రూ.250 ఖర్చుతో ఎన్నికల్లో గెలిచాడు.. డాక్టర్ కథ చెప్పిన ప్రధాని మోదీ

రాజకీయాలు ప్రస్తుతం చాలా ఖరీదు అయిపోయాయి అనే మాట మనం తరచూ వింటూనే ఉన్నాం. సర్పంచ్ ఎలక్షన్స్ నుంచి మొదలుపెడితే పార్లమెంటు ఎన్నికల వరకు డబ్బు ఉంటేనే ఓట్లు పడతాయి అని.. అందుకు ధనవంతులు మాత్రమే ఎన్నికల్లో పోటీ చేస్తారు అనేది మనం వినడమే కాదు.. చాలా సందర్భాల్లో చూస్తున్నాం కూడా. పార్టీలు టికెట్ ఇచ్చే దగ్గరి నుంచి ఓటర్లు ఓటు వేసేవరకు అంతా డబ్బు చుట్టే తిరుగుతూ ఉంటుంది. అయితే ఇద్దరు అభ్యర్థులు డబ్బులు ఇచ్చినా.. ఎక్కువగా ఖర్చు పెట్టే వ్యక్తికే ఓట్ల పడి గెలిచిన సందర్భాలు కూడా చూస్తూనే ఉన్నాం. రాజకీయాల్లో డబ్బు ప్రభావం గురించి ప్రధానమంత్రి నరేంద్ర మోదీని.. ఓ పాడ్‌కాస్ట్‌లో అడిగిన ప్రశ్నకు ఆయన ఒక ఆసక్తికరమైన కథను చెప్పారు.

ఫేమస్ బిజినెస్‍‌మెన్, జిరోదా కో ఫౌండర్ నిఖిల్ కామత్ నిర్వహించిన పాడ్‌కాస్ట్‌లో పాల్గొన్న ప్రధానమంత్రి నరేంద్ర మోదీ.. తన మనసులో ఉన్న భావాలను పంచుకున్నారు. అదే సమయంలో నిఖిల్ కామత్ అడిగిన ప్రశ్నలకు కూడా ఆయన సమాధానం చెప్పారు. ప్రస్తుతం రాజకీయాల్లోకి అడుగుపెట్టాలంటే బాగా డబ్బు ఉండాలా అని నిఖిల్ కామత్ అడిగిన ప్రశ్నకు మోదీ ఆసక్తికర సమాధానం ఇచ్చారు. ఈ సందర్భంగా తన చిన్నతనంలో చూసిన ఒక విషయాన్ని ప్రధాని గుర్తు చేసుకున్నారు. రాజకీయాల్లోకి వచ్చేందుకు ఆసక్తి ఉందా అని ఎవరైనా యువతను అడిగితే అందుకు చాలా డబ్బు కావాలి అని వారు సమాధానం ఇస్తున్నారని.. సాధారణంగా వ్యాపారంలో ఒక స్టార్టప్‌ కంపెనీ పెట్టాలంటే ఫ్రెండ్స్, ఫ్యామిలీలో ఎవరైనా డబ్బులు అడుగుతామని.. అదే రాజకీయాల్లో ఎలా నిఖిల్‌ కామత్‌ ప్రధానిని అడిగారు.

అందుకు సమాధానం ఇచ్చిన ప్రధాని.. తన చిన్నతనంలో ఉన్నపుడు జరిగిన ఓ నిజమైన కథను చెప్పారు. తమ గ్రామంలో ఒక కంటి డాక్టర్‌ ఉండేవాడని.. ఆయన తన వద్దకు వచ్చే వారిని ఎంతో ప్రేమగా పలకరించి.. జాగ్రత్తగా చూసుకుని వైద్యం చేసేవారని గుర్తు చేసుకున్నారు. అయితే చాలా బాగా మాట్లాడేవారని చెప్పారు. ఒకసారి ఆయన ఎన్నికల్లో ఇండిపెండెంట్ అభ్యర్థిగా పోటీ చేయాలనుకున్నారని.. అప్పుడు తాను బాలసేనలో పనిచేస్తున్నట్లు తెలిపారు. అయితే ఆ డాక్టర్ వద్ద డబ్బులు లేకపోవడంతో ఆయనకు తెలిసిన వారందరి వద్దకు విరాళాలు సేకరించి వాటితో ఎన్నికల్లో పోటీ చేసి గెలిచినట్లు చెప్పుకొచ్చారు. కేవలం రూ.250 మాత్రమే ఖర్చు చేసి ఆయన విజయం సాధించారని మోదీ వెల్లడించారు.

సమాజం నిజాలను అంగీకరించదు అనేది వాస్తవం కాదని.. ప్రతీ ఒక్కరికి ఓపిక, అంకితభావం ఉండాలని ప్రధాని మోదీ పేర్కొన్నారు. ఓట్ల కోసం ఏదైనా చేస్తామనుకునే మైండ్‌సెట్‌ను వదిలేయాలని హితవు పలికారు. అలాంటి వైఖరితో ఎవరూ విజయం సాధించలేరని చెప్పారు. ఈ ప్రజాస్వామ్య దేశంలో ప్రతీ ఓటరు కూడా ఒక రాజకీయ నాయకుడేనని.. వారు ఓటు వేసేటప్పుడు ఎంతో ఆలోచించి నిర్ణయం తీసుకుంటారని మోదీ వెల్లడించారు.