యజమాని కోసం.. పులితో శునకం వీరోచిత పోరాటం

మధ్య ప్రదేశ్‌లోని ఉమరియా జిల్లా బాంధవ్‌గఢ్ టైగర్ రిజర్వు పార్కు పక్కనే భార్హుల్ అనే ఓ గ్రామం ఉంది. అయితే అదే ఊరుకు చెందిన శివమ్ బద్గయ్య.. జర్మన్ షెఫర్డ్ జాతికి చెందిన ఓ శునకాన్ని తెచ్చుకుని పెంచుకుంటున్నాడు. మొదటి నుంచి ఆ శునకంపై విపరీతమైన ప్రేమ కల్గిన శివమ్ ఎక్కడికి వెళ్లినా దాన్ని వెంట తీసుకు వెళ్లేవాడు. అయితే ఫిబ్రవరి 26వ తేదీ రోజు అర్ధరాత్రి పొలానికి కాపలా వెళ్లాలనుకున్నాడు. రాత్రి భోజనం తర్వాత తన పెంపుడు కుక్కను తీసుకుని పొలానికి వెళ్లాడు.

అయితే ఇదే సమయంలో అక్కడకు ఓ పులి వచ్చింది. శివమ్ బద్గయ్యపై అకస్మాత్తుగా దాడి చేయబోయింది. అయితే విషయం గుర్తించిన శివమ్ పెంపుడు కుక్క.. వెంటనే పులిపై ఎదురు దాడికి దిగింది. పెద్ద పెద్దగా అరవడంతో శివమ్‌కు మెల్కువ వచ్చి చూశాడు. అప్పటికే పులి, తన పెంపుడు శునకం పోరాడుతున్నాయి. రెండింటి మధ్య చాలా సేపు భీకర యుద్ధం జరగ్గా.. శునకానికి తీవ్ర గాయాలు అయ్యాయి. అయినప్పటికీ తన యజమానిని కాపాడుకోవడానికి కుక్క ఎదురుదాడి చేస్తూనే ఉంది.

చాలాసేపు కుక్కతో పోరాడిన పులి దాని మెడను కొరికి.. ఆపై నోట కరుచుకుని వెళ్లిపోయింది. ఇదంతా శివమ్ బద్గయ్య కాస్త దూరంగా నిలబడి చూస్తూనే ఉన్నాడు. పులి వెళ్తున్న వైపే వెళ్లగా.. తీవ్ర గాయాల పాలైన శునకాన్ని ఓ చోట పారేసి వెళ్లిపోయింది పులి. విషయం గుర్తించిన యజమాని శివమ్.. కాసేపు అలాగే ఆగి పులి వెళ్లిపోయిందని నిర్దారించుకున్న తర్వాత శునకం వద్దకు వెళ్లాడు. తీవ్ర గాయాలపాలన కుక్కను తీసుుకుని వైద్యుడి వద్దకు పరుగులు పెట్టాడు. అయితే ధారపాతంగా రక్తం కారుతున్న ఈ శునకాన్ని కాపాడేందుకు పశువైద్యుడు అఖిలేష్ సింగ్ కూడా విపరీతంగా ప్రయత్నించాడు. కానీ అప్పటికే తీవ్ర గాయలు అయి ఎక్కువగా రక్తం పోవడంతో శునకం ప్రాణాలు కోల్పోయింది.

ఘటన జరిగిన ఐదారు రోజుల తర్వాత ఈ విషయం వెలుగులోకి రాగా.. అంతా ఆశ్చర్యపోతున్నారు. యజమానిని కాపాడేందుకు శునకం చేసిన పోరాటాన్ని చూసి ప్రశంసిస్తున్నారు. యజమాని కోసం వీర మరణం పొందిన శనకం.. తన విశ్వాసాన్ని చూపెట్టిందంటూ కామెంట్ల రూపంలో వివరిస్తున్నారు. మరి ఇదంతా చూస్తుంటే మీకేమనిపిస్తుందో కామెంట్ల రూపంలో వెల్లడించండి.