మార్చి 21న ఐపీఎల్ 2025 షురూ.. మే 25న ఫైనల్

ఐపీఎల్ 2025 సీజన్ కాస్త ఆలస్యంగా ప్రారంభం కానుంది. వాస్తవానికి ఐపీఎల్ 2025 మెగా వేలానికి ముందే బీసీసీఐ వచ్చే మూడు ఐపీఎల్ సీజన్ల తేదీలను ప్రకటించింది. ఐపీఎల్ 2025 సీజన్.. మార్చి 14 నుంచి ప్రారంభం అవుతుందని తొలుత ప్రకటించింది. కానీ తాజాగా ఆ తేదీని మార్చింది. ఛాంపియన్స్ ట్రోఫీ 2025 మార్చి 9న ముగియనుంది. దీంతో మార్చి 21 నుంచి ఐపీఎల్ ప్రారంభించాలని బీసీసీఐ నిర్ణయించింది. ఈ మేరకు ప్రకటన విడుదల చేసింది. మే 25న ఫైనల్ జరగనుంది.

సంప్రదాయం ప్రకారం క్రితం సీజన్‌లో టైటిల్ విజేత సొంత వేదికలో టోర్నీ తొలి, ఫైనల్ మ్యాచులను నిర్వహిస్తారు. అదే సంప్రదాయం ప్రకారం.. డిఫెండింగ్ ఛాంపియన్ కోల్‌కతా నైట్ రైడర్స్ సొంత మైదానమైన ఈడెన్ గార్డెన్స్‌లో ఈ రెండు మ్యాచ్‌లు జరగనున్నాయి. ఇక గతేడాది రన్నరప్‌గా సన్ రైజర్స్ హైదరాబాద్ నిలిచిన విషయం తెలిసిందే. దీంతో క్వాలిఫయర్ 1, ఎలిమినేటర్ మ్యాచ్‌లు హైదరాబాద్‌లోని ఉప్పల్ వేదికగా జరగనున్నాయి. ఐపీఎల్ 2024 మాదిరిగానే.. ఈ సారి కూడా మొత్తం 74 మ్యాచ్‌లు నిర్వహించనున్నారు.

కాగా వీలైనంత త్వరగా ఐపీఎల్ 2025 పూర్తి షెడ్యూల్‌ను విడుదల చేయాలని.. బీసీసీఐ ప్లాన్ చేస్తోంది. త్వరలో జరగనున్న బీసీసీఐ పాలకవర్గ సమావేశంలో తేదీలు, వేదిక ఖరారు చేయనున్నారు. ఇక మహిళల ప్రీమియర్ లీగ్‌కు సంబంధించి కూడా బీసీసీఐ కీలక నిర్ణయం తీసుకున్నట్లు తెలుస్తోంది. ఈసారి నాలుగు వేదికల్లో మ్యాచ్‌లు నిర్వహించాలని డిసైడ్ అయింది. ముంబై, బెంగళూరు, బరోడా, లక్నోలలో ఈ మ్యాచ్‌లు జరగనున్నాయి.

ఇక వచ్చే ఐపీఎల్ సీజన్‌లో మరికొన్ని మార్పులు రానున్నాయి. ఇన్నాళ్లు లీగ్‌లో తన సొంత ప్రవర్తన నియమావళి అమల్లో ఉంది. కానీ వచ్చే సీజన్‌ నుంచి ఐసీసీ ప్రవర్తన నియమావళిని అమలు చేయనున్నట్లు బీసీసీఐ వర్గాలు తెలిపాయి. మరోవైపు ఐపీఎల్ మెగా వేలంలో పంజాబ్ కింగ్స్ జట్టు రూ.26.75 కోట్లు వెచ్చించి శ్రేయస్ అయ్యర్‌ను కొనుగోలు చేసిన విషయం తెలిసింది. తాజాగా అతడిని జట్టు కెప్టెన్‌గా పంజాబ్ ప్రకటించింది. ఈ మేరకు సోషల్ మీడియాలో పోస్టర్ విడుదల చేసింది.