కుప్పకూలుతున్న టాటా స్టాక్.. 7 నెలల్లోనే 47 శాతం పతనం

దిగ్గజ టాటా గ్రూప్‌కు చెందిన టాటా మోటార్స్ స్టాక్ కొంత కాలంగా భారీగా పతనం అవుతోంది. 2024 జులై నెలలో రూ. 1179 వద్ద ఆల్ టైమ్ గరిష్ట స్థాయికి చేరగా.. అక్కడి నుంచి దిగొస్తుంది. ఇప్పుడు 2025, మార్చి 3 నాటికి అది రూ. 621.10 కి పడిపోయింది. అంటే గత 7 నెలల నుంచి ఈ స్టాక్ పడుతూనే ఉందన్నమాట. ఈ క్రమంలోనే మార్కెట్ విలువ కూడా రికార్డు స్థాయిలో రూ. 2 లక్షల కోట్లకుపైగా పతనమైంది. ప్రధానంగా డిమాండ్ మందగించడమే ఈ స్టాక్ నష్టానికి కారణమని తెలుస్తోంది. ముఖ్యంగా జాగ్వా్ర్ ల్యాండ్ రోవర్ (JLR) డిమాండ్ అవుట్‌లుక్ మెరుగ్గా లేకపోవడం సహా డొమెస్టిక్ ప్యాసింజర్ వెహికిల్ (PV) సెగ్మెంట్లో కూడా ఆర్థిక అనిశ్చితి నేపథ్యంలో సవాళ్లను ఎదుర్కొంటోంది.

2023 సంవత్సరంలో చూసినట్లయితే టాప్ పెర్ఫామింగ్ స్టాక్స్‌లో టాటా మోటార్స్ ఒకటి. తన విలువను రెట్టింపు చేసుకోవడం సహా నిఫ్టీ 50 ఇండెక్స్‌లో ముందు వరుసలో నిలిచింది. అయితే ఆ తర్వాతి నుంచి పరిస్థితి తలకిందులైంది. ఇప్పుడు ఫిబ్రవరి నెలతో కలిపి వరుసగా ఏడో నెల కూడా పతనం కావడం గమనార్హం. ఒక్క ఫిబ్రవరి నెలలోనే ఈ స్టాక్ 13 శాతానికిపైగా పతనం కాగా.. 2024 అక్టోబర్ తర్వాత ఇదే అత్యధికం. ఆ సమయంలో 14.4 శాతం తగ్గింది.

2015 సంవత్సరం తర్వాత టాటా మోటార్స్ స్టాక్.. ఇలా వరుసగా ఏడో నెల పడిపోవడం ఇదే తొలిసారి. అప్పట్లో ఈ స్టాక్ పుంజుకునే ముందు ఇలాగే పడిపోయింది. మళ్లీ ఇన్నాళ్లకు అదే పునరావృతమైంది. ఇంకా గత ఏడాది వ్యవధిలో కూడా చూస్తే ఈ స్టాక్ 37 శాతం తగ్గింది. మార్చి 3 సెషన్లోనే ఈ స్టాక్ రూ. 606.20 వద్ద 52 వారాల కనిష్ట ధరను నమోదు చేసింది. ఇక 52 వారాల గరిష్ట ధర రూ. 1179 వద్ద ఉంది. అయితే లాంగ్ రన్‌లో మాత్రం కాస్త మెరుగైన ఫలితాల్నే అందించింది. గత ఐదేళ్ల కాలంలో ఇది 390 శాతానికిపైగా పెరిగింది.

కొంత కాలంగా త్రైమాసిక ఫలితాల్లోనూ ప్రదర్శన అంతంతమాత్రంగానే ఉంది. ఫిబ్రవరి నెలలో కంపెనీ దేశీయ విక్రయాలు 9 శాతం పడిపోయి 46,435 యూనిట్లుగానే నమోదయ్యాయి. అంతకుముందు ఏడాది ఇదే సమయంలో మాత్రం ఈ సంఖ్య 51,267 యూనిట్లుగా ఉంది. ఇంకా ఎలక్ట్రిక్ వెహికిల్ సెగ్మెంట్లో 23 శాతం పడిపోవడం గమనార్హం. ఇంకా ప్రస్తుత ఆర్థిక సంవత్సరం మూడో త్రైమాసికంలో కంపెనీ నికర లాభం 22 శాతం పడిపోయి రూ. 5451 కోట్లుగా నమోదైంది. ఆదాయం మాత్రం 3 శాతం పెరిగి రూ. 1.13 లక్షల కోట్లకు చేరింది.