మోహన్‌బాబు యూనివర్సిటీ వద్దకు మంచు మనోజ్.. రాళ్లదాడులు, తోపులాటలు

మంచు ఫ్యామిలీ వివాదం మరోసారి తెరపైకి వచ్చింది. తిరుపతిలోని మోహన్‌‌బాబు యూనివర్సిటీ వద్ద బుధవారం ఉద్రిక్తత తలెత్తింది. మోహన్ బాబు చిన్న కుమారుడు, మంచు మనోజ్ ఎంబీయూ వద్దకు రావటంతో ఉద్రిక్త పరిస్థితులు తలెత్తాయి. మోహన్‌ బాబు యూనివర్సిటీలోకి వెళ్లేందుకు మంచు మనోజ్ ప్రయత్నించగా.. పోలీసులు అడ్డుకున్నారు. దీంతో అక్కడ కాసేపు వాగ్వాదం చోటుచేసుకుంది. తన తాతయ్య, నాయనమ్మ సమాధులను చూసేందుకు వచ్చానంటూ మనోజ్ వాదించారు. అయితే కోర్టు ఆదేశాల నేపథ్యంలో యూనివర్సిటీలోకి అనుమతి లేదని మంచు మనోజ్‌‌కు పోలీసులు స్పష్టం చేశారు. దీంతో తాను తాత, నానమ్మ సమాధులను చూసేందుకు వచ్చానని, గొడవపడేందుకు రాలేదంటూ మంచు మనోజ్ పోలీసులకు చెప్పే ప్రయత్నం చేశారు. అయితే వారు అంగీకరించకపోవటంతో మంచు మనోజ్ గేటు వద్దే ఆందోళనకు దిగారు.

ఈ క్రమంలోనే మోహన్‌బాబు యూనివర్సిటీ వద్ద రెండు వర్గాలు రాళ్లు విసురుకున్నాయి. బౌన్సర్లు ఒకరినొకరు తోసుకున్నారు. మంచు మనోజ్ మీద కూడా రాళ్లు విసిరినట్లు తెలిసింది. దీంతో పోలీసులు జోక్యం చేసుకోవాల్సి వచ్చింది. హైదరాబాద్‌లో మంచు మోహన్ బాబు ఇంటి వద్ద జరిగిన పరిణామాలు, ఆ తర్వాత జరిగిన సంఘటనల దృష్ట్యా పోలీసులు పోలీసులు మంచు మనోజ్‌ను యూనివర్సిటీలోకి అనుమతించలేదు. అంతకుముందే మోహన్ బాబు యూనివర్సిటీ వద్దకు రావొద్దంటూ పోలీసులు మంచు మనోజ్‌కు నోటీసులు కూడా పంపినట్లు తెలిసింది. అయితే మంచు మనోజ్ రావటం, సమాధుల వద్దకు వెళ్లి చూడాల్సిందేనంటూ పట్టుబట్టడంతో చివరకు పోలీసులు అంగీకరించారు.

మరోవైపు బుధవారం ఉదయం రేణిగుంట విమానాశ్రయం చేరుకున్న మంచు మనోజ్, మౌనిక దంపతులు.. అక్కడి నుంచి ర్యాలీగా రంగంపేటకు వెళ్లారు. అక్కడి నుంచి సీఎం చంద్రబాబు నాయుడు స్వగ్రామం నారావారిపల్లెకు వెళ్లారు. అక్కడ మంత్రి నారా లోకేష్‌తో మంచు మనోజ్ భేటీ అయ్యారు. ఈ సందర్భంగా తమ కుటుంబంలో జరుగుతున్న ఘటనల గురించి నారా లోకేష్‌తో చర్చించినట్లు తెలిసింది. ఆ తర్వాత అక్కడి నుంచి రంగంపేటకు చేరుకున్న మంచు మనోజ్.. జల్లికట్టు పోటీలకు హాజరయ్యారు. అనంతరం మోహన్ బాబు యూనివర్సిటీ వద్దకు చేరుకుని.. తాతయ్య, నాన్నమ్మ సమాధులకు నివాళులు అర్పించేందుకు ప్రయత్నించారు. ఈ క్రమంలోనే రాళ్ల దాడి, తోపులాటలు చోటుచేసుకున్నాయి. అయితే ఆ తర్వాత పోలీసులు మంచు మనోజ్‍ను సమాధుల వద్దకు అనుమతించడంతో పరిస్థితి సద్దుమణిగింది.