సైఫ్ అలీ ఖాన్‌ కేసులో రంగంలోకి ఎన్‌కౌంటర్ స్పెషలిస్ట్.. ఎవరీ దయా నాయక్

బాలీవుడ్ నటుడు సైఫ్ అలీ ఖాన్‌పై ముంబై బాంద్రాలోని ఆయన నివాసంలో గురువారం దాడి జరగడం దేశవ్యాప్తంగా తీవ్ర సంచలనంగా మారింది. ఓ దుండగుడు.. సైఫ్ ఇంట్లోకి ప్రవేశించి అతడిపై దాడి చేసి తీవ్రంగా గాయపరిచిన ఘటన తీవ్ర చర్చనీయాంశంగా మారింది. సైఫ్ అలీ ఖాన్ ఒంటిపై ఆరు కత్తిపోట్లు ఉండగా.. ఆయనను వెంటనే ముంబై లీలావతి ఆస్పత్రికి తరలించి.. ఆపరేషన్ నిర్వహించారు. ప్రస్తుతం ఆయన ప్రాణాపాయం నుంచి బయటపడినట్లు డాక్టర్లు ప్రకటించడంతో అంతా ఊపిరిపీల్చుకున్నారు. అయితే ఫేమస్ సెలబ్రిటీలు నివాసం ఉండే బాంద్రాలో ఇలాంటి ఘటన చోటు చేసుకోవడంతో ఇప్పుడు అందరిలో కలవరం మొదలైంది. ఈ నేపథ్యంలోనే సైఫ్ అలీ ఖాన్‌పై దాడి చేసిన నిందితుడిని పట్టుకునేందుకు ముంబై పోలీసులు 10 టీమ్‌లను ఏర్పాటు చేసి జల్లెడ పడుతున్నారు. ఈ క్రమంలోనే సైఫ్ అలీ ఖాన్ దాడి కేసు దర్యాప్తులోకి ఎన్‌కౌంటర్ స్పెషలిస్ట్ దయా నాయక్ రావడం ఇప్పుడు అందరి దృష్టిని ఆకర్షిస్తోంది.

ముంబై అండర్ వరల్డ్‌ను షేక్ చేయడంతో దయా నాయక్ పేరు మారుమోగిపోయింది. 1990లలో 80 మందికి పైగా గ్యాంగ్‌స్టర్లను కాల్చి చంపిన దయా నాయక్.. ఎన్‌కౌంటర్ స్పెషలిస్ట్ అనే పేరు తెచ్చుకున్నారు. కర్ణాటక ఉడిపిలో కొంకణి మాట్లాడే కుటుంబంలో బద్దా, రాధా నాయక్ దంపతులకు చిన్న కుమారుడే ఈ దయా నాయక్. తన సొంత గ్రామంలోనే 7వ తరగతి వరకు దయా నాయక్ కన్నడ మీడియంలో చదువుకున్న తర్వాత.. తన కుటుంబానికి సాయం చేయడానికి ఉద్యోగం కోసం 1979లో ముంబైకి చేరుకున్నారు.

మొదట ఒక హోటల్‌లో పని చేసిన దయా నాయక్.. అక్కడ పనిచేస్తూనే ముంబైలోని గోరేగావ్‌లో ఉన్న మున్సిపల్ స్కూల్ నుంచి 12వ తరగతి పూర్తి చేశారు. ఆ తర్వాత అంధేరిలోని సీఈఎస్ కళాశాల నుంచి డిగ్రీ పూర్తి చేశారు. అనంతరం ప్లంబర్ అప్రెంటిస్‌గా పనిచేస్తున్న క్రమంలో నార్కోటిక్స్ విభాగానికి చెందిన కొంతమంది పోలీసు అధికారులను కలిసిన తర్వాత.. పోలీస్ అధికారి కావాలనే కోరిక దయా నాయక్ మనసులో బలంగా నాటుకుపోయింది. ఈ క్రమంలోనే 1995లో పోలీస్ అకాడమీ నుంచి ట్రైనింగ్ పూర్తి చేసుకుని జుహూ పోలీస్ స్టేషన్‌లో ఎస్ఐగా మొదటి పోస్టింగ్ దక్కింది.

అయితే ఆ సమయంలో ముంబైలో అండర్ వరల్డ్ మాఫియా ప్రభావం ఎక్కువగా ఉండేది. అలాంటి తరుణంలో 1996 డిసెంబర్‌లో గ్యాంగ్ స్టర్ చోటా రాజన్‌‌కు సంబంధించిన వారిని ఇద్దర్ని దయా నాయక్ ఎన్‌కౌంటర్ చేశారు. దీంతో దయా నాయక్‌ పేరు ఒక్కసారిగా వార్తల్లోకి ఎక్కింది. ఇక ఆ తర్వాత పోలీస్ డిపార్ట్‌మెంట్‌లో దయా నాయక్‌ పేరు మారుమోగిపోయింది. అయితే అంత పేరు సంపాదించిన దయా నాయక్‌పై అనేక వివాదాలు ముసురుకున్నాయి. దయా నాయక్ ఆదాయానికి మించి ఆస్తులు సంపాదించారనే ఆరోపణలు రాగా.. 2004లో మహారాష్ట్ర వ్యవస్థీకృత నేరాల నియంత్రణ చట్టం కోర్టు.. ఆయన ఆస్తులపై దర్యాప్తు చేయాలని అవినీతి నిరోధక శాఖకు ఆదేశాలు జారీ చేసింది.

దీంతో రంగంలోకి దిగిన ఏసీపీ అధికారులు.. దయా నాయక్‌కు చెందిన ఇళ్లు, ఆస్తులపై దాడులు జరిపారు. బెంగళూరులోని రెండు ప్రాంతాలతో సహా మొత్తం ఆరు ప్రదేశాలపై దాడులు చేయగా.. ఈ దాడుల్లో దయా నాయక్ రెండు లగ్జరీ బస్సులను కలిగి ఉన్నట్లు తేలింది. ఆ తర్వాత దయా నాయక్‌ను ఏసీబీ అరెస్ట్ చేసింది. 2012లో తిరిగి ఉద్యోగంలో చేరిన దయా నాయక్.. అదనపు కమిషనర్ ఆఫ్ పోలీస్ (వెస్ట్)గా నియమితులయ్యారు. ఇప్పుడు సైఫ్ అలీ ఖాన్ కేసులో దయా నాయక్ రంగంలోకి దిగడంతో అందరి దృష్టి మళ్లీ ఆయనపై పడింది.