రూ.10 వేల పొదుపుతో.. 5 ఏళ్లలోనే రూ.12 లక్షలు

ఫిక్స్‌డ్ డిపాజిట్లు సహా వివిధ సాంప్రదాయ పొదుపు పథకాల ద్వారా తక్కువ రాబడి వస్తుందని భావించే వారు, రిస్క్ తీసుకునేవారు ఈక్విటీ మార్కెట్ల వైపు చూస్తుంటారు. అయితే, కొన్ని నెలల నుంచి ఈక్విటీ మార్కెట్ల ఫలితాలు అంతంత మాత్రంగానే ఉన్నప్పటికీ సిస్టమాటిక్ ఇన్వెస్ట్‌మెంట్ ప్లాన్ ద్వారా మ్యూచువల్ ఫండ్లలో పెట్టుబడి పెట్టిన వారికి దీర్ఘకాలంలో మంచి రిటర్న్స్ వచ్చాయని చెప్పవచ్చు. అధిక రిస్క్ ఉన్నప్పటికీ హైరిటర్న్స్ కావాలనుకునే వారు స్మాల్ క్యాప్ ఫండ్లలో పెట్టుబడులు పెట్టవచ్చు. ఈ పండ్స్ స్మాల్ క్యాప్ కేటగరీ నుంచి స్టాక్స్ ఎంచుకుంటాయి. ఇందులో అతిపెద్ద 250 షేర్లు మినహాయి అన్నీ ఉంటాయి. ప్రధానంగా రూ.5 వేల కోట్ల కంటే తక్కువ మార్కెట్ విలువ గల కంపెనీల షేర్లలో పెట్టుబడులు పెడుతుంటాయి.

స్టాక్ మార్కెట్లలో స్వల్ప ఒడిదొడుకులు ఉంటేనే ఆ ప్రభావం స్మాల్ క్యాప్ ఫండ్లలో కనిపిస్తుంది. అయితే, 5-10-15 ఏళ్ల దీర్ఘకాల పెట్టుబడులపై గణనీయమైన రాబడి ఇవ్వగల సామర్థ్యం వీటికి ఉంటుంది. లార్జ్ క్యాప్, మిడ్ క్యాప్ ఫండ్ల కంటే స్మాల్ క్యాప్ ఫండ్లు మార్కెట్ల జోరు మీత ఉన్నప్పుడు అధిక రాబడిని ఇస్తాయి. స్వల్పకాల పెట్టుబడిదారులకు ఎక్కువగా నష్టాలు వస్తుంటాయి. అయితే దీర్ఘకాలంలో హైరిటర్న్స్ పొందేందుకు అవకాశం ఉంది. అలా టాటా మ్యూచువల్ ఫండ్స్‌కి చెందిన స్మాల్ క్యాప్ ఫండ్ 5 ఏళ్లలో మంచి రిటర్న్స్ ఇచ్చింది. ఆ స్కీమ్ గురించి తెలుసుకుందాం.

టాటా స్మాల్ క్యాప్ ఫండ్ రెగ్యులర్ ప్లాన్ వృద్ధి చూసుకుంటే గత ఏడాది కాలంలో నెగెటివ్ రిటర్న్స్ ఇచ్చింది. అయితే దీర్ఘకాలంలో మంచి లాభాలు అందించింది. గత మూడేళ్ల కాలంలో ఈ స్కీమ్ వార్షిక సగటు రాబడి 17 శాతానికిపైగా ఉంది. అదే గత 5 సంవత్సరాల కాలం చూస్తే వార్షిక రాబడి సగటున 25 శాతం వరకు ఉంది. ఇందులో ఐదేళ్ల క్రితం నెలకు రూ.10 వేల చొప్పున సిప్ పెట్టుబడి ప్రారంభిస్తే ఇప్పుడు ఎంతుంటుందో ఆన్‌లైన్ కాలిక్యులేటర్ ద్వారా తెలుసుకోవచ్చు. నెలకు రూ. 10 వేల చొప్పున 5 సంవత్సరాల్లో మొత్తం సిప్ పెట్టుబడి అనేది రూ.6 లక్షలు అవుతుంది. దీనిపై వడ్డీ రూపంలో రూ. 5.63 లక్షలకుపైగా అందుతుంది. అంటే మొత్తంగా చేతికి రూ. 11.63 లక్షలకుపైగా వస్తాయి. దాదాపు రూ. 6 లక్షల పెట్టుబడి రెండింతలు అయినట్లు అవుతుంది.