బీజేపీ మాజీ ఎంపీ వివాదాస్పద వ్యాఖ్యలకు ఢిల్లీ సీఎం అతిశీ కన్నీళ్లు.. నిన్న ప్రియాంక గాంధీపైనా

మరికొన్ని రోజుల్లో ఢిల్లీ అసెంబ్లీ ఎన్నికలు జరగనున్న నేపథ్యంలో అధికార ఆమ్ ఆద్మీ పార్టీ, ప్రతిపక్ష బీజేపీ మధ్య తీవ్ర మాటల యుద్ధం చోటు చేసుకుంటోంది. దీంతో ఢిల్లీ రాజకీయాలు హాట్ హాట్‌గా సాగుతున్నాయి. ఈ క్రమంలోనే కొందరు నేతలు వ్యక్తిగతంగా వ్యాఖ్యలు చేయడం తీవ్ర దుమారానికి కారణం అవుతోంది. తాజాగా ఢిల్లీ అసెంబ్లీ ఎన్నికల్లో ఎమ్మెల్యే అభ్యర్థిగా పోటీ చేస్తున్న బీజేపీ మాజీ ఎంపీ రమేష్ బిధూరి.. ఆప్ నేత, ఢిల్లీ ముఖ్యమంత్రి అతిశీపై చేసిన వ్యాఖ్యలు తీవ్ర సంచలనంగా మారాయి. అతిశీ ఇంటిపేరును ఉద్దేశించి రమేష్ బిధూరి చేసిన వ్యాఖ్యలపై.. ఆమె తీవ్ర స్థాయిలో మండిపడ్డారు. ఈ క్రమంలోనే మీడియా సమావేశంలోనే సీఎం అతిశీ కన్నీళ్లు పెట్టుకున్నారు. ఇక ఇప్పటికే కాంగ్రెస్ పార్టీ అగ్రనేత, ఎంపీ ప్రియాంక గాంధీ వాద్రాను ఉద్దేశించి రమేష్ బిధూరి చేసిన వ్యాఖ్యలు తీవ్ర దుమారం రేపుతుండగా.. ఆయనకు వ్యతిరేకంగా కాంగ్రెస్ నేతలు దేశవ్యాప్తంగా నిరసనలు వ్యక్తం చేస్తున్నారు.

ఢిల్లీ అసెంబ్లీ ఎన్నికల్లో.. ఢిల్లీ సీఎం అతిశీ కల్కాజీ నియోజకవర్గం నుంచి పోటీ చేస్తున్నారు. అయితే బీజేపీ తరఫున అదే నియోజకవర్గంలో రమేష్ బిధూరీ కూడా పోటీ చేస్తున్నారు. అయితే తాజాగా అతిశీపై విమర్శలు గుప్పించిన రమేష్ బిధూరీ.. ఆమె తన తండ్రినే మార్చేశారని తీవ్ర వివాదాస్పద వ్యాఖ్యలకు తెరతీశారు. గతంలో అతిశీకి ఒక ఇంటి పేరు ఉండగా.. ప్రస్తుతం మరో పేరును పెట్టుకున్నారని మండిపడ్డారు. అంతేకాకుండా ఉగ్రవాద కార్యకలాపాలకు పాల్పడ్డ అఫ్జల్‌ గురుకు క్షమాభిక్ష ప్రసాదించాలంటూ అతిశీ తల్లిదండ్రులు పిటిషన్‌ దాఖలు చేశారంటూ రమేష్ బిధూరీ తీవ్ర ఆరోపణలు చేశారు.

అయితే తనపై, తన కుటుంబంపై రమేష్ బిధూరీ చేసిన వ్యాఖ్యలపై తాజాగా నిర్వహించిన మీడియా సమావేశంలో స్పందించిన అతిశీ తీవ్ర స్థాయిలో మండిపడ్డారు. తన తండ్రి ఒక ఉపాధ్యాయుడు అని.. ప్రస్తుతం ఆయన ఒకరి సహాయం లేనిదే నడవలేని పరిస్థితిలో ఉన్నారని చెప్పారు. ఎన్నికల్లో ఢిల్లీ ప్రజల ఓట్ల కోసం ఇంత నీచానికి దిగజారుతారా అంటూ తీవ్రంగా మండిపడ్డారు. ఒక వృద్ధుడిపై ఇలాంటి వ్యాఖ్యలు చేయడం ఆమోదయోగ్యం కాదని.. దేశంలో రాజకీయాలు దిగజారిపోతున్నాయంటే నమ్మలేకపోతున్నానంటూ అతిశీ తీవ్ర భావోద్వేగానికి గురయ్యారు. ఈ క్రమంలోనే ఆమె ప్రెస్‌మీట్‌లోనే కన్నీటిపర్యంతం అయ్యారు.

ఇక అతిశీపై రమేష్ బిధూరీ చేసిన వ్యాఖ్యలపై ఢిల్లీ మాజీ సీఎం, ఆప్ కన్వీనర్ అరవింద్ కేజ్రీవాల్ తీవ్ర స్థాయిలో ధ్వజమెత్తారు. ఒక మహిళా సీఎం పట్ల ఇలాంటి ప్రవర్తనను ఢిల్లీ ప్రజలు ఏ మాత్రం సహించరని తెలిపారు. ఈ అసెంబ్లీ ఎన్నికల్లో ఆయనకు కచ్చితంగా బుద్ధి చెబుతారని అన్నారు. మరోవైపు.. ఢిల్లీ అసెంబ్లీ ఎన్నికల ప్రచారంలో భాగంగా పాల్గొన్న రమేష్ బిధూరీ.. కాంగ్రెస్‌ ఎంపీ ప్రియాంక గాంధీ వాద్రాను ఉద్దేశిస్తూ తీవ్ర వివాదాస్పద వ్యాఖ్యలు చేశారు. ఢిల్లీ అసెంబ్లీ ఎన్నికల్లో తాను ఎమ్మెల్యేగా విజయం సాధిస్తే కల్కాజీ నియోజకవర్గంలోని రోడ్లను ప్రియాంక గాంధీ వాద్రా బుగ్గల్లా మారుస్తానంటూ తీవ్ర అనుచిత వ్యాఖ్యలు చేశారు. ఈ వ్యాఖ్యలపై కాంగ్రెస్ పార్టీ తీవ్రంగా మండిపడింది. రమేష్ బిధూరీకి వ్యతిరేకంగా దేశవ్యాప్తంగా వివిధ చోట్ల కాంగ్రెస్ కార్యకర్తలు తీవ్రంగా మండిపడుతున్నారు.