ప్రపంచ వ్యాప్తంగా చాట్‌జీపీటీ డౌన్.. వినియోగదారుల ఆందోళన

ప్రపంచ వ్యాప్తంగా చాట్‌ జీపీటీ సేవల్లో అంతరాయం ఏర్పడినట్లు పెద్ద ఎత్తున వార్తలు వస్తున్నాయి. అన్ని దేశాల నుంచి వేలాది మంది వినియోగదారులు చాట్‌ జీపీటీ సేవలను యాక్సెస్ చేయలేకపోతున్నట్లు సోషల్ మీడియా వేదికగా పోస్టులు పెడుతున్నారు. గురువారం రోజు ఉదయం 9.19 నుంచి చాట్‌ జీపీటీ సర్వర్ డౌన్ అయిందని.. దాని వల్లే తాము సేవలను వినియోగించుకోలేక పోతున్నట్లు వివరించారు. ఈ పోస్టులు చూసిన ఓపెన్ ఏఐ సంస్థ స్పందించింది. సమస్యలను తీర్చి.. సేవలను పునరుద్ధరించడానికి చర్యలు చేపట్టినట్లు వివరించింది. ఆ పూర్తి విషయాలు మీకోసం.

రోజులాగే చాట్‌జీపీటీ సేవలను ఉపయోగించుకునే వినియోగదారులు ఈరోజు కూడా చాట్ బాట్లలో తమకు కావాల్సిన విషయాలను తెలుసుకునేందుకు ప్రయత్నించారు. కానీ చాట్‌ జీపీటీ సేవలను యాక్సెస్ చేయలేకపోయారు. తమకు మాత్రమే ఇలా జరుగుతుందే అనుకుని వేరే వాళ్ల ద్వారా యాక్సెస్ చేయించగా.. అక్కడ కూడా ఇదే సమస్య వచ్చింది. దీంతో విషయం గుర్తించిన పలువురు వినియోగదారులు సోషల్ మీడియా వేదికగా చాట్‌ జీపీటీ సర్వర్ డౌన్ అయినట్లు వివరించారు.

ముఖ్యంగా ఉదయం 9.19 నుంచి చాట్‌ జీపీటీ సేవల్లో అంతరాయం ఏర్పడిందని.. ప్రపంచ వ్యాప్తంగా ఈ సమస్య ఉందని చెప్పారు. వేలాది మంది వినియోగదారులు దీనిపై సామాజిక మాధ్యమాల్లో పోస్టులు పెట్టారు. ఇలా ఉదయం 10 గంటల సమయం వరకు 1400 మంది వినియోగదారులు డౌన్‌డిక్టేటర్ వంటి ప్లాట్‌ఫామ్‌లపై చాట్ బాట్లలో ఇబ్బందులపై ఫిర్యాదు చేశారు. ఇందులో ఎక్కువగా చాట్ జీపీటీకీ సంబంధించినవే ఉండడం గమనార్హం.

అయితే వీరందరి ఫిర్యాదులను చూసిన సదరు సంస్థ.. ఏఐ మోడల్‌లో సమస్యలు తెలెత్తిన విషయాన్ని అంగీకరించింది. అదే సమయంలో ఏపీఐ, సోరలో కూడా ఇలాంటి పరిస్థితే ఉందని తెలిపింది. ముఖ్యంగా ఈ సమస్యలు ఉన్నట్లు 9.58కి గుర్తించగా.. వెంటనే రికవరీ చర్యలను చేపట్టినట్లు స్పష్టం చేసింది. ఈక్రమంలోనే ఉదయం 10.14 వరకే సర్వర్ డౌన్ పరిస్థితిని కాస్త మెరుగు పరిచినట్లు వెల్లడించింది. అలాగే ఏపీఐ, సోర కూడా పూర్తిగా మెరుగైనట్లు ప్రకటించింది. కానీ సర్వర్ డౌన్ అవ్వడానికి గల కారణాలను మాత్రం సంస్థ వివరించలేదు.

అయితే ప్రపంచ వ్యాప్తంగా చాలా కార్యకలాపాలకు చాట్ జీపీటీ సేవలు కీలకం కాగా.. ఒక్కసారిగా వినియోగదారులంతా తీవ్ర ఆందోళనకు గురయ్యారు. ఈక్రమంలోనే తాము ఎదుర్కుంటున్న సమస్యలు చెబుతూ పోస్టులు పెట్టారు. సదరు సంస్థ త్వరగా స్పందించి పరిష్కారం చూపించగా.. హర్షం వ్యక్తం చేస్తున్నారు. అలాగే సేవలను త్వరగా పూర్తి సాధారణ స్థితికి తీసుకు రావాలంటూ వివరిస్తున్నారు. చూడాలి మరి ఎప్పటి లోపు సంస్థ.. చాట్ జీపీటీ సేవలను పూర్తిగా అందుబాటులోకి తీసుకు వస్తుందనేది.