8 వికెట్ల తేడాతో,,,డబ్ల్యూపీఎల్ 2025లో ఆర్సీబీ రెండో విజయం

మహిళల ప్రీమియర్ లీగ్‌ 2025 డిఫెండింగ్ ఛాంపియన్ రాయల్ ఛాలెంజర్స్ బెంగళూరు జైత్ర యాత్ర కొనసాగుతోంది. ఈ టోర్నీ తొలి మ్యాచ్‌లో టోర్నీ చరిత్రలోనే అత్యధిక స్కోరును ఛేజ్ చేసి.. విజయం సాధించిన ఆర్సీబీ.. రెండో మ్యాచ్‌లోనూ ఘన విజయం సాధించింది. డబ్ల్యూపీఎల్ 2024లో రన్నరప్‌గా నిలిచిన ఢిల్లీ క్యాపిటల్స్ జట్టును మరోసారి ఓడించింది. సోమవారం వడోదర వేదికగా జరిగిన మ్యాచ్‌లో 8 వికెట్ల తేడాతో చిత్తు చేసింది.

ఈ మ్యాచ్‌లో టాస్ గెలిచిన రాయల్ ఛాలెంజర్స్ బెంగళూరు కెప్టెన్ స్మృతి మంధాన తొలుత బౌలింగ్ ఎంచుకుని.. ఢిల్లీకి బౌలింగ్ అప్పగించింది. అయితే ఢిల్లీ బ్యాటర్లు పవర్‌ప్లేలో జోరు కొనసాగించారు. దీంతో 6.4 ఓవర్లలో ఆ జట్టు 60/1తో నిలిచింది. దీంతో ఈ మ్యాచ్‌లోనూ భారీ స్కోరు నమోదవుతుందని అంతా భావించారు. కానీ ఆ తర్వాత ఆర్సీబీ బౌలర్లు పుంజుకున్నారు. వరుసగా వికెట్లు తీసి.. ఢిల్లీని కట్టడి చేశారు.

దీంతో ఢిల్లీ క్యాపిటల్స్ జట్టు 19.3 ఓవర్లలోనే 141 రన్స్‌కి ఆలౌట్ అయింది. ఆర్సీబీ బౌలర్లలో రేణుకా సింగ్, జార్జియా వరేహమ్ మూడేసి వికెట్ల చొప్పున పడగొట్టారు. కిమ్ గార్త్, ఏక్తా బిస్త్‌ రెండేసి వికెట్లు తీశారు. అనంతరం 142 పరుగుల లక్ష్యంతో బరిలోకి దిగిన ఆర్సీబీ ఓపెనర్లు భారీ షాట్లతో విరుచుకుబడ్డారు. సరిగ్గా 10 ఓవర్లలో జట్టు స్కోరును 100 పరుగుల మార్కును ధాటించి జట్టుకు విజయాన్ని ఖరారు చేశారు. ఆ తర్వాత వ్యాట్ హాడ్జ్ (42) ఔట్ అయినా.. స్మృతి మంధాన మాత్రం జోరు కొనసాగించింది. 27 బంతుల్లోనే హాఫ్ సెంచరీ చేసింది. విజయానికి మరో 9 పరుగులు అవసరమైన దశలో ఆమె క్యాచ్ ఔట్ అయింది. 47 బంతుల్లో 81 రన్స్ చేసి.. కెప్టెన్ ఇన్నింగ్స్ ఆడింది. ఇక మిగిలిన లాంఛనాన్ని ఎలీసా పెర్రీ, రిచా ఘోష్ పూర్తి చేశారు. దీంతో 16.2 ఓవర్లలోనే ఆర్సీబీ విజయం సాధించింది.

ఈ విజయంతో రాయల్ ఛాలెంజర్స్ బెంగళూరు జట్టు పాయింట్ల పట్టికలో అగ్రస్థానాన్ని పదిలం చేసుకుంది. ఆడిన రెండు మ్యాచ్‌లలోనూ గెలిచి.. 4 పాయింట్లు.. +0.869 నెట్‌రన్‌రేట్‌తో అగ్రస్థానంలో నిలిచింది. ఆర్సీబీ తన తర్వాతి మ్యాచ్‌లో ఈనెల 21న ముంబై ఇండియన్స్‌తో తలపడనుంది.