డబ్ల్యుపిఎల్ వేలంలో అన్‌సోల్డ్.. కట్ చేస్తే ఏ భారత బ్యాటర్‌కు సాధ్యం కాని రికార్డు

ముంబైకి చెందిన యువ మహిళా బ్యాటర్‌ ఇరా జాదవ్‌ క్రికెట్‌లో చరిత్ర సృష్టించింది. భారత వన్డే క్రికెట్‌ చరిత్రలో ఎవరికీ సాధ్యం కాని రికార్డును 14 ఏళ్ల ఇరా జాదవ్‌ సాధించింది. వన్డే క్రికెట్‌లో ఏకంగా ట్రిపుల్‌ సెంచరీ కొట్టింది. అండర్‌-19 టోర్నీలోనే ఆమె ఈ ఫీట్‌ సాధించింది. ఇరా జాదవ్‌ ప్రదర్శనతో ముంబై జట్టు.. 544 పరుగుల భారీ తేడాతో మేఘాలయను చిత్తు చేసింది.

 బెంగళూరులోని ఆలూరు క్రికెట్ గ్రౌండ్‌లో జరిగిన అండర్‌-19 వన్డే మ్యాచ్‌లో ముంబై- మేఘాలయ జట్లు తలపడ్డాయి. ఇందులో ముంబై తొలుత బ్యాటింగ్‌కు దిగింది. ఇరా జాదవ్‌ విధ్వంసంతో ముంబై 50 ఓవర్లలో కేవలం మూడు వికెట్లను కోల్పోయి 563 పరుగులు చేసింది. ఎలినా ముల్లా (8)తో కలిసి ఓపెనింగ్ స్థానంలో బరిలోకి దిగిన ఇరా జాదవ్.. ఆకశమే హద్దుగా చెలరేగిపోయింది. కెప్టెన్ హుర్లే గాలా (116)తో కలిసి రెండో వికెట్‌కు 274 పరుగులు జోడించింది.

ఈ మ్యాచ్‌లో మొత్తంగా 157 బంతులు ఎదుర్కొన్న ఇరా జాదవ్.. 346 పరుగులు చేసి నాటౌట్‌గా నిలిచింది. ఇందులో 42 ఫోర్లు, 16 సిక్సర్లు ఉండటం గమనార్హం. వన్డే మ్యాచ్‌లో జట్టంతా కలిసి చేసిన స్కోరును.. 14 ఏళ్ల ఇరా ఒంటిచేత్తో చేయడం విశేషం. ఈ క్రమంలో ఇరా జాదవ్… దీక్ష పవార్‌ (39)తో కలిసి మూడో వికెట్‌కు 186 పరుగులు జోడించింది. మితాలీ హర్షద్ (26*)తో కలిసి నాలుగో వికెట్‌కు అజేయంగా 33 బంతుల్లోనే 64 పరుగుల భాగస్వామ్యం నిర్మించింది. దీంతో ముంబై నిర్ణీత 50 ఓవర్లలో 563/3 స్కోరు చేసింది.

అనంతరం భారీ లక్ష్యంతో బరిలోకి దిగిన మేఘాలయ కనీస పోరాటం కూడా చేయకుండానే కుప్పకూలింది. వచ్చిన బ్యాటర్లు వచ్చినట్లే పెవిలియన్ చేరడంతో ఆ జట్టు బ్యాటింగ్ యూనిట్ సైకిల్ స్టాండ్‌ను తలపించింది. ముంబై బౌలర్ల దెబ్బకు మేఘాలయ 19 పరుగులకే ఆలౌటైంది. దీంతో ముంబై జట్టు 544 పరుగుల భారీ తేడాతో మేఘాలయను ఓడించింది. మేఘాలయ బ్యాటర్లలో ఒక్కరు కూడా రెండంకెల స్కోరు చేయలేదు. ఎక్స్‌ట్రాల రూపంలో వచ్చిన 10 పరుగులే టాప్‌ స్కోరర్ కావడం గమనార్హం. కాగా సంచలన ఇన్నింగ్స్‌తో అదరగొట్టిన ఇరా జాదవ్‌ను ఇటీవల జరిగిన మహిళల ప్రీమియర్‌ లీగ్‌ 2025 మెగా వేలంలో ఏ ఫ్రాంఛైజీ కూడా కొనుగోలు చేయకపోవడం గమనార్హం.