ఛత్తీస్గఢ్లో భారీ ఎన్కౌంటర్.. 12 మంది నక్సల్స్ హతం
national | Suryaa Desk | Published : Sun, Feb 09, 2025, 07:50 PM
వరుస ఎన్కౌంటర్లతో ఛత్తీస్గఢ్ అటవీ ప్రాంతాలు దద్దరిల్లిపోతున్నాయి. గత కొన్ని నెలలుగా వరుసగా ఆయా ప్రాంతాల్లో ఏదో ఒక చోట ఎన్కౌంటర్లు జరుగుతున్నాయి. తాజాగా బీజాపూర్ జిల్లాలో జరిగిన ఎన్కౌంటర్లో 12 మంది నక్సల్స్ మృతి చెందారు. ఈ ఘటనలో మరికొందరు మావోయిస్టులకు గాయాలు అయ్యాయని తెలుస్తోంది. బీజాపూర్ జిల్లాలోని నేషనల్ పార్క్ వద్ద మావోయిస్టులు, భద్రతా బలగాల మధ్య ఎదురుకాల్పులు చోటు చేసుకున్నాయి.
ఈ క్రమంలోనే డీఆర్జీ (డిస్ట్రిక్ రిజర్వ్ గార్డ్), ఎస్టీఎఫ్ (స్పెషల్ టాస్క్ ఫోర్స్) టీమ్స్ ఆ ప్రాంతంలో గాలింపు చేపట్టాయి. మరోవైపు.. ఇంకా నక్సల్స్, భద్రతా బలగాల మధ్య కాల్పులు జరుగుతూనే ఉన్నాయి. ఈ ఘటన తర్వాత గాయపడిన మావోయిస్టులను పట్టుకునేందుకు.. మిగిలిన నక్సల్స్ జాడ కోసం ఆ ప్రాంతం మొత్తం భద్రతా బలగాలు తీవ్రంగా గాలింపు చేపట్టాయి. ఈ ఘటనలో మృతుల సంఖ్య భారీగా పెరిగే అవకాశాలు కనిపిస్తున్నాయి. అయితే ఈ ఎన్కౌంటర్ గురించి భద్రతా అధికారులు ఇంకా ఎలాంటి అధికారిక ప్రకటన చేయలేదు. గాయపడిన వారి సంఖ్య కూడా ఎక్కువగానే ఉన్నట్లు తెలుస్తోంది.
దేశంలో నక్సల్స్ జాడ లేకుండా చేస్తామని.. కేంద్ర హోం శాఖ మంత్రి అమిత్ షా ఇప్పటికే తేల్చి చెప్పగా.. అప్పటినుంచి మావోయిస్టుల ఏరివేత ప్రక్రియను భద్రతా బలగాలు ముమ్మరం చేశాయి. ఈ నేపథ్యంలోనే ఛత్తీస్గఢ్లోని బీజాపూర్, నారాయణ్పూర్, బస్తర్ సహా పలు నక్సల్స్ హవా ఉన్న జిల్లాల్లో భద్రతా బలగాలు, పోలీసుల ఆపరేషన్లు పెరిగాయి. ఈ క్రమంలోనే భద్రతా బలగాలు, నక్సల్స్ ఎదురుపడగానే కాల్పులు చోటు చేసుకుంటున్నాయి. ఈ ఎన్కౌంటర్లలో భారీగా నక్సల్స్ మృతి చెందుతున్నారు. గత కొన్ని నెలలుగా పదుల సంఖ్యలో మావోయిస్టులు ప్రాణాలు కోల్పోయారు.
ఇక ఇటీవలె మావోయిస్టులకు పెద్ద ఎదురుదెబ్బ తగిలింది. ఛత్తీస్గఢ్-ఒడిశా సరిహద్దులోని గరియాబంద్, నౌపాడ జిల్లాల్లో భద్రతా బలగాలు, నక్సల్స్కు జరిగిన ఎదురుకాల్పుల్లో 20 మందికిపైగా మావోయిస్టులు మరణించారు. ఈ ఘటనలో మరో మావోయిస్టు అగ్రనేత కూడా చనిపోయినట్లు తెలిసింది.
|
|