మూత్రంలో ఎక్కువ నురగతో పాటు కొన్ని లక్షణాలు కనిపిస్తే నిర్లక్ష్యం చేయకండి

మానవ శరీరంలో ముఖ్యమైన అవయవాల్లో మూత్రపిండాలు ఒకటి. కిడ్నీలు బాడీలో అనేక ముఖ్యమైన విధుల్ని నిర్వహిస్తాయి. రక్తాన్ని శుభ్రపర్చడం, శరీరం నుంచి టాక్సిన్లు తొలగించడం, అదనపు ద్రవాల్ని ఫిల్టర్ చేయడం లాంటి పనుల్ని కిడ్నీలు నిర్వహిస్తాయి. అంతేకాకుండా మూత్రపిండాలు రక్తపోటును నియంత్రించడంలో, ఎలక్ట్రోలైట్లను సమతుల్యం చేయడంలో, ఎర్ర రక్త కణాలను ఉత్పత్తి చేయడంలో, ఎముకలను ఆరోగ్యంగా ఉంచడంలో కూడా సహాయపడతాయి.

ఎంతో కీలకమైన కిడ్నీలను జాగ్రత్తగా చూసుకోవడం చాలా ముఖ్యం. అయితే, వేగంగా మారుతున్న జీవనశైలి, అనారోగ్యకరమైన ఆహారపు అలవాట్లు వల్ల మూత్రపిండాలు దెబ్బతినే ప్రమాదముంది. మూత్రపిండాల సంబంధిత సమస్యల్ని గుర్తించే సమయానికి జరగాల్సిన నష్టం జరిగిపోతుంది. అందుకే కొన్ని సంకేతాల్ని గుర్తించడం చాలా ముఖ్యం. మూత్రపిండాలు డ్యామేజ్ అయినప్పుడు కొన్ని లక్షణాలు కనిపిస్తాయి. వాటిని సకాలంలో గుర్తిస్తే కిడ్నీలను కాపాడుకోవచ్చు. ఆ సంకేతాలేంటో ఇక్కడ తెలుసుకుందాం.

కాళ్ళు, ముఖంలో వాపు

కాళ్ళు, ముఖంలో వాపు కనిపిస్తే నిర్లక్ష్యం చేయకండి. మూత్రపిండాలు శరీరంలో ఉన్న అదనపు నీటిని తొలగించలేనప్పుడు.. అది బాడీలో పేరుకుపోతుంది. దీంతో కాళ్ళలో వాపు, కళ్ల చుట్టూ వాపు కనిపిస్తుంది.

అధిక రక్తపోటు

మూత్రపిండాలు చెడిపోవడం వల్ల శరీరంలో అధిక రక్తపోటుకు కారణమయ్యే రసాయనాలు విడుదలవుతాయి. దీని కారణంగా యువతలో అధిక రక్తపోటు సమస్య కనిపిస్తుంది. ఏ కారణం లేకుండా హై బీపీ వస్తుంటే జాగ్రత్త పడండి.

మూత్రంలో నురగలు రావడం

మూత్రంలో కొద్దిగా నురుగు రావడం సాధారణమే. కానీ అది సాధారణం కంటే ఎక్కువగా, నిరంతరం జరుగుతుంటే, అది ప్రోటీన్ లీకేజీని సూచిస్తుంది. ఇది మూత్రపిండాలు దెబ్బతిన్నాయనడానికి సంకేతం.

మూత్రం యొక్క ముదురు రంగు

ముదురు గోధుమ రంగు మూత్రం కూడా ప్రమాద సంకేతం కావచ్చు. దీని అర్థం తీవ్రమైన మూత్రపిండ సమస్య ఉందని లేదా మూత్రంలో రక్తం ఉందని సూచిస్తుంది. అంటే మూత్రపిండాలు రక్తాన్ని ఫిల్టర్ చేయలేకపోతున్నాయని అర్థం.

రాత్రిపూట తరచుగా మూత్రవిసర్జన

సాధారణంగా తరచుగా మూత్రవిసర్జన చేయడం మధుమేహానికి సంకేతంగా పరిగణించబడుతుంది. అంతేకాకుండా రాత్రిపూట అప్పుడప్పుడు మూత్ర విసర్జన చేయడం సాధారణం. కానీ ఇది తరచుగా జరిగితే, అది మూత్రపిండాల వైఫల్యానికి ముందస్తు సంకేతం కావచ్చు.

క్రమం తప్పుకుండా వాంతులు

మూత్రపిండాల వైఫల్యం రక్తంలో విష పదార్థాల స్థాయిని పెంచడానికి కారణమవుతుంది. దీని వలన ఎటువంటి కారణం లేకుండా చాలా రోజుల పాటు వాంతులు అవుతాయి.

దురద

చికిత్సకు స్పందించని తీవ్రమైన, నిరంతర దురద తరచుగా మూత్రపిండాల వైఫల్యం కారణంగా వస్తుంది. శరీరంలో విషపదార్థాలు పేరుకుపోవడంతో ఇలా జరుగుతుంది.

మూత్రంలో రక్తస్రావం

ఇది ఎట్టి పరిస్థితుల్లోనూ సాధారణ లక్షణం కాదు. వెంటనే అలర్ట్ అవ్వాలి. ఎందుకంటే ఇది ఇన్ఫెక్షన్. మూత్రపిండాల్లో రాళ్లు లేదా మూత్రపిండాల వ్యాధిని కూడా సూచిస్తుంది. పైన పేర్కొన్న లక్షణాలు తరచుగా కనిపిస్తే వెంటనే డాక్టర్‌ని సంప్రదించి పరీక్షలు చేయించుకోవడం ఉత్తమం.