ట్రంప్ ప్రమాణ స్వీకారోత్సవానికి భారత విదేశాంగ శాఖ మంత్రి

గతేడాది నవంబర్‌లో జరిగిన అమెరికా ఎన్నికల్లో విజయం సాధించిన డొనాల్డ్ ట్రంప్.. రెండోసారి యూఎస్ అధ్యక్షుడిగా పదవీ బాధ్యతలు స్వీకరించబోతున్నారు. ముఖ్యంగా జనవరి 20వ తేదీన ఆయన ప్రమాణ స్వీకారం చేయనున్నారు. ఈక్రమంలోనే అమెరికా భారత దేశానికి ఆహ్వానం పంపగా.. భారత విదేశాంగ శాఖ మంత్రి జై శంకర్ ప్రమాణ స్వీకారోత్సవానికి హాజరు కాబోతున్నారు. ఈ విషయాన్ని నేరుగా కేంద్ర ప్రభుత్వమే వెల్లడించింది. ఆ పూర్తి వివరాలు ఏంటో మనం ఇప్పుడు తెలుసుకుందాం.

రెండోసారి అగ్రరాజ్యం అమెరికా అధ్యక్షుడిగా డొనాల్డ్ ట్రంప్ పదవీ బాధ్యతలు స్వీకరించబోతుండగా.. జనవరి 20వ తేదీనే ప్రమాణ స్వీకారోత్సవానికి ముహూర్తం ఖరారు చేశారు. ఈక్రమంలోనే యూఎస్ మిత్ర దేశాలకు ఆహ్వానం పలికారు. అయితే భారతదేశం తరఫున విదేశాంగ శాఖ మంత్రి జై శంకర్ హాజరు కానున్నారు. అయితే ఆయన ఏ తేదీన యూఎస్ వెళ్లబోతున్నారనే విషయాన్ని మాత్రం కేంద్రం ఇంకా వెల్లడించలేదు. ఈ పర్యటనలో భాగంగా జై శంకర్.. అక్కడి కొత్త పరిపాలనా అధికారులతో పాటు ఇతర నేతలతో అనేక సమావేశాల్లో పాల్గొననున్నట్లు సమాచారం.

జనవరి 20వ తేదీన జరగబోతున్న ఈ ప్రమాణ స్వీకారోత్సవాన్ని యూఎస్ క్యాపిటల్ భవనంలోని వెస్ట్ ఫ్రంట్ ప్రాంతంలో నిర్వహించబోతున్నారు. ఇప్పటికే పెద్ద ఎత్తున ఏర్పాట్లు సాగుతున్నాయి. ముఖ్యంగా ఈ వేడుకల్లో భారతీయ అమెరికన్ ఢోల్‌బ్యాండ్ సందడి చేయబోతున్నట్లు కూడా పెద్ద ఎత్తున వార్తలు వస్తున్నాయి. ప్రమాణ స్వీకారోత్సవం రోజు ముందుగా అమెరికా సుప్రీం కోర్టు ప్రధాన న్యాయమూర్తి డొనాల్డ్ ట్రంప్‌తో ప్రమాణం చేయిస్తారు. ఆ తర్వాత జాతిని ఉద్దేశించి నూతన అధ్యక్షుడు ప్రసంగిస్తారు.

అయితే ఈ కార్యక్రమానికి అనేక దేశాల నేతలతో పాటు అమెరికా ప్రస్తుత అధ్యక్షుడు జో బైడెన్ కూడా హాజరు అవుతారు. కానీ గతంలో జో బైడెన్ ప్రమాణ స్వీకారోత్సవానికి ట్రంప్ గైర్హాజరయ్యారు. ఇదంతా ఇలా ఉండగా.. 2024 నవంబర్ నెలలో జరిగిన అమెరికా అధ్యక్ష ఎన్నికల్లో డెమోక్రటిక్ అభ్యర్థి కమలా హారిస్‌ను రిపబ్లికన్ పార్టీ నేత డొనాల్డ్ ట్రంప్ ఓడించారు. అలా అమెరికా 47వ అధ్యక్షుడిగా అగ్రరాజ్యం బాధ్యతలను చేజిక్కించుకోబోతున్నారు.