అందం కోసం ఆరోగ్యాన్ని పణంగా పెడుతున్నారు

ఈ రోజుల్లో పొడవైన, అందమైన గోళ్లు ఉండటం ఒక ఫ్యాషన్‌గా మారింది. మహిళలు మాత్రమే కాదు చాలా మంది మగవారు కూడా గోళ్ల సంరక్షణపై ఆసక్తి చూపిస్తున్నారు. ఆకర్షణీయమైన గోళ్లు చేతుల అందాన్ని రెట్టింపు చేస్తాయి. అయితే, గోళ్లు పెంచితే సరిపోదు. సరైన సంరక్షణ లేకుండా గోళ్లు పెంచడం ఆరోగ్యానికి ప్రమాదకరమని మీకు తెలుసా? అవును చాలా మంది గోళ్లు పెంచేటప్పుడు కొన్ని తప్పులు చేస్తారు. ఆ తప్పులు ఆరోగ్యానికి హానికరం. అందుకే గోళ్లను పెంచే ముందు కచ్చితంగా తెలుసుకోవాల్సిన ఐదు ముఖ్యమైన విషయాలు గురించి ఓ లుక్కేద్దాం.

గోళ్లను శుభ్రం చేసుకోవడం

​పొడవాటి, అందమైన గోళ్లను పెంచేటప్పుడు పెట్టే శ్రద్ధ వాటిని శుభ్రపర్చుకోవడంలో కూడా చూపించాలి. పొడవాటి గోళ్లలో మురికి త్వరగా పేరుకుపోతుంది. దీని వల్ల బ్యాక్టీరియా, ఫంగల్ ఇన్ఫెక్షన్లు వచ్చే ప్రమాదం పెరుగుతుంది. గోళ్లను పెంచే ముందు మీరు వాటిని క్రమం తప్పకుండా శుభ్రపర్చాలి. గోళ్లను ప్రతిరోజూ గోరువెచ్చని నీరు, తేలికపాటి సబ్బుతో శుభ్రం చేసుకోవాలి. పొడి టవల్‌తో గోళ్లను క్లీన్ చేసుకోవాలి.

బలహీనమైన గోళ్లు ప్రమాదకరం

మీ గోళ్లు బలహీనంగా ఉంటే వాటిని పెంచడం మంచిది కాదు. ఒకవేళ బలహీనంగా ఉన్నా పెంచితే అవి సులభంగా విరిగిపోతాయి. దీంతో గాయపడే అవకాశం ఎక్కువగా ఉంటుంది. అంతేకాకుండా గోళ్ల కింద చర్మం చాలా సున్నితంగా ఉంటుంది. గోళ్లు విరిగినప్పుడు అయ్యే గాయం వల్ల చాలా నొప్పి వస్తుంది. మీ బలహీనమైన గోళ్లను బలోపేతం చేయడానికి కొబ్బరి నూనె, బాదం నూనె లేదా విటమిన్ ఇ నూనెతో ప్రతి రోజూ వాటిని మసాజ్ చేయండి. అంతేకాకుండా గోళ్లను ఎక్కువ సేపు నీటిలో నానబెట్టవద్దు. ఎందుకంటే ఎక్కువ సేపు నీటిలో ఉండటం వల్ల గోళ్లు మృదువుగా, పెళుసుగా మారుతాయి.

నెయిల్ పాలిష్ వద్దు

చాలా మంది గోళ్లను అందంగా మార్చడానికి పదే పదే నెయిల్ పాలిష్ వాడుతుంటారు. అయితే, నెయిల్ పాలిష్‌లో ఉండే రసాయనాలు మీ గోళ్లను బలహీనపరుస్తాయి. అంతేకాకుండా నెయిల్ పాలిష్‌లో ఉండే రసాయనాలు నోటి ద్వారా లోపలికి ప్రవేశిస్తే ఆరోగ్యానికి ప్రమాదం. ముఖ్యంగా అసిటోన్ ఆధారిత నెయిల్ పాలిష్ రిమూవర్ గోళ్ల సహత తేమను తీసేస్తుంది. అందుకే సహజమైన, తక్కువ రసాయనాలు కలిగిన నెయిల్ పాలిష్ ఉత్పత్తుల్ని ఉపయోగిస్తే మంచిది.

గోళ్లు కొరికే అలవాటు మానుకోండి

చాలా మంది టెన్షన్, ఒత్తిడి, ఆందోళన కారణంగా గోళ్లు కొరుకుతుంటారు. అయితే, ఈ అలవాటు ఆరోగ్యానికి మంచిది కాదు. ఈ అలవాటు ఉంటే వెంటనే మానేయండి. గోళ్లు కొరకడం వల్ల బ్యాక్టీరియా నోటికి బదిలీ అవుతుంది. ఇది కడుపు సంబంధిత సమస్యలకు కారణమవుతుంది. అంతేకాకుండా గోళ్ల ఆకారం కూడా పాడవుతుంది. అందుకే గోళ్లు కొరికే అలవాటు మంచిది కాదంటారు నిపుణులు.

ఆరోగ్యకరమైన ఆహారం తప్పనిసరి

గోళ్లు ఆరోగ్యంగా, బలంగా ఉండటానికి, సరైన ఆహారం చాలా ముఖ్యం. ఆహారంలో బయోటిన్, ప్రోటీన్, కాల్షియం, ఐరన్ లేకపోతే, గోర్లు బలహీనంగా మారి సులభంగా విరిగిపోతాయి. గోళ్లను సహజంగా బలోపేతం చేయడానికి ఆహారంలో ఆకుపచ్చ కూరగాయలు, గింజలు, గుడ్లు, పాల ఉత్పత్తులను చేర్చుకోండి. వీటిని తినడం వల్ల గోళ్లు బలంగా, ఆరోగ్యంగా మారతాయంటున్నారు నిపుణులు.