కొత్త ఆదాయపు పన్ను చట్టం తెస్తోన్న కేంద్రం.. బడ్జెట్ సమావేశాల్లోనే బిల్లు!?

ఆదాయపు పన్ను చెల్లింపుదారులకు ఊరట కల్పిస్తూ ఇన్‌కమ్ ట్యాక్స్ చట్టాన్ని మరింత సరళీకృతం చేసేందుకు కేంద్ర ప్రభుత్వం ప్రయత్నిస్తోంది. జనవరి 31 నుంచి మొదలు కానున్న బడ్జెట్ సమావేశాల్లోనే ఆదాయపు పన్ను చట్టం కొత్త బిల్లును ప్రవేశ పెట్టే అవకాశాలు ఉన్నాయి. ఐటీ చట్టంలోని పేజీలను దాదాపు 60 శాతం మేర తగ్గించనున్నట్లు తెలుస్తోంది. గత సంవత్సరం జులైలో బడ్జెట్ ప్రవేశపెట్టిన సందర్భంగా ఆర్థిక మంత్రి నిర్మలా సీతారామన్ పలు సూచనలు చేశారు. వచ్చే ఆరు నెలల్లో ఆదాయపు పన్ను చట్టం 1961ను సమూలంగా సమీక్షిస్తామని తెలిపారు.

ఈ నేపథ్యంలోనే కొత్త ఆదాయపు పన్ను బిల్లును ప్రవేశపెట్టే అవకాశాలు కనిపిస్తున్నాయని నిపుణులు అంచనా వేస్తున్నారు. 'రాబోయే బడ్జెట్ సమావేశాల్లోనే కొత్త ఆదాయపు పన్ను బిల్లును ప్రవేశ పెట్టే అవకాశం ఉంది. ఇది ప్రస్తుతం ఉన్న ఇన్‌కమ్ ట్యాక్స్ చట్టానికి సవరణగా ఉండదు. పూర్తిగా కొత్తది. బిల్లు ముసాయిదాను ఇప్పటికే న్యాయశాఖ పరిశీలనకు పంపించాం' అని ఈ వ్యవహారంతో సంబంధం ఉన్న వర్గాలను ఉటంకిస్తూ జాతీయ మీడియాల్లో కథనాలు వెలువడ్డాయి. బడ్జెట్ సమావేశాలు ముగిసేలోపు కొత్త ఆదాయపు పన్ను బిల్లుకు ఆమోద ముద్ర పడే అవకాశాలు ఉన్నాయని తెలుస్తోంది.

కొత్త చట్టానికి సంబంధించి గత బడ్జెట్ ప్రసంగంలో ఆర్థిక మంత్రి నిర్మలా సీతారామన్ ప్రకటన చేసిన నేపథ్యంలో కేంద్ర ప్రత్యక్ష పన్నుల బోర్డు సీబీడీటీ అంతర్గతంగా ఓ కమిటీని ఏర్పాటు చేసింది. ఆ కమిటీ నివేదిక ఆధారంగా కొత్త ఆదాయపు పన్ను చట్టంలో కీలక మార్పులు చేస్తారని తెలుస్తోంది. అయితే, కొత్త చట్టంపై ప్రభుత్వం నుంచి అధికారిక ప్రకటన రాలేదు. అయితే, సుమారు 6,500 మంది నిపుణుల సలహాలు, సూచనల ఆధారంగా కొత్త చట్టాన్ని రూపొందిస్తున్నట్లు తెలుస్తోంది.

మరోవైపు పార్లమెంట్ సమావేశాలు దగ్గర పడుతున్న క్రమంలో బడ్జెట్ పనుల్లో ఆర్థిక శాఖ బిజీగా ఉంది. ఫిబ్రవరి 1వ తేదీన ఆర్థిక మంత్రి నిర్మలా సీతారామన్ వచ్చే ఆర్థిక సంవత్సరం 2025-26కు సంబంధించిన బడ్జెట్ ప్రవేశపెడతారు. అంతకు ముందు రోజే ఆర్థిక సర్వేను పార్లమెంటు ముందుకు తీసుకొస్తారు.