ఖతార్ ఎమిర్ అల్ థానీ అంత రిచ్... ఆస్తుల గురించి తెలిస్తే షాక్

సంపన్న దేశాల్లో ఒకటైన ఖతర్‌ పాలకుడి ఆస్తులు గురించి తెలిస్తే షాకవుతారు. ఖతర్ ఆవిర్భావం నుంచి అల్‌-థానీ కుటుంబపాలనే కొనసాగుతోంది. ప్రస్తుతం వారి వంశంలో 11 మందికి అమీర్‌ (రూలర్‌) హోదా ఉంది. పెట్రోలు, గ్యాస్ నిక్షేపాలతో తులతూగుతోన్న ఖతార్‌లో 2013 నుంచి షేక్‌ తమీమ్‌ బిన్‌ హమద్‌ అల్‌థానీ పాలనలో ఉంది. బ్లూమ్‌బర్గ్ నివేదిక ప్రకారం.. పశ్చిమాసియాలో ధనిక దేశాన్ని పాలిస్తోన్న అల్‌థానీ వంశం ఆస్తుల విలువ 335 బిలియన్‌ డాలర్లు. ఒక్క షేక్ తమీమ్ వద్దే రెండు బిలియన్ డాలర్ల ఆస్తులు ఉన్నాయి. సహజవనరులతో పాటు విదేశాల్లో పెట్టుబడులు.. వీరిని ప్రపంచంలోనే ధనిక కుటుంబాల్లో ఒకటిగా నిలిపాయి.

వారు నివాసం ఉండే దోహా రాయల్ ప్యాలెస్ విలువే ఒక బిలియన్ డాలర్లు కావడం విశేషం. బంగారు తాపడంతో కూడిన ఇంటీరియర్ డిజైన్ ఉన్న దానిని గోల్డెన్ ప్యాలెస్ అని కూడా పిలుస్తారు. మొత్తం 15 భవంతులు ఉండే ఈ ప్యాలెస్‌లో 500 కార్లను నిలిపేంత పార్కింగ్ స్థలం ఉంది. ఈ కుటుంబానికి ఒమన్‌లో వైట్‌ ప్యాలెస్, లండన్‌లో 17 బెడ్రూంలతో కూడిన విలాసవంతమైన భవనాలతో పాటు పారిస్‌, న్యూయార్క్‌లోనూ మ్యాన్షన్‌లు ఉన్నాయి. అలాగే, 400 మిలియన్ డాలర్ల విలువైన విలాసవంతమైన ఓ నౌక ఉండగా.. ఖతర్‌ అమీరి ఫ్లైట్‌ పేరిట విమానయాన సంస్థను ఈ కుటుంబం నడుపుతోంది. 1977లో ఏర్పాటుచేసిన ఈ విమానయాన సంస్థ నడిపే విమానాల్లో రాయల్ ప్యామిలీ సభ్యులు, ప్రభుత్వ అధికారులు మాత్రమే ప్రయాణిస్తుంటారు. మూడు బోయింగ్ విమానాలతో సహా మొత్తం 14 జెట్‌లు ఆ సంస్థ సొంతం.

ఇక లగ్జరీ కార్లయితే లెక్కలేదు. ఆ జాబితాలో బుగాటి, చిరాన్‌, లంబోర్గిని, రోల్స్‌ రాయిస్‌ తదితర కంపెనీలకు చెంది కార్లు ఉన్నాయి. తమీమ్ టుంబానికి చిత్రలేఖనం వంటి కళలంటే ఎంతో అభిమానం. అందుకే పెయింటిగ్స్ కోసమే కోట్లాది రూపాయలు వెచ్చిస్తుంటారు. ప్రముఖ అంతర్జాతీయ చిత్రకారులు పాల్‌ సెజాన్, మార్క్‌ రొత్కో వేసిన కళాఖండాలను వందల మిలియన్‌ డాలర్లు పోసి సొంతం చేసుకున్నారు. క్రీడా రంగంలోనూ ఇన్వెస్ట్ చేస్తున్నారు. ఖతార్ స్పోర్ట్స్‌ ఇన్వెస్ట్‌మెంట్ ను స్థాపించి, పలు దేశాల్లో పెట్టుబడులు పెట్టారు. పలు ప్రాంచైజీలు ముఖ్యంగా ఫుట్‌బాల్‌ టీమ్‌లను కొనుగోలు చేస్తుంటారు. కిందటిసారి 2022లో ఫిఫా వరల్డ్‌ కప్‌కు ఖతార్ ఆతిథ్యం ఇచ్చిన విషయం తెలిసిందే. ఖతార్ ఇన్వెస్ట్‌మెంట్ అథారిటీ ద్వారా పలు దేశాల సంస్థల్లో భారీగా పెట్టుబడులు పెడుతున్నారు. అమీర్ షేక్ తమీమ్ ఆధ్వర్యంలోనే ఈ వ్యవహారాలు జరుగుతున్నాయి.