విద్యుత్ ఉద్యోగికి కోపం తెప్పించిన నో హెల్మెట్, నో పెట్రోల్ విధానం.. ఎలా పగ తీర్చుకున్నాడంటే

పెట్రోల్ బంక్‌లో చిన్న చిన్న విషయాలకే చాలా మంది కోపం తెచ్చుకుని గొడవ చేస్తుంటారు. తక్కువ పెట్రోల్ పోశారని కొందరు, ముందు నేనొస్తే వేరే వాళ్లకు ముందుగా పెట్రోల్ కొట్టారని మరికొందరు, చిల్లర కోసం ఇంకొందరు.. ఇలా అనేక విషయాల గురించి గొడవ పడుతుంటారు. ఆపై ఇంకోసారి ఈ పెట్రోల్ బంక్‌కు రామంటూ పలువురు ప్రయాణికులు వెళ్లిపోవడం మనం తరచుగా చూస్తుంటాం. కానీ తాజాగా ఈ విద్యుత్ ఉద్యోగి.. ఓ పెట్రోల్ బంక్ నిర్వాహకులతో గొడవ పడ్డాడు. పెట్రోల్ పోయమన్నారని వారిపై కోపం పెంచుకున్నాడు. వెంటనే వారిపై ఆ విధంగా పగ తీర్చుకుని అందరికీ షాకిచ్చాడు. ఆపై నెట్టింట వైరల్ అయ్యాడు. అయితే అతడు ఏం చేశాడో మనం ఇప్పుడు చూద్దాం.

ఉత్తర ప్రదేశ్ రాష్ట్ర ముఖ్యమంత్రి యోగి ఆదిత్య నాథ్ ప్రభుత్వం రోడ్డు ప్రమాదాలు తగ్గించేందుకు ఓ సరికొత్త నిబంధనను తీసుకు వచ్చింది. ముఖ్యంగా నో హెల్మెట్, నో పెట్రోల్ రూల్ అంటూ తీసుకు వచ్చిన ఈ నిబంధనలో.. హెల్మెట్ ధరించకుండా పెట్రోల్ బంక్‌కు వచ్చే ద్విచక్ర వాహనదారులకు పెట్రోల్ పోయొద్దని ఆదేశాలు జారీ చేసింది. రాష్ట్ర వ్యాప్తంగా ఈ నిబంధనను అమలు అయ్యేలా చేస్తోంది. అయితే సర్కారు నిబంధనను తూచా తప్పకుండా పాటిస్తున్నాయి అనేక పెట్రోల్ బంక్‌లు.

హాపూర్ జిల్లాకు చెందిన ఓ పెట్రోల్ బంక్ సిబ్బంది కూడా సర్కారు నిబంధనలకు అనుగుణంగానే పని చేస్తోంది. అయితే తాజాగా ఓ విద్యుత్ ఉద్యోగి హెల్మెట్ ధరించకుండా బైకుపై వచ్చి పెట్రోల్ పోయమని సిబ్బందికి చెప్పాడు. కానీ వాళ్లు నో హెల్మెట్, నో పెట్రోల్ నిబంధన గురించి చెప్పి.. తాము పెట్రోల్ పోయమని తెగేసి చెప్పారు. దీంతో కోపోద్రిక్తుడైన అతడు వారితో గొడవకు దిగాడు. జిల్లా మేజిస్ట్రేట్ నుంచి ఆదేశాలు వచ్చాయని.. నిబంధన అతిక్రమిస్తే తమకు శిక్ష పడుతుందంటూ సముదాయించే ప్రయత్నం చేశారు సిబ్బంది.

అయినా వినని విద్యుత్ ఉద్యోగి.. మీరు ఇలా చెబితే వినరంటూ ద్విచక్ర వాహనాన్ని పక్కన పెట్టి.. అక్కడే ఉన్న విద్యుత్ స్తంభం వద్దకు వెళ్లాడు. ఆవేశంగా వెళ్లిన అతడు స్తంభం ఎక్కి పెట్రోల్ బంక్‌కు విద్యుత్ సరఫరాను నిలిపివేశాడు. దీంతో పెట్రోల్ బంక్ సిబ్బంది మొత్తం షాకయ్యారు. ఏం చేయాలో పాలుపోక చాలా సేపు అలాగే చూస్తూ ఉండిపోయారు. ఆపై విషయాన్ని తమ యజమానికి చెప్పగా.. అతడు విద్యుత్ అధికారులను ఆశ్రయించాడు. వెంటనే స్పందించిన అధికారులు.. 20 నిమిషాల్లోనే పెట్రోల్ బంక్‌కు విద్యుత్ సరఫరాను పునరుద్ధరించారు.

అయితే విద్యుత్ ఉద్యోగి చేసిన పనికి తీవ్ర కోపోద్రిక్తుడైన యజమాని.. వెంటనే పోలీసులకు ఫిర్యాదు చేశాడు. ముఖ్యంగా లైన్‌మెన్ విద్యుత్ స్తంభం ఎక్కి, కరెంటు సరఫరా నిలిపేస్తున్న సీసీటీవీ ఫుటేజీ వీడియోని కూడా పోలీసులకు చూపించాడు. దీంతో కేసు నమోదు చేసుకున్న పోలీసులు దర్యాప్తు చేస్తున్నారు. ప్రస్తుతం ఈ వీడియో నెట్టింట కూడా తెగ వైరల్ అవుతోంది. దీనిపై ఒక్కొక్కరూ ఒక్కో విధంగా స్పందిస్తున్నారు. ఇలా కూడా పగ తీర్చుకోవచ్చా సామీ అంటూ అనేక మంది నెటిజెన్లు కామెంట్లు చేస్తున్నారు.