తిరుమల శ్రీవారి ప్రత్యేక ప్రవేశ దర్శనమంటే ఆశపడ్డ భక్తులు.. క్యూ లైన్‌లోకి వెళ్లాక ట్విస్ట్

కలియుగ ప్రత్యక్ష దైవం వెంకటేశ్వరస్వామి కొలువైన తిరుమలలో మరో కొత్త తరహా మోసం వెలుగుచూసింది. నకిలీ దర్శనం టికెట్లతో భక్తులకు శ్రీవారి దర్శనం చేయిస్తున్న వ్యవహారం బయటకు వచ్చింది. రూ.300 ప్రత్యేక ప్రవేశ దర్శనం నకిలీ టికెట్లు తయారు చేసి భక్తులకు శ్రీవారి దర్శనం చేయిస్తున్న వ్యవహారం వెలుగులోకి వచ్చింది. అనుమానం రావటంతో తిరుమల తిరుపతి దేవస్థానం విజిలెన్స్ సిబ్బంది ఇలాంటి టికెట్లతో శ్రీవారి దర్శనానికి వచ్చిన కొంతమంది భక్తులను వైకుంఠం క్యూకాంప్లెక్స్ వద్ద ఆపివేశారు. ఆ తర్వాత టీటీడీ విజిలెన్స్ అధికారులు పూర్తిస్థాయి విచారణ చేపట్టారు. ఈ దర్యాప్తులో అనేక విషయాలు వెలుగులోకి వచ్చాయి. టీటీడీ సిబ్బంది హస్తం కూడా ఉన్నట్లు తేలింది.

ఈ మోసం వెనుక టీటీడీలో పనిచేస్తున్న ఉద్యోగితో పాటుగా అగ్నిమాపక సిబ్బంది, కొంతమంది ట్యాక్సీ డ్రైవర్ల హస్తం ఉన్నట్లు టీటీడీ విజిలెన్స్ విచారణలో తేలింది. 300 రూపాయల ప్రత్యేక ప్రవేశ దర్శనం కౌంటర్‌లో పనిచేస్తున్న లక్ష్మీపతి అనే ఉద్యోగి, అగ్నిమాపకశాఖలో పనిచేస్తున్న మణికంఠ, భానుప్రకాష్‌లతో పాటుగా జగదీష్, శశి అనే ట్యాక్సీ డ్రైవర్ల హస్తం ఇందులో ఉన్నట్లు గుర్తించారు. మణికంఠ సాయంతో నకిలీ రూ.300 ప్రత్యేక ప్రవేశ దర్శనం టికెట్లు తయారు చేయించి.. ట్యాక్సీ డ్రైవర్ల ద్వారా శ్రీవారి భక్తులకు విక్రయిస్తున్నట్లు తేలింది. ఇలాంటి నకిలీ టికెట్లు ఉన్న భక్తులను లక్ష్మీపతి కౌంటర్లో ఉన్నప్పుడు దర్శనానికి పంపిస్తున్నట్లు గుర్తించారు. ఈ వ్యవహారంలో లక్ష్మీపతి, భానుప్రకాష్, మణికంఠ, శశి, జగదీష్‌లను తిరుమల వన్ టౌన్ పోలీసులు అదుపులోకి తీసుకున్నారు.

ఈ రకంగా నకిలీ టికెట్లు తయారుచేసి ప్రొద్దుటూరు, హైదరాబాద్, బెంగళూరుకు చెందిన భక్తులకు విక్రయించినట్లు తెలిసింది. 11 మంది భక్తుల నుంచి రూ.19 వేలు వరకూ వసూలు చేసినట్లు విచారణలో తేలింది. ఈ వ్యవహారంలో మరిన్ని వివరాలు రాబట్టేందుకు టీటీడీ విజిలెన్స్ సిబ్బంది, తిరుమల వన్ టౌన్ పోలీసులు ప్రస్తుతం ఈ ఐదుగురిని విచారిస్తు్న్నారు. ఈ వ్యవహారంలో ఇంకా ఎవరైనా ఉన్నారా అనే కోణంలోనూ విచారణ జరుపుతున్నారు. మరోవైపు తిరుమల శ్రీవారి దర్శనానికి సంబంధించిన టికెట్లను టీటీడీ అధికారిక వెబ్ సైట్‌ ద్వారా కొనుగోలు చేయాలని టీటీడీ పదే పదే భక్తులకు విజ్ఞప్తి చేస్తోంది. అయినప్పటికీ కొంతమంది దళారులు ఈ రకంగా భక్తులను మోసం చేస్తున్నారు.