ఢిల్లీ సీఎం రేఖా గుప్తా నెల జీతం, అలవెన్సులు ఎంత

ఢిల్లీలో బీజేపీ ప్రభుత్వం కొలువుదీరింది. ముఖ్యమంత్రిగా తొలిసారి ఎమ్మెల్యేగా గెలిచిన రేఖా గుప్తా ఈనెల 20వ తేదీన ఢిల్లీలోని రామ్‌లీలా మైదానంలో ప్రమాణ స్వీకారం చేశారు. ఆమెతోపాటు మరో ఆరుగురు ఎమ్మెల్యేలు కూడా మంత్రులుగా ప్రమాణం చేశారు. ఈ క్రమంలోనే ఢిల్లీ సీఎంగా బాధ్యతలు చేపట్టిన తర్వాత పాలనపై రేఖా గుప్తా దృష్టి సారించారు. ఈ నేపథ్యంలోనే ఢిల్లీ అసెంబ్లీ ఎన్నికల ప్రచారంలో భాగంగా బీజేపీ ఇచ్చిన అన్ని హామీలను నెరవేరుస్తామని రేఖా గుప్తా తేల్చి చెప్పారు. ఈ సందర్భంగా అసలు ఢిల్లీ సీఎంగా ఎన్నికైన రేఖా గుప్తా వేతనం ఎంత. ఆమెకు ఎలాంటి అలవెన్సులు దక్కనున్నాయి అనే చర్చ జరుగుతోంది. అదే సమయంలో ఎమ్మెల్యేగా కూడా ఓటమి పాలైన కేజ్రీవాల్‌ ఎంత పెన్షన్ అందుకోనున్నారు అనేది ఇప్పుడు ఆసక్తికరంగా మారింది.

ఢిల్లీ కొత్త ముఖ్యమంత్రి రేఖా గుప్తా ప్రతి నెలా జీతం కింద రూ.1.70 లక్షలు అందుకోనున్నారు. అయితే 2023 మార్చిలో అప్పటి అరవింద్ కేజ్రీవాల్ నేతృత్వంలోని ప్రభుత్వం.. జారీ చేసిన ఉత్తర్వుల ప్రకారం ఈ జీతాన్ని నిర్ణయించారు. ఇందులో ఢిల్లీ సీఎం బేసిక్ సాలరీ రూ.60 వేలు. ఇక జీతంతోపాటు ఢిల్లీ ముఖ్యమంత్రిగా ఉన్న రేఖా గుప్తాకు పలు భత్యాలు కూడా లభించనున్నాయి. వాటిలో అసెంబ్లీ భత్యం కింద రూ.30 వేలు అందుతాయి. ఇక సెక్రటేరియల్ సహాయం కింద రూ.25 వేలు తీసుకోనున్నారు. టెలిఫోన్ భత్యం కింద రూ.10 వేలు.. ప్రయాణ భత్యం కింద మరో రూ.10 వేలు ఇవ్వనున్నారు. వీటికి అదనంగా రోజుకు రూ.1500 భత్యం కూడా ఢిల్లీ సీఎం అందుకోనున్నారు.

ఇవే కాకుండా ఢిల్లీ ముఖ్యమంత్రికి మరికొన్ని సౌకర్యాలు కూడా ఉంటాయి. ఢిల్లీ సీఎం రేఖా గుప్తాకు ప్రభుత్వం ఏర్పాటు చేసిన కార్ల కాన్వాయ్ ఉంటుంది. ప్రభుత్వ బంగ్లా సహా అనేక సౌకర్యాలు లభిస్తాయి. ఒక వేళ ముఖ్యమంత్రి ప్రైవేట్ కారును ఉపయోగిస్తే.. అందుకోసం ప్రతి నెలా రూ.10 వేలు అందించనున్నారు. అంతేకాకుండా ఢిల్లీ ముఖ్యమంత్రి నివసించే అధికారిక ప్రభుత్వ నివాసానికి ప్రతి నెలా 5 వేల యూనిట్ల ఉచిత విద్యుత్‌ సరఫరా చేస్తారు. వీటన్నింటితోపాటు ముఖ్యమంత్రి తన పదవీకాలంలో రూ.12 లక్షల వరకు లోన్ తీసుకునే అవకాశం ఉంటుంది.

అయితే గతంలో 10 ఏళ్లు ముఖ్యమంత్రిగా, ఎమ్మెల్యేగా ఆమ్ ఆద్మీ పార్టీ నేషనల్ కన్వీనర్ అరవింద్ కేజ్రీవాల్ ఉన్నారు. కానీ ఇటీవల జరిగిన ఢిల్లీ అసెంబ్లీ ఎన్నికల్లో కేజ్రీవాల్.. న్యూఢిల్లీ నియోజకవర్గంలో పర్వేష్ వర్మ చేతిలో పరాజయం పాలయ్యారు. ఈ నేపథ్యంలోనే మాజీ ముఖ్యమంత్రిగా పనిచేసిన అరవింద్ కేజ్రీవాల్‌ నెల నెలా పెన్షన్ అందుకోనున్నారు. అయితే మాజీ ఎమ్మెల్యేల లాగే కేజ్రీవాల్‌కు కూడా రూ.15 వేలు నెలవారీ పెన్షన్ లభిస్తుంది. అయితే ఒకటి కంటే ఎక్కువసార్లు గెలిస్తే.. మరో రూ.1000 అదనంగా రూ.16 వేలు చెల్లించనున్నారు. ఇక కేజ్రీవాల్‌ ఢిల్లీ మాజీ ముఖ్యమంత్రి అయినందున కొన్ని ప్రత్యేక సౌకర్యాలు ఉంటాయి. ప్రభుత్వ వసతి గృహం, ప్రభుత్వ కారు, డ్రైవర్ వంటి సేవలు అందిస్తారు. వీటితోపాటు టెలిఫోన్, ఇంటర్నెట్, ప్రయాణ భత్యం, ఉచిత వైద్య సౌకర్యాలు కూడా లభిస్తాయి.