తోక జాడిస్తే పులి తోకనైనా పట్టుకుని బుద్ధి చెబుతా.. రైతు సాహసానికి చప్పట్లు కొట్టాల్సిందే

పులిని నేరుగా కనిపిస్తే గుండెలు జారి గల్లంతు కావాల్సిందే. వన్య మృగాలను చూస్తే చాలా మంది వెన్నులో వణుకు పుడుతుంది. చిరుత పులికి చిక్కామంటే ఇంక ప్రాణాలపై ఆశ వదులుకోవాల్సిందే. గ్రామంలో, పంచాయతీ పరిధిలో చిరుత పులి సంచరిస్తుందన్న సమాచారం వినిపిస్తే చాలు, పగలు, రాత్రి అనే తేడా లేకుండా ఒంటరిగా ఎక్కడి వెళ్లాలన్నా గజగజ వణికిపోతుంటాం. అయితే ఓ రైతు మాత్రం అలా కాదు. పులిని చూసి పారిపోవడం అటుంచితే ఏకంగా దాని తోక పట్టుకుని మరీ దానిని బంధించాడు. ఈ సాహసోపేతమైన ఘటన కర్ణాటక రాష్ట్రంలో వెలుగు చూసింది.

కర్ణాటకలోని తుముకూరు జిల్లా చిక్కకొట్టిగేహళ్లి అనే గ్రామంలో గత కొన్ని రోజులుగా చిరుత సంచరిస్తోంది. దీంతో ఆ గ్రామస్థులకు కంటి మీద కునుకు లేకుండా పోయింది. ఎప్పుడు ఎటువైపు నుంచి వచ్చి దాడి చేస్తుందో తెలియని పరిస్థితిలో, గుండెలు చేతిలో పట్టుకుని బతుకుతున్నారు. దీంతో ఫారెస్ట్ అధికారులు పులిని పట్టుకునేందుకు బోనుతో సహా గ్రామానికి చేరుకున్నారు.

స్థానికుల సహాయంతో పులిని పట్టుకునేందుకు పలుమార్లు ప్రయత్నించగా విఫలమయ్యారు. బోను ఏర్పాటు చేసి పులిని పట్టుకుందామనుకుంటే అది కాస్తా చాకచక్యంగా వారి నుంచి తప్పించుకుపోయింది. దీంతో మరోసారి పులిని పట్టుకునే ఆపరేషన్ నిర్వహించారు. బోను వేసి, ఎరను పెట్టి పులి కోసం ఎదురుచూడసాగారు. వారు అనుకున్నట్లుగానే పొదల నుంచి పులి బోను వైపు నడుచుకుంటూ వచ్చింది.

తర్వాత బోనును గమనించి తప్పించుకునేందుకు ప్రయత్నించింది. అటవీ అధికారులు ఆపరేషన్‌ను చూసేందుకు అక్కడికి వచ్చిన మహిళలు, పిల్లలపై ఆ పులి దాడి చేయబోయింది. అంతలోనే అక్కడే ఉన్న ఓ యువ రైతు యోగానంద్ పులిని పట్టుకునేందుకు సాహసించాడు. ముందుకు దూసుకెళ్తున్న పులి తోక గట్టిగా పట్టుకున్నాడు. తోక పట్టుకుని పులిని గుండ్రంగా తిప్పాడు. ఈలోగా అటవీ అధికారులు కాస్త పులిపై వల వేసి దానిని బంధించారు. దానికి మత్తు మందు ఇచ్చి బోనులో రెస్క్యూ సెంటర్‌కు తరలించారు. స్థానికులపై దాడి చేయబోయిన పులిని అడ్డుకుని, దానిని పట్టుకున్న రైతు యోగానంద్‌ను అధికారులు ప్రశంసించారు.

పులిని బంధించడాన్ని అక్కడి వారు ఫోన్ లో రికార్డు చేస్తుండగా, యోగానంద్ సాహసం కూడా ఫోన్‌లో రికార్డు అయింది. ఈ వీడియో కాస్త ఇప్పుడు నెట్టింట వైరల్‌గా మారింది. రైతు సాహసాన్ని నెటిజన్లు తెగ పొగుడుతూ రిప్లైలు ఇస్తున్నారు. యువ రైతు ధైర్యాన్ని మెచ్చుకుంటూ పోస్టులు పెడుతున్నారు.