ఆర్ధరాత్రి వేళ కారులో నుంచి కేకలు.. పోలీసులు వాహనం ఆపగానే

గుంటూరు జిల్లా తెనాలిలో యువకుడి కిడ్నాప్ వ్యవహారం కలకలం రేపింది. బాధితుడు చెప్తున్న వివరాల ప్రకారం.. తెనాలిలోని సుల్తానాబాద్‌కు చెందిన మణిదీప్‌ హైదరాబాద్‌లో వ్యాపారం చేసేవాడు. ఆ సమయంలో మణిదీప్ వద్ద కాకినాడ జిల్లా పెద్దాపురానికి చెందిన సతీష్ అనే యువకుడు పనిచేశాడు. అయితే పనిచేసినందుకు గానూ సతీష్‌కు మణిదీప్ రెండు నెలల జీతం చెల్లించాల్సి ఉంది. ఈ డబ్బుల కోసం సతీష్.. మణిదీప్‌కు పలుసార్లు ఫోన్ కూడా చేశాడు. అయితే తర్వాత చూద్దాం అంటూ కాలం గడిపిన మణిదీప్.. చివరకు నీ డబ్బులు నీకు ఇస్తానంటూ విజయవాడకు రమ్మన్నాడు. దీంతో నిజంగానే డబ్బులు ఇస్తాడనే ఆశతో సతీష్ పెద్దాపురం నుంచి బయల్దేరి శుక్రవారం సాయంత్రానికి విజయవాడకు చేరుకున్నాడు.

అయితే సతీష్‌ను డబ్బులిస్తానని రమ్మన్నాడే కానీ.. మణిదీప్ మదిలో మరో ఆలోచన ఉంది. సతీష్ విజయవాడ చేరుకున్నాడని తెలియగానే తన మదిలోని ప్లాన్ అమలు చేయడం ప్రారంభించాడు మణిదీప్. సతీష్‌ విజయవాడ వచ్చిన తర్వాత మణిదీప్, మరో నలుగురి సాయంతో అతణ్ని కిడ్నాప్ చేశారు. సతీష్‌ను కారులో బలవంతంగా ఎక్కించుకుని తెనాలిలోని సుల్తానాబాద్‌కు తీసుకెళ్లారు. అక్కడ ఒక ఇంట్లో సతీష్‌ను బంధించారు. కారులో వెళ్తున్న సమయంలో సతీష్ మీద దాడి చేసిన మణిదీప్, అతని అనుచరులు.. గదిలో బంధించిన తర్వాత అతనికి కరెంట్ షాక్‌ ఇచ్చారు. ఆ తర్వాత అర్ధరాత్రి సమయంలో సతీష్‌ను కారులో ఎక్కించుకుని బయల్దేరారు.

అయితే వీరు ప్రయాణిస్తున్న కారు తెనాలి-గుంటూరు వంతెనపైకి రాగానే.. వీరికి ఎదురుగా పోలీస్ వాహనం వచ్చింది. దీంతో పోలీసు జీప్ చూసిన బాధితుడు సతీష్.. కారులో నుంచి గట్టిగా కేకలు వేశాడు. దీంతో పోలీసులు కారును ఆపారు. ఆ వెంటనే కారులో ఉన్న సతీష్ అందులో నుంచి బయటకు దూకి పోలీసులకు తనను కిడ్నాప్ చేసి చిత్రహింసలు పెడుతున్న విషయం వివరించారు. అయితే పోలీసులు కారు ఆపగానే అందులోని కొంతమంది పరారైనట్లు తెలిసింది. మరికొందరిని పోలీసులు అదుపులోకి తీసుకున్నట్లు సమాచారం. మొత్తంగా బాకీపడ్డ బకాయి చెల్లిస్తానంటూ గదిలో బంధించి చిత్రహింసలు పెట్టడం స్థానికంగా కలకలం రేపుతోంది.