రోడ్డుపై వెళ్లే వారికి సర్కారు అదిరిపోయే నజరానా.. ఆ ఒక్క పని చేస్తే చాలు 25 వేలు ఇస్తారట!

మనం రోడ్డుపై వెళ్తున్నప్పుడు చాలా సార్లు రోడ్డు ప్రమాదాలకు గురైన వాళ్లను చూస్తుంటాం. మనకు వీలయినంత వరకు వారికి సాయం చేసేందుకు ముందుకు వెళ్తుంటాం. కానీ కొందరు మాత్రం సాయం చేసేందుకు కూడా సంకోచిస్తుంటారు. అనవసరమైన కేసుల్లో ఇరుక్కుపోతామేనని.. క్షతగాత్రులను అక్కడే వదిలేసి గమ్యస్థానాలకు పయనం అవుతుంటారు. ఇలాంటి వాళ్లకు షాక్ ఇస్తూ.. సాయం చేసే వాళ్లకు తోడుగా నిలబడబోతుంది కేంద్ర ప్రభుత్వం. ముఖ్యంగా ఎవరూ ఊహించని స్థాయిలో రివార్డు అందించేందుకు సిద్ధం అయింది. ఆ పూర్తి వివరాలు ఏంటో మనం ఇప్పుడు తెలుసుకుందాం.

రోడ్డు ప్రమాద బాధితులకు సాయం చేసే వ్యక్తులకు రివార్డును గణనీయంగా పెంచుతున్నట్లు కేంద్ర రోడ్డు రవాణా మరియు రహదారుల శాఖ మంత్రి నితిన్ గడ్కరీ ప్రకటించారు. గతంలో గుడ్ సమారిటన్‌లకు కేవలం 5 రూపాయలే అందించే వాళ్లమని.. ఇప్పుడు దాన్ని 25 వేలకు పెంచుతున్నట్లు వెల్లడించారు. దీని వల్ల ఎక్కువ మంది ప్రయాణికులు.. రోడ్లపై ప్రమాదాలకు గురైన బాధితులకు సాయం చేసేందుకు ముందుకు వచ్చే అవకాశం ఉందని కేంద్ర మంత్రి నితిన్ గడ్కరీ చెప్పుకొచ్చారు.

అయితే గుడ్ సమారిటన్ రివార్డు పెంపు జాతీయ మరియు రాష్ట్ర రహదారులతో పాటు నగరాలు, జిల్లాలు, గ్రామ పంచాయతీల రహదారులకు సైతం వర్తిస్తుందని స్పష్టం చేశారు. ప్రమాదం జరిగిన తర్వాత గంటలోపే బాధితులకు వైద్య చికిత్సలు అందిస్తే వారి ప్రాణాలు కాపాడిన వాళ్లం అవుతామంటూనే.. "గోల్డెన్ అవర్" ప్రాముఖ్యతను వెల్లడించారు. 2021 అక్టోబర్ నెలలో ప్రవేశ పెట్టిన గుడ్ సమారిటన్ పథకం వల్ల.. సాయం చేసే ప్రజలకు చట్టపరమైన లేదా విధాన పరమైన చిక్కుల గురించి భయం పోయిందని గుర్తు చేశారు.

ఈ పథకం వల్ల ప్రమాద బాధితులకు సాయం చేసే వారి సంఖ్య అంతకంతకూ పెరిగిందని కేంద్రమంత్రి నితిన్ గడ్కరీ పేర్కొన్నారు. అలాగే రోడ్డు ప్రమాదాల బారిన పడి ఆస్పత్రుల్లో చికిత్స పొందుతున్న ప్రజలకు మొదటి ఏడు రోజుల చికిత్స కోసం.. రూ. 1.5 లక్షల వరకు ఆసుపత్రి ఖర్చులను భరించాలని కూడా కేంద్ర ప్రభుత్వం ఆలోచిస్తుందని చెప్పుకొచ్చారు.

ఇదంతా ఇలా ఉండగా.. 2014 సంవత్సరం నుంచి 2023 సంవత్సరం మధ్య భారత దేశంలో రోడ్డు ప్రమాదాల కారణంగా సుమారు 15.3 లక్షల మంది ప్రాణాలు కోల్పోయారు. ఈ విషయం అర్థం చేసుకున్న ప్రభుత్వం రోడ్డు ప్రమాదాల మృతుల సంఖ్యను తగ్గించేందుకు ఈ రివార్డును మరింతగా పెంచింది.