సూపరింటెండెంట్ అనుమానమే నిజమైంది.. భోపాల్ సెంట్రల్ జైల్లో దొరికిన చైనా డ్రోన్ అతడిదేనట!

కరుడుగట్టిన నేరస్థులు, ఉగ్రవాదులు ఉండే భోపాల్ సెంట్రల్ జైల్లో బుధవారం రోజు చైనాకు చెందిన ఓ డ్రోన్ లభ్యం కావడం అందరికీ తెలిసిన విషయమే. అయితే ముందుగా డ్రోన్ చూసి అంతా భయాందోళనకు గురైనా.. జైలు సూపరింటెండెంట్ మాత్రం ఆ డ్రోన్ వారిదే కావొచ్చు అంటూ అనుమానం వ్యక్తం చేశారు. చివరకు ఆయన అనుమానమే నిజం అయింది. ఒక్క రోజులోనే పోలీసులు కేసును ఛేదించి.. సూపరిండెంట్ చెప్పిన మాటలే నిజం అయ్యాయంటూనే నిరూపించారు. కానీ పైఅధికారులు మాత్రం జైల్లో విధులు నిర్వహిస్తున్న పోలీసులు అధికారులకు అక్షింతలు వేశారు. ఎందుకో మనం ఇప్పుడు తెలుసుకుందాం.

అత్యంత భద్రత కల్గిన భోపాల్ సెంట్రల్ జైల్లోని హైరిస్క్ సెల్ వెలుపల బుధవారం రోజు మధ్యాహ్నం 3.30 గంటల నుంచి 4 గంటల మధ్య ఓ డ్రోన్ కనిపించింది. దాన్ని చూసిన ఓ పెట్రోలింగ్ గార్డు పైఅధికారులకు విషయం చెప్పాడు. దీంతో అధికారులు ఆ డ్రోన్‌ను స్వాధీనం చేసుకున్నారు. ఎవరు జైల్లోకి ఆ డ్రోన్‌ను పంపించారనే తెలుసుకునేందుకు ప్రయత్నాలు చేశారు. ముఖ్యంగా మరికొద్ది రోజుల్లోనే గణతంత్ర దినోత్సవ వేడుకలు ఉన్నందున.. ఎవరైనా కావాలనే దాడి చేసేందుకు ఈ డ్రోన్ పంపించారా అని చాలా మంది అనుమానం వ్యక్తం చేశారు.

జైల్లోని పోలీసు అధికారులు కూడా ఈ కోణంలోనే దర్యాప్తు చేశారు. ఈక్రమంలోనే ఆ డ్రోన్ చైనాలో తయారు చేసినట్లుగా గుర్తించారు. అందులో రెండు లెన్సులు ఉన్నట్లు.. మొత్తంగా డ్రోన్ 30 నుంచి 40 గ్రాముల బరువు ఉన్నట్లు కనుక్కున్నారు. సాంకేతిక నిపుణులు సైతం ఆ డ్రోన్ జైల్లోకి ఎలా వచ్చిందో తెలుసుకునేందుకు అనేక చర్యలు చేపట్టారు. కానీ ఆ డ్రోన్‌ను క్షుణ్ణంగా పరిశీలించిన జైలు సూపరింటెండెంట్ రాకేష్ కుమార్ బాంగ్రే మాత్రం.. దీన్ని ఎవరో ప్రత్యేకించి ఇక్కడకు పంపారని తాను భావించడం లేదని.. జైలు బయట ఆడుకునే చిన్న పిల్లలదే ఈ డ్రోన్ కావచ్చని బుధవారం రోజే అనుమానం వ్యక్తం చేశారు.

అయితే ఆయన మాటలే నిజం అయ్యాయి. దర్యాప్తు చేసిన పోలీసులు సైతం ఇదే విషయాన్ని వివరించారు. ఆ డ్రోన్ యజమాని స్థానిక డాక్టర్ స్వప్నిల్ జైన్‌గా గుర్తించారు. అయితే ఆయన సోదరుడు తన కుమారుడి కోసం ఈ డ్రోన్ పంపగా.. 2024 డిసెంబర్ 31వ తేదీన బాలుడు దానితో ఆడుకున్నాడని పోలీసులు వివరించారు. కానీ నియంత్ర కోల్పోయిన ఆ డ్రోన్ జైల్లో పడిపోయిందని తెలిపారు. వారం రోజులుగా ఆ డ్రోన్ జైల్లోనే ఉన్నా ఎవరూ దాన్ని గుర్తించలేకపోయారు.

అత్యంత భారీ భద్రత కల్గిన ఇలాంటి జైల్లో.. 8 రోజులుగా డ్రోన్ అక్కడే ఉన్నా పోలీసులు ఎవరూ దాన్ని గుర్తించకపోవడంపై పెద్ద ఎత్తున విమర్శలు వస్తున్నాయి. ఈక్రమంలోనే జైల్లో భద్రతను మరింత పెంచాలని అంటున్నారు. ఈ విషయం గుర్తించిన ప్రభుత్వం భద్రతను మరింత పటిష్టం చేసేందుకు చర్యలు చేపట్టింది. జైలుతో పాటు పరిసర ప్రాంతాల్లో నో ఫ్లై జోన్‌గా పరిగణించేందుకు సిద్ధం అయింది.