ఢిల్లీలో "మినీ కేజ్రీవాల్".. అందరి దృష్టిని ఆకర్షించిన 4 ఏళ్ల బుడ్డోడు

ఢిల్లీ అసెంబ్లీ ఎన్నికల్లో బీజేపీ ఘన విజయం సాధించి.. 27 ఏళ్ల తర్వాత తిరిగి ఢిల్లీ పీఠాన్ని దక్కించుకుంది. ఇక 2013 నుంచి ఇప్పటివరకు జరిగిన ప్రతీ ఎన్నికల్లో గెలిచి అధికారాన్ని దక్కించుకున్న ఆమ్ ఆద్మీ పార్టీ ఈసారి ఘోర పరాభవాన్ని మూటగట్టుకుంది. అయితే ఢిల్లీ అసెంబ్లీ ఎన్నికల ఫలితాలకు ముందు.. ఢిల్లీలో మినీ కేజ్రీవాల్ సందడి చేశారు. ఓట్ల లెక్కింపుకు ముందు ఈ మినీ కేజ్రీవాల్ అందరి దృష్టిని ఆకర్షించాడు. 4 ఏళ్ల అవ్యాన్.. అచ్చం అరవింద్ కేజ్రీవాల్ లాగా తయారై వచ్చి అందరి చూపును తనవైపు తిప్పుకున్నాడు. అయితే ఇలా అరవింద్ కేజ్రీవాల్ వేషం వేయడం ఇదే తొలిసారి కాదని.. గతంలోనూ పలుమార్లు అచ్చం కేజ్రీవాల్ లాగా తయారై వచ్చినట్లు అవ్యాన్, అతని తండ్రి వెల్లడించారు.

ఆమ్ ఆద్మీ పార్టీ నేషనల్ కన్వీనర్ అరవింద్ కేజ్రీవాల్‌కు ఫ్యాన్ అయిన అవ్యాన్ తోమర్.. ఢిల్లీ అసెంబ్లీ ఎన్నికల కౌంటింగ్‌కు ముందు రోజు ఆయన ఇంటికి వెళ్లారు. అయితే సాధారణంగా వెళ్లకుండా.. మొత్తం కేజ్రీవాల్ లాగే వేషం వేసుకుని.. కేజ్రీవాల్ ఇంటికి వెళ్లాడు. కేజ్రీవాల్ ఎప్పుడూ ధరించే బ్లూ కలర్ స్వెటర్, వైట్ కాలర్, గ్రీన్ పఫ్ జాకెట్ వేసుకున్న అవ్యాన్ తోమర్.. తన తండ్రి రాహుల్ తోమర్‌తో కలిసి కేజ్రీవాల్ ఇంటికి చేరుకున్నారు. అచ్చం కేజ్రీవాల్‌ లాగా కనిపించిన అవ్యాన్‌ తోమర్‌ను చూసి అక్కడ ఉన్న వారందరూ ఆశ్చర్యంలో మునిగిపోయారు.

అంతేకాకుండా మెడకు నల్లని మఫ్లర్ కూడా అవ్యాన్ కట్టుకుని కనిపించాడు. కేజ్రీవాల్ వలె కళ్లకు అద్దాలు పెట్టుకుని.. మీసాలు కూడా పెట్టుకుని రావడంతో అంతా మినీ కేజ్రీవాల్ అని పిలుస్తున్నారు. అయితే అవ్యాన్‌ తోమర్ ఇలా.. కేజ్రీవాల్ వేషధారణలో కనిపించడం ఇదేం తొలిసారి కాదని అతడి తండ్రి రాహుల్ తోమర్ వెల్లడించారు. ర్రతీ ఎన్నికల ఫలితాల వేళ తాము ఇక్కడికి వస్తామని వివరించారు. ఇక అవ్యాన్‌ తోమర్‌కు ‘బేబీ మఫ్లర్ మ్యాన్’ అని ఆమ్ ఆద్మీ పార్టీ పేరు కూడా పెట్టడం గమనార్హం.

గతంలో 2022 ఢిల్లీ స్థానిక సంస్థల ఎన్నికల ఫలితాల సందర్భంగా కూడా అవ్యా్న్ తోమర్.. ఇలా అందరి దృష్టినీ ఆకర్షించాడు. ఆ ఎన్నికల్లో ఆప్ గెలిచిన తర్వాత తోటి చిన్నారులతో కలిసి అవ్యాన్ సంబరాలు జరుపుకున్నాడు. 4 ఏళ్ల అవ్యాన్ తోమర్.. విక్టరీ సింబల్ చూపిస్తున్న ఫొటో సోషల్ మీడియాలో ప్రస్తుతం తెగ వైరల్ అవుతోంది.