కోడి తనను తీవ్రంగా వేదిస్తుందంటూ ఆర్డీఓను ఆశ్రయించిన కేరళకు చెందిన ఓ వృద్ధుడు

కేరళలోని పతనంతిట్ట జిల్లా పల్లికల్ గ్రామానికి చెందిన రాధాకృష్ణ కురుప్ అనే వృద్ధుడికి ఓ పెద్ద కష్టమే వచ్చింది. సొంత ఇల్లు ఉన్నా తాను ఆ చోట హాయిగా పడుకోలేకపోతున్నాడు. ఇందుకు ప్రధాన కారణం పక్కింట్లో ఉన్న అనిల్ కుమార్ అనే వ్యక్తే. ఎందుకంటే అతడే ఓ కోడిని పెంచుకుంటున్నాడు. ఆ కోడి రోజూ ఉదయమే నిద్ర లేచి.. సరిగ్గా 3 గంటలకు కొక్కొరక్కో.. కొక్కరక్కో అంటూ గట్టి గట్టిగా కేకలు వేస్తుంది.

అయితే వృద్ధాప్య సమస్యలతో అనారోగ్యంతో బాధ పడుతున్న రాధాకృష్ణ కురుప్‌కు.. సాదారణంగానే నిద్ర పట్టదు. ఏ అర్ధరాత్రో, అపరాత్రో నిద్రలోకి జారుకోగా.. ఉదయమే ఆ కోడి అరుపులతో నిద్ర లేస్తున్నాడు. ఆపై ఎంత పడుకుందామన్నా నిద్ర పట్టకపోవడంతో నిద్రలేమి ఏర్పడుతోంది. అసలే వృద్ధుడు, ఆపై పలు అనారోగ్య సమస్యలతో బాధ పడుతున్న అతడికి.. నిద్ర సరిపోక మరిన్ని అనారోగ్య సమస్యలు వచ్చాయి.

దీంతో దాని టార్చర్ భరించేలని అతడు.. పక్కింట్లో ఉన్న అనిల్ కుమార్ వద్దకు వెళ్లి సమస్య గురించి చెప్పాడు. అతడు అర్థం చేసుకోవడానికి బదులుగా.. నీ నిద్ర కోసం నా కోడిని ఏం చేయమంటావంటూ గొడవకు దిగాడు. దీంతో బాగా ఆలోచించిన రాధాకృష్ణ.. కోడిపై ఫిర్యాదు చేయాలనుకున్నాడు. వెంటనే అడూర్ రెవన్యూ డివిజనల్ ఆఫీస్‌కి వెళ్లి కోడిపై ఫిర్యాదు చేశాడు. దాని వల్ల అతడు ఎదుర్కుంటున్న సమస్యలను వివరించాడు.

ఈ విషయాన్ని తీవ్రంగా పరిగణించిన ఆర్డీఓ కేసు నమోదు చేసుకుని దర్యాప్తు ప్రారంభించారు. ఈక్రమంలోనే కోడి నిజంగానే ఆయన నిద్రకు భంగం వాటిల్లేలా చాలా గట్టిగా అరుస్తున్నట్లు గుర్తించారు. దీంతో వెంటనే సమస్యను తీర్చాలని.. కోడి యజమాని అనిల్ కుమార్‌ను పిలిపించారు. ఇలా ఇద్దరినీ కూర్చోబెట్టి మాట్లాడారు.

స్వయంగా ఆర్డీఓనే ఈ సమస్యను అనిల్ కుమార్‌కు వివరించి.. కోడిని రాధాకృష్ణ ఇంటి వైపు కాకుండా పక్కవైపు ఉంచాలని పరిష్కారం చెప్పాడు. ఆవరణ పెద్దగా ఉండడం వల్ల ఆ చప్పుడు రాదాకృష్ణ చెవిన పడదని వివరించారు. అందుకు అనిల్ కుమార్ కూడా ఒప్పుకున్నారు. ఇక సమస్య తీరడంతో రాధాకృష్ణ సైతం కాస్త హాయిగా ఫీల్ అయ్యారు.