కన్నకుమార్తెతో వ్యభిచారం చేయించిన తల్లిదండ్రులు.. వీడియోలు, ఫోటోలతో డబ్బు సంపాదన

కడుపున పుట్టిన బిడ్డ ఎంత పెద్దదైనా.. తల్లిదండ్రులకు పసిపాప లాంటి వారే. పెళ్లి అయి అత్తగారింటికి పంపించినా.. తమ కుమార్తెను ఏ తల్లిదండ్రులైనా.. చిన్న పిల్లలాగే భావిస్తారు. ఆమెకు ఏ చిన్న కష్టం వచ్చినా.. తల్లిదండ్రులుగా ముందు బాధపడతారు. కంటికి రెప్పలాగా కాపాడుకుంటూ.. వారికి ఎలాంటి ఇబ్బంది రాకుండా కాపాడుకుంటారు. సాధారణంగా ఏ తల్లిదండ్రులైనా చేసేది అదే కానీ.. ఈ తల్లిదండ్రుల గురించి వింటే మాత్రం అసలు వాళ్లు తల్లిదండ్రులా లేక కసాయి వారా అనే అనుమానం కలగకమానదు. సొంత కుమార్తెతో వ్యభిచారం చేయించి.. ఆ ఫోటోలు, వీడియోలను అమ్ముకుని డబ్బులు సంపాదించుంటున్న కసాయి తల్లిదండ్రుల వ్యవహారం బయటికి రావడం తీవ్ర దుమారం రేపుతోంది. తమిళనాడులో జరిగిన ఈ ఘటన ఇప్పుడు తీవ్ర చర్చనీయాంశంగా మారింది.

తమిళనాడు రాజధాని చెన్నైలో వెలుగులోకి వచ్చిన ఈ షాకింగ్ ఘటన.. సిగ్గుతో సమాజం తలదించుకునేలా చేసింది. చెన్నైలోని ఒక బిజినెస్‌మెన్‌ను అరెస్ట్ చేసిన పోలీసులు.. అతడి ఫోన్‌లో అశ్లీల చిత్రాలు, ఫోటోలు గుర్తించారు. అందులో చాలావరకు మైనర్ బాలికలకు సంబంధించిన వీడియోలే ఉండటం గమనార్హం. అంతేకాకుండా ఆ వీడియోలు కూడా వారికి తెలియకుండా రహస్యంగా తీసినట్లు ఉన్నాయని.. ఈ కేసును దర్యాప్తు చేస్తున్న అధికారి ఒకరు వెల్లడించారు. ఇదంతా చేయడానికి ఆ బిజినెస్‌మెన్‌కు ఆయన భార్య సహకరించినట్లు పోలీసులు గుర్తించారు. మరీ దారుణమైన విషయం ఏంటంటే.. ఆ వీడియోల్లో ఆ జంట కుమార్తె కూడా ఉండటమే.

తమ కుమార్తెతోపాటు ఇతర బాలికలను వ్యభిచారంలోకి నెట్టి.. వారి అశ్లీల చిత్రాలు, వీడియోలను చిత్రీకరించినట్లు పోలీసులు గుర్తించారు. డబ్బులు సంపాదించడం కోసం ఆ వీడియోలను ఇంటర్నెట్‌లో అప్‌లోడ్ చేసేవారని గుర్తించారు. చైల్డ్ వెల్ఫేర్ కమిటీ ఫిర్యాదుతో రంగంలోకి దిగిన చెన్నై పోలీసుల బృందం.. ఆ జంటను కనిపెట్టి అరెస్ట్ చేసింది. వారి మొబైల్ ఫోన్లను స్వాధీనం చేసుకున్న పోలీసులు.. అందులో మైనర్ బాలికలకు సంబంధించిన అనేక అశ్లీల వీడియోలు ఉన్నట్లు గుర్తించారు. అనంతరం వారిద్దరిపై పోక్సో చట్టం కింద కేసు నమోదు చేసి కోర్టులో హాజరు పరిచారు. దీంతో వారిద్దరికీ కోర్టు జ్యుడీషియల్ కస్టడీ విధించింది. ఇక వారి కుమార్తెను ప్రభుత్వ సంరక్షణ కేంద్రంలో ఉంచారు. అక్కడ ఆమెకు కౌన్సెలింగ్ ఇప్పించారు.

మరోవైపు.. ఇలాంటి ఘటనే కొన్ని రోజుల క్రితం మహారాష్ట్ర రాజధాని ముంబైలో చోటు చేసుకుంది. ఒక మహిళ తన మైనర్ కుమార్తెను వ్యభిచారంలోకి నెట్టినట్లు ఆరోపణలు రుజువు కావడంతో ముంబైలోని ప్రత్యేక కోర్టు ఆమెకు 9 సంవత్సరాల జైలు శిక్ష విధించింది.