బీర్ టిన్లపై గాంధీజీ బొమ్మ.. రష్యాకు చెందిన రీవోర్ట్స్‌ కంపెనీ తయారి

మద్యం, మాంసం ముట్టకూడదు అనేది జాతిపిత మహాత్మా గాంధీ సూచన. అంతేకాకుండా మద్యపాన నిషేధం కోసం ఆయన ఎన్నో పోరాటాలు కూడా చేశారు. అలాంటి గొప్ప వ్యక్తికి అదే మద్యం విషయంలో అవమానం చోటు చేసుకుంది. దేశానికి స్వాతంత్య్రం తీసుకువచ్చినందుకు గుర్తుగా.. గాంధీజీ విగ్రహాలను దేశంలోని ప్రతీ గ్రామంలో ఏర్పాటు చేశారు. అంతేకాకుండా మనం నిత్యం వాడే కరెన్సీ నోట్లపై గాంధీజీ ఫోటోను ముద్రిస్తున్నారు. అలాంటిది.. ఏకంగా బీరు టిన్లపై మహాత్మా గాంధీ ఫోటోలను ప్రింట్ చేస్తోంది ఓ కంపెనీ. ఆ కంపెనీ తాము తయారు చేసే బీర్లపై గాంధీజీ బొమ్మలతోపాటు ఆయన పేరు, సంతకాన్ని కూడా ముద్రించి అమ్ముతోంది. వీటికి సంబంధించిన ఫోటోలు సోషల్ మీడియాలో వైరల్ అవుతుండటంతో నెటిజన్ల నుంచి తీవ్ర ఆగ్రహావేశాలు వ్యక్తం అవుతున్నాయి. రష్యాకు చెందిన రీవోర్ట్స్ కంపెనీ ఈ బీర్లను తయారు చేస్తున్నట్లు తెలుస్తోంది.

రష్యాకు చెందిన రీవోర్ట్స్‌ కంపెనీ హాజీ ఐపీఏ పేరుతో బీర్ టిన్లను విక్రయిస్తోంది. ఆ బీర్ టిన్లపై మహాత్మాగాంధీ ఫొటోను.. ఆయన సంతకాన్ని పేరును కూడా ముద్రించి అమ్ముతుండటం ఇప్పుడు తీవ్ర దుమారం రేపుతోంది. దీనిపై భారతీయులు తీవ్ర ఆగ్రహం వ్యక్తం చేస్తున్నారు. దేశ జాతిపిత అయిన గొప్ప నాయకుడిని ఇలా అవమానించేలా ఆయన ఫొటోను బీర్ టిన్లపై ముద్రించడాన్ని తీవ్రంగా వ్యతిరేకిస్తున్నారు. జీవితాంతం శాఖాహారిగా.. మద్యపానం ముట్టని వ్యక్తిగా ఉన్న గాంధీజీ ఫొటోను బీర్‌ టిన్లపై ఎలా ముద్రిస్తారంటూ నెటిజన్లు కూడా ఆ ఫోటోలు, వీడియోలపై ఆగ్రహం వ్యక్తం చేస్తున్నారు.

2018లో ఈ ఐపీఏ బీర్ ఫిఫా వరల్డ్‌ కప్ క్వార్టర్ ఫైనల్స్‌లో హైలెట్‌గా నిలిచింది. రష్యాలోని నిజ్నీ నొవ్‌గోరోడ్‌లోని ఒక బార్‌లో ఫుట్‌బాల్ ఫ్యాన్స్ బీర్ తాగుతుండగా.. దానిపై గాంధీజీ బొమ్మ ఉండటంతో వారు ఫోటో, వీడియో తీసి సోషల్ మీడియాలో పెట్టడంతో వైరల్‌ అవుతోంది. ఆ రీవోర్ట్స్ కంపెనీ కేవలం గాంధీజీని మాత్రమే కాకుండా ప్రపంచవ్యాప్తంగా గొప్ప వ్యక్తులుగా కీర్తించిన వారి పేర్లు, ఫోటోలను కూడా బీర్లపై ప్రింట్ చేసి విక్రయిస్తోంది.

మదర్ థెరిసా, నెల్సన్ మండేలా, మార్టిన్ లూథర్ కింగ్ పేర్లతో కూడా రివోర్ట్‌ కంపెనీ బీర్లను ఉత్పత్తి చేసినట్లు తెలుస్తోంది. అయితే మహాత్మా గాంధీ ఫొటోతో ఉన్న బీర్లు గతంలో కూడా వెలుగులోకి వచ్చాయి. 10 ఏళ్ల క్రితం ఓ అమెరికా కంపెనీ కూడా ఇలాగే గాంధీజీ ఫొటోను బీర్‌ బాటిల్‌పై ముద్రించగా.. దానిపై హైదరాబాద్ కోర్టులో పిటిషన్ దాఖలు అయింది. దీంతో ఆ కంపెనీ స్పందించి క్షమాపణలు చెప్పడంతో ఆ వివాదం ముగిసిపోయింది.