ఆ మూడు గుణాల వల్లే బీజపీ కేజ్రీవాల్‌తో పోటీలోకి దింపింది: పర్వేశ్ భార్య

దేశ రాజధాని ఢిల్లీ అసెంబ్లీ ఎన్నికల్లో బీజేపీ ఘన విజయం సాధించగా.. ఆమ్ ఆద్మీ పార్టీ ఘోర పరాజయం పాలైంది. ముఖ్యంగా ఆప్ అధినేత, ఢిల్లీ మాజీ ముఖ్యమంత్రి అరవింద్ కేజ్రీవాల్‌ను ఓడించి మరీ బీజేపీ అభ్యర్థి పర్వేశ్ వర్మ విజయం సాధించారు. అయితే కేజ్రీవాల్‌పై పోటీకి.. బేజీపీ పర్వేశ్ వర్మనే ఎందుకు బరిలోకి దింపిందనే దానిపై ఆయన భార్య స్వాతి సింగ్ వర్మ స్పందించారు. ముఖ్యంగా తన భర్తలో ఉన్న ఆ మూడు గుణాల వల్లే బీజేపీ ఆయనను కేజ్రీవాల్ పోటీలోకి దింపిందని.. అందువల్లే ఆయన విజయం సాధించారని చెప్పుకొచ్చారు. ఆ పూర్తి వివరాలు మీకోసం.

ఆ మూడు గుణాల వల్లే..!

దేశ రాజధాని ఢిల్లీ అసెంబ్లీ ఎన్నికల్లో గెలిచిన బీజేపీ పెద్ద ఎత్తున సంబురాలు చేసుకుంటోంది. మాజీ ముఖ్యమంత్రి, ఆప్ అధినేత అరవింద్ కేజ్రీవాల్‌ను బీజేపీ అభ్యర్థి పర్వేశ్ వర్మ ఓడించారు. అయితే బీజేపీ.. పర్వేశ్ వర్మనే న్యూఢిల్లీ స్థానంలో బరిలోకి దింపడానికి తన భర్తలో ఉన్న ఆ మూడు గుణాలే కారణం అని పర్వేశ్ వర్మ భార్య స్వాతి సింగ్ వర్మ తెలిపారు. ముఖ్యంగా కష్టపడి పని చేసే స్వభావం, ఏదైనా నిర్ణయించుకుంటే దాన్ని పూర్తి చేసే నైజాం, అవినీతి రహితంగా పని చేయడం వల్లే తన భర్త గెలిచాడని చెప్పుకొచ్చారు.

గెలవడమే కాదు.. అభ్యర్థుల జాబితాలో ముఖ్యంగా కేజ్రీవాల్‌పై పోటీకి జాబితాలో బీజేపీ ఆయన చేర్చిందని స్వాతి సింగ్ వర్మ వెల్లడించారు. ఆ మూడు గుణాలే పర్వేశ్ వర్మను ఇతర రాజకీయ నాయకులు నుంచి భిన్నంగా ఉంచాయని పేర్కొన్నారు. ఢిల్లీ ప్రజల మార్పుతో పాటు వేరే ప్రభుత్వాన్ని కోరుకున్నారని స్పష్టం చేశారు. గత 11 సంవత్సరాలుగా తప్పుడు వాగ్దానాలు, తప్పుడు కథనాలతో ఢిల్లీ ప్రజలంతా మోసపోయారని చెప్పారు. కానీ వారు మార్పును కోరుకుని.. ఢిల్లీని అభివృద్ధి పథంలో చూడడానికి సరైన ప్రభుత్వాన్ని ఎంచుకున్నారని స్పష్టం చేశారు.

కేజ్రీవాల్‌పై బరిలోకి దిగి విజయం సాధించిన పర్వేశ్ వర్మ ముఖ్యమంత్రి రేసులో కూడా ఉన్నారు. ఇదే విషయమై ఆయన్ను అడగ్గా.. ముఖ్యమంత్రి ఎవరనేది అధిష్టానమే నిర్ణయిస్తుందని తెలిపారు. మార్పును కోరుకుంటూ బీజేపీపై విశ్వాసం ఉంచి గెలిపించిన ఢిల్లీ ప్రజలకు ధన్యవాదాలు తెలిపారు. ప్రధాని మోదీతో కలిసి డబుల్ ఇంజిన్ ప్రభుత్వాన్ని ఏర్పాటు చేస్తామన్నారు. చూడాలి మరి పర్వేశ్ వర్మకు బీజేపీ ముఖ్యమంత్రి పదవి కట్టబెడుతుందా లేదా అనేది.