వైట్‌హౌస్‌లో ట్రంప్‌-జెలెన్‌స్కీ ఘర్షణ.. తలపట్టుకున్న ఉక్రెయిన్‌ రాయబారి

తాను అధికారంలోకి వస్తే.. రష్యా-ఉక్రెయిన్ యుద్ధాన్ని ముగిస్తానని చెబుతున్న అమెరికా అధ్యక్షుడు డొనాల్డ్ ట్రంప్.. ఆ దిశగా చేస్తున్న చర్యలు మాత్రం ఫలించేలా కనిపించడం లేదు. తాజాగా అమెరికా అధ్యక్ష భవనం వైట్‌హౌస్‌లో ట్రంప్‌తో భేటీ అయిన ఉక్రెయిన్ అధ్యక్షుడు వొలోదిమిర్ జెలెన్‌స్కీ.. ఎలాంటి ఒప్పందం జరగకుండానే బయటికి వెళ్లిపోవడం గమనార్హం. ఇక వైట్‌హౌస్‌లో మీడియా ముందే ఇరువురు దేశాధినేతలు ఘర్షణకు దిగడం ఇప్పుడు తీవ్ర చర్చనీయాంశంగా మారింది. ట్రంప్‌, జెలెన్‌స్కీ భేటీలో వాడీవేడి చర్చ చోటుచేసుకోవడంతో.. శాంతి చర్చల్లో ఇలా జరిగిందేంటి అన్నట్లు ఉక్రెయిన్‌ రాయబారి ఒక్సానా మార్కరోవా తలపట్టుకుని ఆందోళన చెందుతున్న వీడియో సోషల్ మీడియాలో తెగ వైరల్‌గా మారాయి.

అమెరికా అధ్యక్షుడు డొనాల్డ్‌ ట్రంప్‌.. ఉక్రెయిన్‌ అధ్యక్షుడు జెలెన్‌స్కీ మధ్య నిర్వహించిన శాంతి చర్చల్లో తీవ్ర ఉద్రిక్త పరిస్థితులు నెలకొన్నాయి. దీంతో ఎలాంటి ఒప్పందం లేకుండానే వైట్‌హౌస్‌ నుంచి జెలెన్‌స్కీ వెళ్లిపోయారు. అయితే మొదట వారిద్దరి మధ్య శాంతియుతంగానే సమావేశం ప్రారంభం అయింది. కానీ కొద్దిసేపటికే అది వాగ్వాదానికి దారితీసింది. రష్యాతో యుద్ధంలో ఉక్రెయిన్‌ ప్రవర్తిస్తున్న తీరు.. మూడో ప్రపంచ యుద్ధానికి దారితీయవచ్చని జెలెన్‌స్కీ వైపు చేయి చూపిస్తూ డొనాల్డ్ ట్రంప్‌ తీవ్ర ఆగ్రహంతో చెప్పారు.

దీంతో ఒక్కసారిగా జెలెన్‌స్కీ కూడా తీవ్ర అసహనానికి గురయ్యారు. అప్పుడు రెండు దేశాల రాయబారులు కూడా అక్కడే ఉన్నారు. ట్రంప్‌ చేసిన వ్యాఖ్యలు, జెలెన్‌స్కీ రియాక్షన్‌తో అమెరికాలో ఉక్రెయిన్‌ రాయబారిగా ఉన్న ఒక్సానా మార్కరోవా తీవ్ర ఆందోళనకు గురయ్యారు. శాంతి చర్చల్లో ఇలా జరుగుతుందేంటీ అన్నట్లుగా ఆమె తల పట్టుకున్న ఫోటోలు, వీడియోలు ఇప్పుడు సోషల్ మీడియాలో తెగ వైరల్ అవుతున్నాయి. దీంతో ఉక్రెయిన్-రష్యా యుద్ధానికి ఒక ముగింపు వచ్చింది అనుకునేలోపు ఇలా జరగడంతో మరిన్ని ఆందోళనలు వ్యక్తం అవుతున్నాయి.

అయితే గత 3 ఏళ్లుగా సాగుతున్న రష్యా-ఉక్రెయిన్ యుద్ధానికి తెర దించడానికి నిర్వహించిన శాంతి ఒప్పందంలో భాగంగా.. యుద్ధం ముగింపునకు బదులుగా ఉక్రెయిన్‌లో ఉన్న అరుదైన ఖనిజాలను తవ్వుకునేందుకు అనుమతి ఇవ్వాలని అమెరికా చేసిన ప్రతిపాదనపై చర్చించడానికి జెలెన్‌స్కీ శుక్రవారం వైట్‌హౌస్ చేరుకున్నారు. అయితే భవిష్యత్తులో ఉక్రెయిన్‌పై రష్యా మళ్లీ ఏదైనా దురాక్రమణకు పాల్పడితే తమకు రక్షణ కల్పించాలని అమెరికాపై జెలెన్‌స్కీ ఒత్తిడి తీసుకురావడంతో అది ట్రంప్‌కు తీవ్ర ఆగ్రహం తెప్పించింది. దీంతో ఇద్దరి మధ్య చర్చలు అర్ధంతరంగా ముగిశాయి. ఈ ఘటన తర్వాత మీడియాతో మాట్లాడిన ఉక్రెయిన్‌ అధ్యక్షుడు జెలెన్‌స్కీ.. ఇలాంటి ఘర్షణ ఇరుపక్షాలకు మంచిది కాదని పేర్కొన్నారు.