ఏపీకి మరో ప్రతిష్టాత్మక ప్రాజెక్టు.. దేశంలోనే తొలి ప్రైవేట్ వెహికల్ పార్క్..1200 ఎకరాల్లో..!

ఉమ్మడి కర్నూలు జిల్లా ఓర్వకల్లుకు మరో ప్రతిష్టాత్మక ప్రాజెక్టు రానుంది.1200 ఎకరాల్లో ఎలక్ట్రిక్ వాహనాల పార్కు ఏర్పాటు చేసేందుకు పీపుల్ టెక్ సంస్థ ముందుకు వచ్చింది. ఈ మేరకు ఆంధ్రప్రదేశ్ ప్రభుత్వం, పీపుల్ టెక్ ఎంటర్‌ప్రైజెస్ ప్రైవేట్ లిమిటెడ్ ప్రతినిధుల మధ్య శుక్రవారం అవగాహన ఒప్పందం కుదిరింది. ఏపీ మంత్రులు నారా లోకేష్, టీజీ భరత్ సమక్షంలో ఈ ఎంవోయూ కుదిరింది. ఈ ఒప్పందం ప్రకారం కర్నూలు జిల్లాలోని ఓర్వకల్లు మొబిలిటీ వ్యాలీలో 1200 ఎకరాల్లో ఎలక్ట్రిక్ వాహనాల పార్క్ ఏర్పాటు చేయనున్నారు. రూ.1800 కోట్లు పెట్టుబడితో ఓర్వకల్ ఎలక్ట్రిక్ వాహనాల పార్కు అభివృద్ధి చేయనున్నారు.

ఎలక్ట్రానిక్ వాహనాల తయారీ, అనుబంధ రంగాలకు రాష్ట్రాన్ని కేరాఫ్ అడ్రస్‌గా నిలపాలన్న లక్ష్యానికి అనుగుణంగా ప్రభుత్వం ఈ ఒప్పందం కుదుర్చుకుంది. ఒప్పందం మేరకు ఓర్వకల్లులో ఎలక్ట్రానిక్ వాహనాల పార్క్ ఏర్పాటై, కార్యకలాపాలు మొదలైతే.. సుమారుగా 13 వేల కోట్ల పెట్టుబడులను ఆకర్షించవచ్చని అధికారులు అంచనా వేస్తున్నారు. దీని ద్వారా 25 వేల మందికి ఉద్యోగాలు దక్కుతాయని భావిస్తున్నారు. ఇక ఈ పార్కులో పీపుల్ టెక్ ఎంటర్ ప్రైజెస్ రూ.300 కోట్లతో ఎలక్ట్రిక్ టూ వీలర్ తయారీ యూనిట్ ఏర్పాటు చేయనుంది.

అలాగే రీసెర్చ్ అండ్ డెవలప్‌మెంట్ కేంద్రాలు, టెస్టింగ్ ట్రాక్‌లు, ప్లగ్-అండ్-ప్లే ఇండస్ట్రియల్ స్పేస్‌లు, పరిశ్రమల కోసం రెడీమేడ్ ప్లాట్‌లతో సహా అవసరమైన మౌలిక సదుపాయాలను ఈ ఎలక్ట్రిక్ వాహనాల పార్కు‌లో అభివృద్ధి చేయనున్నారు. ఎలక్ట్రానిక్ వాహనాల పార్కు ఏర్పాటు ద్వారా ఈ ప్రాంతంలో భవనాలు, ఆస్పత్రులు, విద్యాసంస్థలు, మాల్స్ వంటి మౌలిక సౌకర్యాలు అభివృద్ధి చెందుతాయని ప్రభుత్వం భావిస్తోంది. మరోవైపు ఓర్వకల్లులో రూ.14000 కోట్లతో దేశంలోనే తొలి ప్రైవేట్ సెమీ కండక్టర్ తయారీ ప్లాంట్ ఏర్పాటు కోసం ఇటీవల ఇండీచిప్ సెమీ కండక్టర్స్ లిమిటెడ్, యిటోవా మైక్రో టెక్నాలజీ లిమిటెడ్‌, ఆంధ్రప్రదేశ్ ప్రభుత్వంతో ఒప్పందం కుదుర్చుకున్న సంగతి తెలిసిందే.

మరోవైపు దేశంలోనే మొదటి ప్రైవేట్ ఎలక్ట్రిక్ వాహనాల పార్కును ఓర్వకల్లులో ఏర్పాటు చేసేందుకు ఏపీ ప్రభుత్వం, పీపుల్ టెక్ ఎంటర్‌ప్రైజెస్ మధ్య ఎంవోయూ కుదిరినట్లు మంత్రి నారా లోకేషే ట్వీట్ చేశారు. రూ.1800 కోట్లతో 1200 ఎకరాల్లో ఏర్పాటయ్యే ఈ ఈవీ పార్కు.. భారతదేశం ఈవీ ఎకోసిస్టమ్‌లో గేమ్ ఛేంజర్ అవుతుందని నారా లోకేష్ ఆశాభావం వ్యక్తం చేశారు. దీనిద్వారా రూ.13000 కోట్లు పెట్టుబడులు వస్తాయని.. 25 వేల మందికి ఉద్యోగాలు లభిస్తాయని పేర్కొన్నారు. ఏపీ ఐటీ శాఖ మంత్రిగా ఇన్నోవేషన్, గ్రీన్ మొబిలిటీ, సస్టైనబుల్ గ్రోత్ దిశగా వేసిన ఈ చారిత్రక అడుగు తనకెంతో థ్రిల్లింగ్‌గా ఉందని నారా లోకేష్ సంతోషం వ్యక్తం చేశారు.