రోజుకి ఒక అరటిపండు తింటే బరువు తగ్గుతారా

అరటిపండు.. దీనిని చాలా మంది ఇష్టంగా తింటారు. అరటిపండు రుచి తియ్యగా ఉంటుంది. చిన్నా, పెద్దా తేడా లేకుండా అరటి పండును ఆస్వాదిస్తారు. అరటిపండుతో జ్యూస్, స్మూతీలు, స్వీట్స్, షేక్స్ వంటివి తయారు చేస్తారు. అరటిపండులో లెక్కలేనన్ని ఆరోగ్య ప్రయోజనాలు ఉన్నాయి. దీనిని పోషకాల పవర్ హౌస్ అంటారు. ఈ పండులో అనేక రకాల పోషకాలు ఉంటాయి. అసలు రోజుకి ఒక అరటిపండు తింటే ఏమవుతుంది? ఎప్పుడు తినాలి? శరీరానికి కలిగే ప్రయోజనాలేంటి? అనే విషయాలు ఇక్కడ తెలుసుకుందాం.

అరటిపండులోని పోషకాలు

​అరటిపండులో పోషకాలు మెండుగా ఉంటాయి. ఇందులో ఎక్కువగా పొటాషియం ఉంటుంది. ఇది అనేక రకాల దీర్ఘకాలిక వ్యాధుల నుంచి శరీరాన్ని రక్షిస్తుంది. అలాగే అరటిలో సహజ చక్కెర అధికంగా ఉంటుంది. రోజు తినడం వల్ల శరీరానికి తక్షణ శక్తి లభిస్తుంది. అంతేకాకుండా మెగ్నీషియం, విటమిన్ B6, ఫాస్పరస్ వంటి విటమిన్లు, ఖనిజాల గని. అరటిపండు తినడం వల్ల శరీరానికి ఎంతో మేలు జరుగుతుంది. ఆ మేలు ఏంటో ఇక్కడ తెలుసుకుందాం.

తక్షణశక్తిని అందిస్తుంది

అరటిపండ్లు కార్బోహైడ్రేట్లకు మంచి మూలం. ముఖ్యంగా గ్లూకోజ్, ఫ్రక్టోజ్, సుక్రోజ్ వంటి సహజ చక్కెరలు అరటిపండులో ఉంటాయి. ఇవి శరీరానికి తక్షణ శక్తిని ఇస్తాయి. ఏదైనా చిరుతిండి బదులు అరటిపండు తినడం వల్ల శరీరానికి కావాల్సినంత శక్తి అందుతుంది. ఇది ఎనర్జీ బూస్టర్‌లా పనిచేస్తుందని నిపుణులు అంటున్నారు.

చెడు కొలెస్ట్రాల్ తగ్గుతుంది

అరటిపండు తీసుకోవడం వల్ల శరీరంలోని చెడు కొలెస్ట్రాల్ స్థాయిని తగ్గించడంలో చాలా ఉపయోగకరంగా ఉంటుంది. అరటి పండులో ఫైబర్, యాంటీ ఆక్సిడెంట్లు పుష్కలంగా ఉంటాయి. ఇవి శరీరంలో చెడు కొలెస్ట్రాల్, ట్రైగ్లిజరైడ్ స్థాయిలను తగ్గించడంలో సహాయపడతాయి. ధమనులలో పేరుకుపోయిన కొవ్వును కరిగించి బయటకు పంపడంలో సహాయపడుతుంది. అరటిపండు తినడం వల్ల గుండె సంబంధిత వ్యాధుల ప్రమాదం తగ్గుతుంది.

ఎముకల బలం రెట్టింపు

అరటిపండ్లలో కాల్షియం, మెగ్నీషియం లభిస్తాయి. ఇవి ఎముకలను బలోపేతం చేయడంలో సహాయపడతాయి. దీన్ని తినడం వల్ల ఆస్టియోపోరోసిస్ వంటి వ్యాధులు వచ్చే ప్రమాదం తగ్గుతుంది. ఎముకల బలం కోసం రోజుకి కనీసం ఒక అరటిపండు తినాలంటున్నారు నిపుణులు.

మానసిక ఆరోగ్యం

అరటిపండ్లలో విటమిన్ బి6 ఉంటుంది. ఇది మెదడు పనితీరును మెరుగుపరుస్తుంది. ఇది మానసిక ఒత్తిడి, ఆందోళన, నిరాశను తగ్గించడంలో సహాయపడుతుంది. ఈ రోజుల్లో చాలా మంది వర్క్ లైఫ్‌స్టైల్ కారణంగా చాలా మంది ఒత్తిడి సమస్యలతో బాధపడుతున్నారు. అలాంటి వారికి అరటిపండు మంచి ఆప్షన్.

జీర్ణక్రియ మెరుగుపడుతుంది

అరటిపండులో ఫైబర్ పుష్కలంగా ఉంటుంది. ఇది జీర్ణవ్యవస్థను ఆరోగ్యంగా ఉంచుతుంది. ఇందులో పెక్టిన్ అనే సమ్మేళనం ఉంటుంది. ఇది కడుపు సమస్యలను తగ్గించడంలో సహాయపడుతుంది. మలబద్ధకాన్ని నివారిస్తుంది.

బరువు తగ్గవచ్చు

సాధారణంగా బరువు తగ్గాలనుకునేవారికి అరటిపండు బెస్ట్ ఆప్షన్. రోజూ అరటిపండు మితంగా తింటే బరువు తగ్గవచ్చు. ఇందులో ఫైబర్ ఎక్కువగా ఉంటుంది. దీన్ని తినడం వల్ల ఆకలి అదుపులో ఉంటుంది. కేలరీల సంఖ్య కూడా తక్కువే. అరటిపండులో సహజ తీపి ఉంటుంది. దీంతో, ఇది తినడం వల్ల సహజ తీపి తినాలనే కోరిక ఉండదు.

రోజుకి ఎన్ని, ఎప్పుడు తినాలి?

రోజు బ్రేక్ ఫాస్ట్ తర్వాత దీనిని తినడం వల్ల అనేక ఆరోగ్య ప్రయోజనాలు మీ శరీరానికి అందుతాయి. ఇక, వ్యాయామానికి ముందు అరటిపండు తినడం మంచిది. అరటిపండు తినడం వల్ల తక్షణ శక్తి వస్తుంది. రోజుకి ఒక అరటిపండు తింటే సరిపోతుంది. అంతేకానీ, ఎక్కువ తింటే ఆరోగ్యానికి పడదంటున్నారు నిపుణులు.