టాక్స్‌పేయర్లకు బిగ్ షాక్.. ఇక ఇ-మెయిల్స్, సోషల్ మీడియా అకౌంట్లు కూడా చెక్ చేస్తారు

టాక్స్ పేయర్లకు ఊరట కల్పించేలా.. పన్ను విధానాన్ని మరింత సులభతరం చేస్తూ కేంద్ర ప్రభుత్వం కొత్త ఆదాయపు పన్ను బిల్లు తెచ్చిన సంగతి తెలిసిందే. దశాబ్దాల నాటి ఆదాయపు పన్ను చట్టం స్థానంలో తీసుకొచ్చిన కొత్త బిల్లులో పలు మార్పుల్ని ప్రతిపాదించారు. దీంట్లో 526 సెక్షన్లు, 23 ఛాప్టర్లు, 16 షెడ్యూళ్లు ఉన్నాయి. ఇక ఇప్పటికే దీనిని లోక్‌సభలో కూడా కేంద్రం ప్రవేశపెట్టింది. బిల్లులో చాలా అంశాల్ని సంక్షిప్తంగా అందరికీ అర్థమయ్యేలా తీర్చిదిద్దారు. ఇక ఇది పార్లమెంట్ ఆమోదం పొందాక.. 2026, ఏప్రిల్ 1 నుంచి అమల్లోకి వచ్చే అవకాశాలు ఉన్నాయి. అయితే ఇప్పుడు కొత్త ఆదాయపు పన్ను బిల్లు.. ఆదాయపు పన్ను విభాగం అధికారులకు.. కొత్త అధికారాలు కల్పిస్తోంది.

ఇక మీదట వ్యక్తుల (టాక్స్‌పేయర్లు) సోషల్ మీడియా అకౌంట్లు, ఇ- మెయిల్స్, ఆన్‌లైన్‌లో చేసిన పెట్టుబడులు సహా ట్రేడింగ్ అకౌంట్ల వివరాల్ని కూడా వారు కోరే అవకాశం ఉంది. అంటే పన్ను ఎగవేతకు పాల్పడటం ఇంకా ఆదాయానికి మించి ఆస్తులు లేదా నగదు, బంగారం వంటివి కలిగి ఉన్నట్లు గమనిస్తే.. మీ ఖాతాలన్నింటినీ తనిఖీ చేయొచ్చు. కేంద్రం కొత్తగా తెస్తున్న ఆదాయపు పన్ను బిల్లులో దీనికి సంబంధించిన నిబంధనల్ని పొందుపరిచారు. ఈ నిబంధనలే ఇప్పుడు ఐటీ అధికారులకు కొత్త అధికారాల్ని కట్టబెట్టనున్నాయి.

>> ఇప్పుడు అమల్లో ఉన్న 1961 ఆదాయపు పన్ను చట్టం ప్రకారం.. ఇన్‌కంటాక్స్ అధికారులకు కొన్ని పరిమిత స్థాయిలో మాత్రమే అధికారాలు ఉన్నాయి. ఇక్కడ ఎవరైనా ఆదాయపు పన్ను ఎగవేతకు పాల్పడినట్లు అనిపిస్తే విశ్వసనీయ సమాచారం ఉంటేనే.. సోదాలు వంటివి చేస్తారు. ట్రాన్సాక్షన్లకు సంబంధించి ఏమైనా డాక్యుమెంట్స్, ఆర్థిక వివరాలకు సంబంధించిన పత్రాల్ని దాచిపెట్టినట్లు అనుమానం వచ్చినా.. లాకర్స్, డోర్లు పగులకొట్టే అధికారం ఐటీ అధికారులకు ఉంటుంది.

కానీ ఇప్పుడు కొత్త ఆదాయపు పన్ను బిల్లులో కొత్త అధికారాలు చేర్చారు. ఇక మీదట వ్యక్తులకు సంబంధించి.. డిజిటల్ సిస్టమ్ లేదా కంప్యూటర్ సిస్టంలోకి చొచ్చుకెళ్లే అధికారం కూడా కల్పించింది. అంటే ప్రస్తుత కాలానికి తగ్గట్లుగా ఈ నిబంధనలు రూపొందించారు. ఇక్కడ పన్ను ఎగవేతకు సంబంధించిన ఏమైనా సమాచారం ఉన్నట్లయితే అధికారులు.. సంబంధిత వ్యక్తి మెయిల్స్, బ్యాంక్ అకౌంట్లు, ట్రేడింగ్ అకౌంట్లు, సోషల్ మీడియా కార్యకలాపాలపైనా ఆరా తీయొచ్చు