జనరల్ కస్టమర్లకే 9 శాతం వడ్డీ ఇస్తోన్న బ్యాంక్.. రూ.5 లక్షలు జమ చేస్తే ఎంతొస్తుంది?

ఫిక్స్‌డ్ డిపాజిట్లు చేసే వారు సాధారణంగా ఎస్‌బీఐ, హెచ్‌డీఎఫ్‌సీ వంటీ పెద్ద పెద్ద బ్యాంకులనే ఎంచుకుంటారు. కానీ, వాటిల్లో చూస్తే వడ్డీ రేట్లు తక్కువగా ఉంటాయి. ప్రస్తుత రోజుల్లో ఫిక్స్‌డ్ డిపాజిట్లపై జనరల్ కస్టమర్లు (60 ఏళ్ల లోపు వారు)కు 9 శాతం వడ్డీ ఇచ్చే బ్యాంకులు చాలా తక్కువ. అయితే, మీరు అలాంటి బ్యాంకును వెతికి పట్టుకుని అందులో మీ డబ్బులను డిపాజిట్ చేసినట్లయితే అదనపు లాభం పొందవచ్చు. మీ డబ్బులు కూడా భద్రమే. ఎందుకంటే డిపాజిట్ ఇన్సూరెన్స్ క్రెడిట్ గ్యారెంటీ స్కీమ్ ద్వారా రూ.5 లక్షల వరకు ఉచిత బీమా కవరేజీ అన్ని బ్యాంకుల్లో అందుబాటులో ఉంటుంది. మీరు అదనంగా ఒక్క రూపాయి కూడా చెల్లించాల్సిన పని లేదు. మరి ఏ బ్యాంకు జనరల్ కస్టమర్లకు 9 శాతం వడ్డీ ఇస్తుందో తెలుసుకుందాం.

సాధారణంగా బ్యాంకులు వివిధ స్పెషల్ టెన్యూర్ల ద్వారా సీనియర్ సిటిజన్లు, సూపర్ సీనియర్ సిటిజన్లకు 9 శాతం వరకు వడ్డీ ఆఫర్ చేస్తుంటాయి. కానీ, స్మాల్ ఫైనాన్స్ బ్యాంకుల్లో ఒకటైన్ నార్త్ ఈస్ట్ స్మాల్ ఫైనాన్స్ బ్యాంక్ (North East Small Finance Bank) బంపర్ ఆఫర్ ఇస్తోంది. సాధారణ కస్టమర్లకు సైతం ఏకంగా 9 శాతం వడ్డీ ఆఫర్ చేస్తోంది. అది కూడా మూడేళ్ల మెచ్యూరిటీ పీరియడ్ డిపాజిట్లపైనే. ఇక ఈ మూడేళ్ల టెన్యూర్ స్కీమ్‌లో 60 ఏళ్లు దాటిన వారు డిపాజిట్ చేస్తే వారికి 9.50 శాతం వడ్డీ లభిస్తుంది.

రూ. 5 లక్షలు జమ చేస్తే ఎంతొస్తుంది?

నార్త్ ఈస్ట్ స్మాల్ ఫైనాన్స్ బ్యాంక్ ప్రస్తుతం 3 సంవత్సరాల మెచ్యూరిటీ పీరియడ్ గల డిపాజిట్లపై గరిష్ఠ వడ్డీ రేట్లు ఇస్తోంది. జనరల్ కస్టమర్లకు 9 శాతం, సీనియర్ సిటిజన్లకు 9.50 శాతం వడ్డీ ఆఫర్ చేస్తోంది. ఒక సాధారణ కస్టమర్ ఈ స్కీమ్‌లో రూ. 5 లక్షలు జమ చేసినట్లయితే.. మెచ్యూరిటీ తర్వాత వడ్డీ రూపంలో రూ. 1,32,800 వరకు వస్తాయి. అంటే మొత్తంగా రూ. 6,32,800 వరకు వస్తాయి. అదే ఒక సీనియర్ సిటిజన్ రూ. 5 లక్షలు డిపాజిట్ చేశాడు అనుకుందాం. మూడేళ్ల మెచ్యూరిటీ తర్వాత చేతికి వడ్డీ రూపంలో రూ. 1,40,150 వరకు అందుతాయి. మొత్తం రూ. 6,40,150 వరకు లభిస్తాయి.

ఇక సూర్యోదయ స్మాల్ ఫైనాన్స్ బ్యాంకులో 3 ఏళ్ల టెన్యూర్ డిపాజిట్లపై జనరల్ కస్టమర్లకు 8.60 శాతం వడ్డీ వస్తోంది. ఉత్కర్ష్ స్మాల్ ఫైనాన్స్ బ్యాంకులో 3 ఏళ్ల డిపాజిట్ స్కీమ్ ద్వారా 8.50 శాతం వడ్డీ ఇస్తున్నారు. జన స్మాల్ ఫైనాన్స్ బ్యాంకులో 8.25 శాతం వడ్డీ లభిస్తోంది. యూనిటీ స్మాల్ ఫైనాన్స్ బ్యాంకులో 8.15 శాతం వడ్డీ వస్తోంది.