రాజ్యసభకు అరవింద్ కేజ్రీవాల్.. !

ఢిల్లీ శాసనసభ ఎన్నికల్లో ఆమ్ ఆద్మీ పార్టీ (ఆప్)కి దారుణ ఓటమి ఎదురైంది. ఆ పార్టీ కన్వీనర్ అరవింద్ కేజ్రీవాల్ సైతం తాను పోటీచేసిన న్యూఢిల్లీ నియోజకవర్గంలో ఓడిపోయారు. ఈ క్రమంలో ఆయన పంజాబ్ ముఖ్యమంత్రిగా బాధ్యతలు చేపడతారని, త్వరలోనే జరగబోయే లూధియానా వెస్ట్ ఉప-ఎన్నికల్లో పోటీ చేస్తారని మీడియాలో విస్తృత ప్రచారం జరిగింది. కానీ, అనూహ్యంగా రాజ్యసభ ఎంపీ సంజీవ్ అరోరాను ఉప-ఎన్నికల్లో ఆప్ అభ్యర్ధిగా ప్రకటించారు. దీంతో కేజ్రీవాల్‌ రాజ్యసభకు వెళ్లే యోచనలో ఉన్నారని రాజకీయ వర్గాల్లో గుసగుసలు వినిపిస్తున్నారు. లూధియానా వెస్ట్ ఆప్ ఎమ్మెల్యే గురుప్రీత్ గోగి మరణంతో అక్కడ ఉప-ఎన్నిక అనివార్యమైంది. తుపాకిని శుభ్రం చేస్తుండగా ప్రమాదవశాత్తూ పేలి ఆయన మృతిచెందారు.

ఇక, వ్యాపారవేత్త అయిన సంజీవ్ అరోరాను 2022లో పంజాబ్ నుంచి రాజ్యసభకు నామినేట్ చేశారు. ఆయన పదవీకాలం 2028వరకు ఉన్నా.. ఉప-ఎన్నికల్లో ఆప్ అభ్యర్ధిగా ప్రకటించారు. దీంతో రాజ్యసభ సభ్వత్వానికి ఆయన తప్పనిసరిగా రాజీనామా చేయాలి. ఆ సీటును కేజ్రీవాల్‌కు కేటాయిస్తారని ప్రచారం సాగుతోంది. కానీ, ఈ ప్రచారాన్ని ఆప్ ఇప్పటి వరకూ ఖండించింది. అయితే,. దీనిపై చర్చ జరుగుతోందని తెలుస్తోంది. లూధియానా వెస్ట్ ఉఫ-ఎన్నికలో తనను పోటీకి దింపడానికి ఆప్ అధిష్ఠానం తీసుకున్న నిర్ణయాన్ని స్వాగతిస్తున్నట్టు అరోరా సోషల్ మీడియాలో పోస్ట్ పెట్టారు.

‘‘లూథియానా వెస్ట్ ఉప ఎన్నికల్లో టిక్కెట్ ఇచ్చి నాపై విశ్వాసం ఉంచినందుకు ఆమ్ ఆద్మీ పార్టీ నాయకత్వానికి కృతజ్ఞతలు తెలుపుతున్నాను.. నా స్వస్థలంతో లోతైన సంబంధం ఉన్న వ్యక్తిగా, అంకితభావం, నిజాయితీతో నా ప్రజలకు సేవ చేయడానికి నేను ఎదురు చూస్తున్నాను’’ అని ట్వీట్ చేశారు. ఉప-ఎన్నికల్లో ఆయన గెలిచి ఎమ్మెల్యే అయితే.. కేజ్రీవాల్ కోసం ఎంపీ పదవి వదులుకున్నందుకు మంత్రవర్గంలోకి కూడా తీసుకుంటారని విశ్వసనీయ వర్గాలు అంటున్నాయి.

ఢిల్లీలో అధికారం కోల్పోయిన కేజ్రీవాల్‌కు ప్రస్తుతం పంజాబ్ సురక్షితం. ఎందుకంటే అక్కడ ఆ పార్టీ అధికారంలో ఉంది. గతేడాది సీఎం పదవికి రాజీనామా చేసిన తర్వాత ప్రభుత్వ బంగ్లాను ఖాళీ చేసిన కేజ్రీవాల్.. పంజాబ్‌కు చెందిన ఆప్ ఎంపీ అశోక్ మిట్టల్ ఇంటికి మకాం మార్చారు.