ప్రభుత్వ ఉద్యోగులు ఎగిరి గంతేసే వార్త.. జీతాలు 400 శాతం పెంపు

గత కొన్నేళ్లుగా అంతర్యుద్ధంతో అల్లకల్లోలంగా మారిన సిరియాలో ఇటీవల కొత్త ప్రభుత్వం ఏర్పడింది. కొన్ని రోజుల ముందు వరకు సిరియాను పాలించిన అధ్యక్షుడు బషర్ అల్ అసద్.. దేశం విడిచి రష్యాకు పారిపోయి తలదాచుకుంటున్నారు. ఈ నేపథ్యంలోనే హయత్‌ తహ్రీర్ అల్‌ షామ్‌ అనే సంస్థ మిగిలిన రెబల్‌ గ్రూపులతో కలిసి సిరియాను ఆక్రమించుకుంది. ప్రస్తుతం అబూ మొహమ్మద్ అల్-జులానీ నేతృత్వంలో సిరియా పాలన నడుస్తోంది. ఇక అసద్ పాలన ముగిసిపోవడంతో సిరియా ప్రజలు సంబరాలు జరుపుకుంటున్నారు. ఈ క్రమంలోనే తాజాగా సిరియా ఆర్థిక మంత్రి మహమ్మద్ అబ్జాద్ సంచలన ప్రకటన చేశారు. సిరియాలో హయత్ తహ్రీర్ అల్ షామ్ ఆధ్వర్యంలో ఏర్పడిన కొత్త ప్రభుత్వంలో ఉద్యోగులకు భారీగా జీతాలు పెంచుతామని ప్రకటించారు.

సిరియా ప్రభుత్వ ఉద్యోగులకు 400 శాతం మేరకు జీతాలు పెంచుతామని సిరియా ఆర్థిక మంత్రి మహమ్మద్‌ అబ్జాద్‌ తెలిపారు. 1.65 ట్రిలియన్‌ సిరియన్ పౌండ్లు అంటే భారత కరెన్సీలో దాదాపు రూ.1100 కోట్ల ప్రభుత్వ అధికారుల జీతాలను దేశ వనరుల నుంచి సమకూర్చనున్నట్లు ఆయన స్పష్టం చేశారు. సిరియా ఆర్థిక వ్యవస్థను ఒక స్థిరత్వానికి తీసుకురావడంలో భాగంగా ఈ ప్రభుత్వ ఉద్యోగుల వేతనాల పెంపును అమలు చేస్తామని మహమ్మద్ అబ్జాద్‌ చెప్పారు. కొన్ని సంవత్సరాలుగా సిరియాలో జరుగుతున్న అంతర్యుద్ధం కారణంగా దేశం ఎన్నో ఆర్థిక సవాళ్లను ఎదుర్కొంటోందని పేర్కొన్నారు.

అయితే ప్రస్తుతం తమ ఆధ్వర్యంలో ఉన్న సిరియా నూతన ప్రభుత్వానికి ఆర్థిక సహాయం చేస్తామని చాలా అరబ్‌ దేశాలు హామీ ఇచ్చాయని మహమ్మద్ అబ్జాద్ గుర్తు చేసుకున్నారు. విదేశాల్లో ఉన్న సిరియా ప్రభుత్వానికి చెందిన 400 మిలియన్‌ డాలర్లు అంటే భారత కరెన్సీలో ఏకంగా రూ.3500 కోట్ల విలువైన ఆస్తులను విడిపించుకునేందుకు ఆ దిశగా ప్రయత్నాలు చేస్తున్నామని చెప్పారు.

సిరియాలో పరిపాలనను చక్కబెట్టేందుకు అన్ని చర్యలు తీసుకుంటున్నట్లు ఆర్థిక మంత్రి హహమ్మద్ అబ్జాద్ వెల్లడించారు. ప్రభుత్వ ఉద్యోగుల్లో సమర్థత, జవాబుదారీతనం పెంచడానికి.. దేశ ఆర్థికవ్యవస్థను స్థిరంగా ఉంచేందుకు మంత్రిత్వ శాఖల్లో పలు పాలనాపరమైన మార్పులు చేసినట్లు తెలిపారు. అందులో భాగంగానే ప్రభుత్వ ఉద్యోగుల జీతాలను 400 శాతం పెంచాలని నిర్ణయం తీసుకున్నట్లు వివరించారు. అయితే భారీగా జీతాలు పెంచడం వల్ల సిరియా ప్రభుత్వంపై దాదాపు 127 మిలియన్లు అంటే భారత కరెన్సీలో సుమారు రూ.1000 కోట్ల భారం పడుతుందని అంచనా వేసినట్లు తెలిపారు. ఇందు కోసం పన్నుల విధింపులోనూ మార్పులు చేసేందుకు చర్యలు తీసుకుంటున్నామని స్పష్టం చేశారు.