బంగ్లాదేశ్ డిప్యూటీ హైకమిషనర్‌కు భారత్ సమన్లు.. ఎందుకంటే

బంగ్లాదేశ్-భారత దేశంల మధ్య ఉన్న సరిహద్దు వద్ద అనేక సమస్యలు ఏర్పడుతున్నాయి. ముఖ్యంగా బంగ్లా నుంచి అనేక మంది భారత దేశంలోకి చొరబడుతున్నారు. స్మగ్లింగ్ చేసేందుకు కూడా యత్నిస్తూ దొరికిపోతున్నారు. ఈక్రమంలోనే ఇండియా ఐదు చోట్ల కంచెలు నిర్మించేందుకు చర్యలు తీసుకోగా.. ఆ విషయం తెలుసుకున్న బంగ్లా మరో చర్యకు ఉపక్రమించింది. ముఖ్యంగా భారత హైకమిషనర్‌ను పిలిపించుకుని పలు విషయాలపై చర్చించింది. ఈక్రమంలోనే భారత్ కూడా బంగ్లా తాత్కాలిక హైకమిషనర్‌కు సమన్లు జారీ చేసింది. ఆ పూర్తి వివరాలు ఏంటో మనం ఇప్పుడు తెలుసుకుందాం.

బంగ్లాదేశ్ నుంచి అనేక మంది ఇండియాలోకి ప్రవేశించేందుకు అక్రమంగా సరిహద్దులు దాటుతున్నారు. అలాగే స్మగ్లింగ్ కూడా చేస్తూ పట్టుబడుతున్నారు. ఈమధ్య కాలంలో ఈ కేసులు ఎక్కువ అవుతుండగా.. భారత ప్రభుత్వం సరిహద్ద వద్ద బీఎస్ఎఫ్ భద్రతను మరింత పెంచింది. అలాగే ఐదు చోట్ల కంచెలు నిర్మించేందుకు ఏర్పాట్లు చేసింది. ఈ విషయం తెలుసుకున్న బంగ్లా సర్కారు దీన్ని తీవ్రంగా వ్యతిరేకించింది. ఈక్రమంలోనే భారత హైకమిషనర్ ప్రణయ్ వర్మను తమ కార్యాలయానికి పిలిచింది బంగ్లాదేశ్ విదేశాంగ శాఖ.

ఈక్రమంలోనే ఆదివారం రోజు మధ్యాహ్నం 3 గంటలకు విదేశాంగ శాఖ కార్యాలయానికి వెళ్లిన ప్రణయ్ వర్మ.. కార్యదర్శి జషీముద్దిన్‌తో సమావేశం అయ్యారు. దాదాపు 45 నిమిషాల పాటు ఆయనతో చర్చించిన తర్వాత మీడియా సమావేశంలో పాల్గొన్నారు. కంచెల విషయంలో రెండు దేశాల రక్షణ దళాలు బీఎస్ఎఫ్, బీజీపీలు ఓ అవగాహనతో ఉన్నాయని చెప్పుకొచ్చారు. సరిహద్దు వెంబడి నేరాల నియంత్రణకు ఈ అవగాహన, సహకారం కొనసాగుతాయని ఆశిస్తున్నట్లు వెల్లడించారు.

ఇదే విషయంపై బంగ్లాదేశ్ హోం వ్యవహారాల సలహాదారు లెఫ్టినెంట్ జనరల్ (రిటైర్డ్) జహంగీర్ ఆలం చౌదరి మాట్లాడారు. కంచె ఏర్పాటుకు తమ దేశం ఏమాత్రం ఒప్పుకోవట్లేదని చెప్పారు. పరస్పస అంగీకారం లేకుండా సున్నా రేఖకు 150 గజాలలోపు ఎలాంటి రక్షణ సంబంధిత కంచె నిర్మించకూడదనే ఒప్పందం ఉన్నట్లు గుర్తు చేశారు. అలాగే ఇప్పటికే భారతదేశం 4,156 కిలో మీటర్ల పొడవైన సరిహద్దులో 3 వేల 271 కిలో మీటర్ల కంచె వేసిందని వివరిచారు. కేవలం 885 కిలో మీటర్ల పొడవులో మాత్రమే కంచె వేయలేదంటూ స్పష్టం చేశారు.

ఇది జరిగిన ఒక్క రోజు తర్వాతే భారత దేశం కూడా మరో చర్య తీసుకుంది. బంగ్లాదేశ్ తాత్కాలిక డిప్యూటీ హైకమిషనర్ నురల్ ఇస్లామ్‌కు సమన్లు జారీ చేసింది. దీంతో ఆయన వెంటనే ఢిల్లీలోని కార్యాలయానికి వచ్చాడు. ఈక్రమంలోనే అక్కడి సంబంధిత అధికారులతో అనేక అంశాల గురించి చర్చించారు. కానీ అక్కడ ఏమేం మాట్లాడారు.. నురల్ ఇస్లామ్ ఎలాంటి వివరణ ఇచ్చారనేది మాత్రం ఇంకా తెలియరాలేదు.