విధ్వంసకర వీరులతో ఇంగ్లాండ్‌.. భారత్‌తో తొలి టీ20కి తుది జట్టు ప్రకటన

భారత్‌-ఇంగ్లాండ్ జట్ల మధ్య టీ20 సిరీస్‌కు సమయం ఆసన్నమైంది. బుధవారం.. కోల్‌కతాలోని ఈడెన్ గార్డెన్స్ వేదికగా తొలి టీ20 మ్యాచ్‌ జరగనుంది. ఐదు మ్యాచ్‌ల టీ20 సిరీస్‌లో భాగంగా తొలిమ్యాచ్‌లో గెలిచి.. బోణీ కొట్టాలని ఇరు జట్లూ భావిస్తున్నాయి. ఇందులో భాగంగా ముమ్మరంగా సాధన చేస్తున్నాయి. అయితే మ్యాచ్‌కు ముందు రోజే తుది జట్టును ప్రకటించిన అలవాటుగా చేసుకున్న ఇంగ్లాండ్ క్రికెట్ బోర్డు.. మరోసారి అదే చేసింది. భారత్‌తో జరిగే తొలి టీ20కి ఒకరోజు ముందుగానే తమ తుది జట్టును ప్రకటించింది.

తన అంతర్జాతీయ కెరీర్‌లో మూడు టీ20లు ఆడిన ఫాస్ట్‌బౌలర్ గస్ అట్కిన్సన్‌ను ఏడాది తర్వాత టీ20 తుది జట్టులోకి తీసుకుంది. ఆదిల్ రషీద్‌ను ఏకైక స్పెషలిస్ట్‌ స్పిన్నర్‌గా చోటు కల్పించింది. ఇక పిచ్ స్పిన్నర్లకు అనుకూలిస్తుందనే అంచనాల మధ్య మరో ఇద్దరు పార్ట్‌టైమ్ స్పిన్నర్లు లియామ్‌ లివింగ్‌స్టన్, జాకబ్ బేతల్‌లను కూడా ఎంపిక చేసింది. ఇక మ్యాచ్ ప్రారంభానికి ఒక రోజు ముందు ఇంగ్లాండ్ క్రికెట్ బోర్డు అనూహ్య నిర్ణయం తీసుకుంది. పరిమిత ఓవర్ల జట్టు వైస్‌ కెప్టెన్‌గా యంగ్ బ్యాటర్ హ్యారీ బ్రూక్‌కు బాధ్యతలు అప్పగించింది.

ఇక ఈ సిరీస్‌కు ముందు భారత్ చివరగా దక్షిణాఫ్రికాతో టీ20 సిరీస్ ఆడింది. నాలుగు మ్యాచ్‌ల సిరీస్‌ను 3-1తో కైవసం చేసుకుంది. ఇంగ్లాండ్‌ కూడా తమ చివరి టీ20 సిరీస్‌ను సొంతం చేసుకుంది. వెస్టిండీస్‌ను 3-1తో ఓడించింది.

భారత్‌తో జరిగే తొలి టీ20కి ఇంగ్లాండ్ తుది జట్టు:

బెన్ డకెట్, ఫిల్ సాల్ట్ (వికెట్ కీపర్), జోస్ బట్లర్ (కెప్టెన్), హ్యారీ బ్రూక్, లియామ్ లివింగ్‌స్టోన్, జాకబ్ బెథెల్, జేమీ ఓవర్టన్, గస్ అట్కిన్సన్, జోఫ్రా ఆర్చర్, ఆదిల్ రషీద్, మార్క్ వుడ్.

ఇంగ్లాండ్‌తో టీ20 సిరీస్‌కు భారత జట్టు:

సూర్యకుమార్ యాదవ్ (కెప్టెన్), అభిషేక్ శర్మ, సంజూ శాంసన్ (వికెట్ కీపర్‌), తిలక్ వర్మ, హార్దిక్ పాండ్యా, నితీశ్ కుమార్ రెడ్డి, రింకూ సింగ్, అక్షర్‌ పటేల్‌ (వైస్‌ కెప్టెన్), మహమ్మద్ షమీ, హర్షిత్ రాణా, వాషింగ్టన్ సుందర్‌, అర్షదీప్ సింగ్‌,రవి బిష్ణోయ్‌, వరుణ్ చక్రవర్తి, ధ్రువ్‌ జురెల్‌ (వికెట్ కీపర్‌)