కర్నూలు జిల్లాకు సంజీవయ్య పేరు పెట్టాలి
Andhra Pradesh Telugu | Suryaa Desk | Published : Wed, Feb 19, 2025, 11:52 AM
జాతిశ్రేయస్సు కోసం జీవితాన్ని అంకితం చేసిన నిరాడంబర, మాజీ సీఎం దామోదరం సంజీవయ్య పేరును కర్నూలు జిల్లాకు నామకరణం చేయాలని సీపీఐ రాష్ట్ర కార్యదర్శి రామకృష్ణ డిమాండ్ చేశారు. అదేవిధంగా హంద్రీనది ఒడ్డున సంజీవయ్య స్మారకస్థూపం, విజ్ఞానకేంద్రం ఏర్పాటు చేయాలని ఆకాంక్షించారు. మంగళవారం సంజీవయ్య స్వగ్రామం పెద్దపాడులో ఆయన నివసించిన ఇంటిని పరిశీలించారు. గ్రామస్థులతో మాట్లాడి సంజీవయ్య జీవితం గురించి తెలుసుకున్నారు. నిరుపేద దళిత కుటుంబంలో పుట్టిన ఆదర్శమూర్తి సంజీవయ్య అని కొనియాడారు. ఉమ్మడి ఆంధ్రప్రదేశ్ రాష్ట్ర ముఖ్యమంత్రిగా సంజీవయ్య రెండేళ్ల స్వల్పకాలం పదవిలో ఉన్నా వినూత్న పథకాలతో ప్రజా సంక్షేమానికి పాటుపడ్డారని తెలిపారు. పెద్దపాడు గ్రామంలో సంజీవయ్య పేరిట కమ్యూనిటీహాల్ నిర్మించాలని, జీవిత చరిత్రను పాఠ్య పుస్తకంగా తీసుకురావాలని డిమాండ్ చేశారు. 105 జయంతి నాటికి డిమాండ్లను పరిష్కరించాలని కోరుతూ సీఎం చంద్రబాబు, డిప్యూటీ సీఎం పవన్కళ్యాణ్కు లేఖ రాస్తానన్నారు. ఈ కార్యక్రమంలో రైతుసంఘం రాష్ట్ర కార్యదర్శి జగన్నాథం, నాయకులు రామకృష్ణారెడ్డి, చంద్రశేఖర్, శ్రీనివాసరావు తదితరులు పాల్గొన్నారు.
|
|