బాడీ షేమింగ్‌పై బీసీసీఐ రియాక్ట్.. దిగజారుడు వ్యాఖ్యలంటూ ఘాటుగా కౌంటర్

టీమిండియా కెప్టెన్ రోహిత్ శర్మ కాంగ్రెస్ పార్టీ నాయకురాలు శమా మహమ్మద్ చేసిన వ్యాఖ్యలు పెద్ద దుమారాన్నే రేపాయి. లావుగా ఉన్నాడని, భారత కెప్టెన్లలో ఆకట్టుకోలేకపోయిన సారథి రోహిత్ శర్మ అంటూ వ్యాఖ్యలు చేసిన విషయం తెలిసిందే. పోస్ట్ చేసిన తర్వాత ఆమెపై వ్యతిరేకత రావడంతో వెంటనే డిలీట్ చేశారు. అయితే శమా మహమ్మద్ వ్యాఖ్యలపై బీసీసీఐ ఘాటుగానే రియాక్ట్ అయింది. ఇలాంటి దిగజారుడు వ్యాఖ్యలు దురదృష్టకరం అంటూ బీసీసీఐ కార్యదర్శి దేవజిత్ సైకియా అన్నారు.

"ఒక బాధ్యతాయుతమైన హోదాలో ఉన్న వ్యక్తి ఇలాంటి దిగజారుడు వ్యాఖ్యలు చేయడం చాలా దురదృష్టకరం. కీలకమైన ఐసీసీ టోర్నీ మధ్యలో ఇలాంటి వ్యాఖ్యలు జట్టుపై చాలా ప్రభావం చూపిస్తాయి. వ్యక్తిగతంగా కానీ జట్టుపరంగా కానీ ఇలాంటివి వాళ్ల మనో స్థైర్యాన్ని దెబ్బతీయొచ్చు. జట్టంతా కలిసి ఎలాంటి ఆట ఆడుతుందో మనకు కనిపిస్తుంది. తమ వ్యక్తిగత ప్రచారం కోసం దయచేసి ఇలాంటి వ్యాఖ్యలు చేయడం మానుకోవాలి" అని సైకియా పీటీఐకి ఇచ్చిన ఇంటర్వ్యూలో చెప్పారు.

ఈ వివాదంపై టీమిండియా మాజీలు రెస్పాండ్ అయ్యారు. మాజీ స్పిన్నర్ దిలిప్ దోషి రోహిత్‌పై వచ్చిన వ్యాఖ్యలపై తీవ్ర అసహనంతో ఉన్నాడు. 'క్రికెట్ ఆడేందుకు రోహిత్ శర్మ ఫిట్‌గా ఉన్నాడా? అంటే అవును అతను ఫిట్‌గా ఉన్నాడు అనే నేను చెప్తాను. ప్రతి ఒక్కరికీ తమ అభిప్రాయాలను చెప్పే అవకాశం ఉంది. కానీ ఇలా కాదు' అని దోషి అన్నారు.

క్రికెటర్‌కు నాజూకైన శరీర ఆకృతి అవసరం లేదని, మంచి ఆటతీరు ఉండాలని.. ఒకవేళ స్లిమ్‌గా ఉండేవాళ్లు కావాలనుకుంటే ఫ్యాషన్ షోలకు వెళ్లాలంటూ లిటిల్ మాస్టర్ సునిల్ గావస్కర్ తనదైన శైలిలో శమాకి కౌంటర్ ఇచ్చారు. "క్రికెట్‌లో బాడీ సైజుతో అవసరం లేదు.. మానసికంగా ఎంత బలంగా ఉన్నామన్నదే ముఖ్యం. ఇక్కడ బ్యాటింగ్ చేయడం ముఖ్యం.. పరుగులు రాబట్టడం కీలకం. ఇక మిగతావన్నీ పక్కనబెట్టాలి. గతంలో కూడా సర్ఫరాజ్ ఖాన్‌పై ఇలాంటి కామెంట్సే వచ్చినప్పుడు నేను చెప్పాను. స్లిమ్‌గా ఉండేవాళ్లు కావాలంటే మోడల్స్‌ను ఎంపిక చేసుకోవాలని. సర్ఫరాజ్ టెస్టుల్లో ఎంట్రీ ఇచ్చిన తర్వాత 150 ప్లస్ స్కోర్‌తో పాటు వరుసగా మూడు హాఫ్ సెంచరీలు చేశాడు" అని సునిల్ గావస్కర్ అన్నారు.

టీమిండియా కెప్టెన్ రోహిత్ శర్మకు మాజీ క్రికెటర్ వెంకటేశ్ ప్రసాద్ మద్దతుగా నిలిచారు. టీమిండియాకు టీ20 వరల్డ్‌కప్ అందించిన కెప్టెన్ రోహిత్ శర్మ.. అలాంటి క్రికెటర్‌పై ఐసీసీ ఛాంపియన్స్ ట్రోఫీ మధ్యలో ఇలాంటి వ్యాఖ్యలు చేయడం కరెక్ట్ కాదని ప్రసాద్ అన్నారు. ఇప్పటివరకు అతను సాధించిన దానికి గౌరవం కూడా ఇవ్వకుండా బాడీ షేమింగ్ చేయడం దారుణమని సోషల్ మీడియాలో పోస్ట్ చేశారు.