదల చేసింది. త్వరలోనే జరగనున్న ఢిల్లీ అసెంబ్లీ ఎన్నికల్లో ఆప్‌ కన్వీనర్, ఢిల్లీ మాజీ సీఎం అరవింద్ కేజ్రీవాల్‌కు పోటీగా బీజేపీ.. మాజీ ఎంపీ పర్వేష్ వర్మను పేరును ప్రకటించింది. ఈ మేరకు అభ్యర్థుల తొలి జాబితాను శనివారం విడుదల చేసింది. అయితే కేంద్ర ఎన్నికల సంఘం ఇంకా షెడ్యూల్‌ ప్రకటించనప్పటికీ.. ఢిల్లీలో మాత్రం రాజకీయాలు హాట్ హాట్‌గా సాగుతున్నాయి.

తొలి జాబితాలో 29 మందికి బీజేపీ అవకాశం కల్పించింది. అరవింద్ కేజ్రీవాల్ పోటీ చేస్తున్న న్యూఢిల్లీ అసెంబ్లీ నియోజకవర్గం నుంచి మాజీ ఎంపీ పర్వేష్ వర్మ పేరును ఖరారు చేసింది. ఇప్పటికే ఈ నియోజకవర్గం నుంచి కాంగ్రెస్‌ పార్టీ నుంచి మాజీ సీఎం షీలా దీక్షిత్‌ కుమారుడు సందీప్‌ దీక్షిత్‌ పోటీ చేస్తున్నారు. దీంతో ఈ సారి ఎన్నికల్లో న్యూఢిల్లీ నియోజకవర్గంలో త్రిముఖ పోరు తీవ్ర ఆసక్తికరంగా మారింది.

ఢిల్లీ మాజీ ముఖ్యమంత్రి సాహిబ్‌ సింగ్ వర్మ కుమారుడే ఈ పర్వేష్ వర్మ. 2014 నుంచి 2024 వరకు పశ్చిమ ఢిల్లీ నుంచి లోక్‌సభ ఎంపీగా కొనసాగారు. 2019లో జరిగిన ఎన్నికల్లో పర్వేష్ వర్మ రికార్డు స్థాయిలో 5.78 లక్షల ఓట్ల మెజార్టీతో విజయం సాధించారు. ఢిల్లీ రాష్ట్ర చరిత్రలోనే ఓ లోక్‌సభ ఎంపీ సాధించిన అత్యధిక మెజార్టీ అదే కావడం గమనార్హం.

ఇక ఢిల్లీ ముఖ్యమంత్రి ఆతిశీకి పోటీగా కల్కాజీ నియోజకవర్గం నుంచి మరో మాజీ ఎంపీ రమేష్ బిధూరిని బరిలోకి దించింది. ఇటీవలే ఆమ్‌ ఆద్మీ పార్టీ నుంచి బీజేపీలో చేరిన మాజీ మంత్రి కైలాష్ గహ్లోత్‌కు ఈ తొలి జాబితాలో టికెట్‌ దక్కింది. బిజ్వాసన్‌ నియోజకవర్గం నుంచి కైలాష్ గహ్లోత్ పోటీ చేయనున్నట్లు బీజేపీ ప్రకటించింది. ఢిల్లీ కాంగ్రెస్‌ పార్టీ మాజీ చీఫ్‌ అరవింద్‌ సింగ్లీ లవ్లీ కూడా గతేడాది బీజేపీలో చేరగా.. తాజా మొదటి జాబితాలో గాంధీనగర్‌ స్థానం నుంచి అవకాశం దక్కింది. ఢిల్లీలో 70 అసెంబ్లీ స్థానాలు ఉండగా.. ప్రస్తుత ఢిల్లీ అసెంబ్లీ గడువు ఈ ఏడాది ఫిబ్రవరితో ముగియనుంది.