చనిపోయిన పిల్లితో మహిళ మూడ్రోజుల సావాసం.. ఆపై తాను కూడా

ఉత్తర ప్రదేశ్‌లోని అమ్రోహా జిల్లా హసన్‌పూర్‌లో 32 ఏళ్ల పూజ నివాసం ఉంటోంది. అయితే దాదాపు ఎనిమిదేళ్ల క్రితమే ఆమెకు ఢిల్లీకి చెందిన ఓ వ్యక్తితో వివాహం జరిగింది. కానీ రెండేళ్లు కూడా గడవక ముందే వారిద్దరి మధ్య మనస్పర్థలు వచ్చాయి. దీంతో ఇద్దరూ విడాకులు తీసుకున్నారు. ఆ తర్వాత పూజ పుట్టింటికి వచ్చేసి తల్లి గజ్రా దేవితోనే కలిసి ఉంటోంది. అదే ఇంట్లో ఆమె ఇద్దరు సోదరులు కూడా ఉంటున్నారు. అయితే మూడేళ్లు ఒంటరిగా ఇంట్లోనే ఉన్న పూజకు 3 సంవత్సరాల క్రితం వీధిలో ఓ పిల్లి కనిపించింది.

దాన్ని చూడగానే ఆమెకు చాలా సంతోషంగా అనిపించగా.. దాన్ని ఇంటికి తీసుకు వచ్చింది. ఇక అప్పటి నుంచి ఇంట్లోనే ఉంచుకుని దాన్ని పెంచుకుంటోంది. రోజూ ఆహారం పెట్టడం, స్నానం చేయించడం, ప్రత్యేకంగా బట్టలు కుట్టించి వేయడం వంటివన్నీ చేస్తూ రోజూ దానితోనే గడిపేది. ఇలా 3 సంవత్సరాలుగా పూజ ఆ పిల్లికి బాగా అలవాటు పడిపోయింది. అయితే అనుకోకుండా ఈ పిల్లి ఫిబ్రవరి 27వ తేదీ గురువారం రోజు ప్రాణాలు కోల్పోయింది. దీంతో పూజ షాక్ అయింది. విపరీతంగా ఏడుస్తూనే తనకు ఆ పిల్లి కావాలని గోల చేసింది. అది తనకోసం కచ్చితంగా తిరిగి వస్తుందని చెబుతూ పిచ్చిగా వాదించింది.

ఈక్రమంలోనే పూజ కుటుంబ సభ్యులు పిల్లి చనిపోయినట్లు గుర్తించి.. దాన్ని పాతి పెడదామని సూచించారు. కానీ పూజ మాత్రం అందుకు అస్సలే ఒప్పుకోలేదు. తనకోసం పిల్లి కచ్చితంగా తిరిగి వస్తుందని చెప్పింది. దాన్ని తనతోపాటు అలాగే ఉంచుకుంటానంటూ మొండి పట్టు పట్టింది. ఎంత చెప్పినా ఆమె వినకపోవడంతో కుటుంబ సభ్యులు కూడా వదిలేశారు. ఈక్రమంలోనే పూజ పిల్లి శవాన్ని వెంట పెట్టుకుని మూడు రోజులు గడిపింది. దాన్ని ఎత్తుకునే తిరిగింది. పదే పదే పిలుస్తూ తనకోసం రమ్మని వేడుకుంది.

కానీ పిల్లి ఎంతకూ స్పందించకపోవడంతో అది తిరిగి రాదని అర్థం చేసుకున్న పూజ తాను కూడా చనిపోవాలని నిర్ణయించుకుంది. ఈక్రమంలోనే శనివారం రోజు మధ్యాహ్నం తన ఇంట్లోని మూడో అంతస్తులో ఉన్న తన గదిలోకి వెళ్లి తాళం వేసుకుంది. ఆపై బెడ్డు మీద పిల్లిని పెట్టి ఫ్యానుకు ఉరివేసుకుని ఆత్మహత్య చేసుకుంది. రాత్రి 8 గంటలు అవుతున్నా పూజ తినడానికి కిందకు రాకపోవడంతో కుటుంబ సభ్యులు పైకి వచ్చారు.

ఈక్రమంలోనే తలుపులు వేసినట్లు చూసి పగులగొట్టారు. అప్పటికే పూజ ఫ్యానుకు వేలాడుతూ చనిపోయి ఉండడం చూసి గుండెలవిసేలా రోదించారు. ఆపై పోలీసులకు సమాచారం ఇవ్వగా వారు హుటాహుటిన సంఘటనా స్థలానికి చేరుకున్నారు. కేసు నమోదు చేసుకుని దర్యాప్తు చేపట్టారు.