12 అధ్యాయాలు, 1200 శ్లోకాలు.. మోదీపై మహాకావ్యం రచించిన తిరుపతి యూనివర్సిటీ ప్రొఫెసర్

ప్రధానమంత్రి నరేంద్ర మోదీకి మనదేశంలో ఉన్న ఫ్యాన్ ఫాలోయింగ్ గురించి ప్రత్యేకంగా చెప్పాల్సిన పని లేదు. ఛాయ్ వాలా నుంచి ప్రధాని స్థాయికి ఎదిగిన ఆయన రాజకీయ పయనం.. ప్రతి ఒక్కరికీ ఆదర్శం. కేంద్రంలో వరుసగా మూడోసారి బీజేపీ అధికారంలోకి తీసుకురావటంలో ఆయన రాజకీయ చతురత, విదేశీ వ్యవహారాల్లో ఆయన తీరు.. మోదీని విశ్వగురుగా, అంతర్జాతీయ నేతగా నిలబెట్టింది. ఈ క్రమంలోనే ప్రధానమంత్రి నరేంద్ర మోదీపై ఒడిశాకు చెందిన ఓ సంస్కృత పండితుడు మహాకావ్యం రచించారు. ఒడిశాకు చెందిన సోమనాథ్ దశ్ అనే సంస్కృత పండితుడు " నరేంద్ర ఆరోహణం" పేరుతో మోదీపై మహాకావ్యం రచించారు. ఈ మహాకావ్యంలో మోదీ జీవితంపై 1200 శ్లోకాలు ఉన్నాయి.

ఒడిశాలోని గంజాం జిల్లాకు చెందిన సోమనాథ్ దశ్ తిరుపతిలోని జాతీయ సంస్కృత విశ్వవిద్యాలయంలో అసోసియేట్ ప్రొఫెసర్‌గా పనిచేస్తున్నారు. నరేంద్ర మోదీ జీవిత విశేషాలను గ్రంథస్థం చేయాలనే ఉద్దేశంతో సోమనాథ్ దశ్ 700 పేజీలతో నరేంద్ర ఆరోహణం అనే మహాకావ్యం రచించారు. గుజరాత్‌లోని వెరావల్ యువజనోత్సవాల్లో ఈ మహాకావ్యాన్ని ఆవిష్కరించారు. ఈ మహాకావ్యం రచించడానికి సోమనాథ్ దశ్ నాలుగేళ్ల సమయం తీసుకున్నారు. ఈ మహాకావ్యంలో 12 అధ్యాయాలు, 1200 శ్లోకాలు ఉన్నాయి. ఈ మహాకావ్యాన్ని ఆంగ్లం, హిందీ భాషల్లోనూ సోమనాథ్ సంస్కృత యూనివర్సిటీ ప్రచురించింది.

ఈ మహాకావ్యం ద్వారా మోదీ రాజకీయ ప్రయాణం, జీవితం పోరాటం చరిత్రలో చిరస్థాయిగా లిఖించబడుతుందని సోమనాథ్ దశ్ చెప్తున్నారు. గుజరాత్‌లో మొదలైన మోదీ ప్రయాణం.. ముఖ్యమంత్రిగా ఎదిగిన వైనం.. ప్రస్తుతం ప్రధానమంత్రిగా బాధ్యతల వరకూ ప్రతి ఒక్కటీ ఇందులో ఉంటుందన్నారు. ప్రతాపరుద్రీయం, కావ్యప్రకాష్ వంటి ప్రాచీన సంస్కృత ఇతిహాసాల శైలిలో నరేంద్ర ఆరోహణం ఉంటుందని.. మోదీ జీవిత సంఘటనలు, విజయాలను క్రమబద్ధంగా వివరిస్తుందని రచయిత చెప్తున్నారు. పుస్తకాలు, పత్రికలు, ప్రసంగాలు, మోదీ మన్ కీ బాత్ సహా వివిధ వనరుల ద్వారా ఈ వివరాలను సేకరించినట్లు చెప్పారు.

ప్రధానమంత్రి నరేంద్ర మోదీని తాను ఇప్పటి వరకూ కలవలేదన్న సోమనాథ్ దశ్.. సాధారణ కుటుంబ నేపథ్యం నుంచి వచ్చిన మోదీ.. ప్రధానిగా ఎదిగిన తీరు నుంచి ప్రేరణ పొంది, ఈ మహాకావ్యం రాసినట్లు తెలిపారు. అలాంటి వ్యక్తి.. వ్యక్తిత్వం గురించి సంస్కృతంలో రాయాలనే ఉద్దేశంతోనే ఈ మహాకావ్యం రాసినట్లు వివరించారు.