ముఖ్యమంత్రి హోలీ కానుక.. ఒకే రోజు 66 వేల మందికి ప్రభుత్వ ఉద్యోగాలు

నిరుద్యోగులకు హోలీ కానుక అందజేయడానికి బిహార్ ముఖ్యమంత్రి నితీశ్ కుమార్ సిద్దమయ్యారు. ఒకే రోజు 66 వేల మందికి ప్రభుత్వ ఉపాధ్యాయ నియామక పత్రాలను అందజేయనున్నారు. ప్రాథమిక, ప్రాథమికోన్నత, ఉన్నత పాఠశాలల్లో ఉపాధ్యాయ ఉద్యోగాల భర్తీకి సంబంధించి పరీక్ష ఫలితాలను వెల్లడించి.. అభ్యర్థులకు సర్టిఫికెట్ల పరిశీలన పూర్తిచేశారు. మార్చి 9న పట్నాలోని గాంధీ మైదానంలో సీఎం చేతులు మీదుగా నియమాక పత్రాలను అందుకోనున్నారు. పాట్నా సహా 8 జిల్లాల నుంచి దాదాపు 10,000 మంది అభ్యర్థులు గాంధీ మైదానంలో హాజరుకానున్నారు. మిగిలిన జిల్లాల్లో మంత్రులు, ఉన్నతాధికారులు నియామక పత్రాలను అందజేయనున్నారు

మార్చి 9న ఉదయం 11 గంటలకు గాంధీ మైదానంలో ఉపాధ్యాయ నియామక పత్రాలను సీఎం అందజేయనున్నట్టు అధికారులు తెలిపారు. సీఎం అలాగే, మిగతా అన్ని జిల్లాల్లో నియామక పత్రాలు అందజేయడానికి సన్నాహాలు చేయాలని ప్రభుత్వం కోరింది. పట్నా గాంధీ మైదానంలో కార్యక్రమానికి పట్నా, వైశాలి, ముజఫర్‌పూర్, సరన్, భోజ్‌పూర్, అర్వాల్, జెహానాబాద్, నలంద జిల్లాల అభ్యర్థులు హాజరవుతారు. మిగిలిన 30 జిల్లాల్లో మంత్రులు, ఉన్నతాధికారులు అపాయింట్‌మెంట్ లెటర్స్ అందజేస్తారు.

బిహార్ పబ్లిక్ సర్వీస్ కమిషన్ టీచర్ రిక్రూట్‌మెంట్ ఎగ్జామ్ 3.0 ప్రక్రియలో ఎంపికైన ఉపాధ్యాయులకు నియామక పత్రాలను అందజేస్తారు. ఉద్యోగాల్లో చేరిన కొత్త ఉపాధ్యాయులకు ముందుగా శిక్షణ ఇచ్చి.. అనంతరం పాఠశాలల్లో బోధనకు అనుమతిస్తారు. మొత్తం 66,000 పోస్టుల్లో 21,195 సెకెండరీ, 16,989 ప్రాథమికోన్నత, 15,250 మాధ్యమిక, 12,195 ఉన్నత మాధ్యమిక ఉపాధ్యాయ ఖాళీలు ఉన్నాయి. గతేడాది జులై 19 నుంచి 22 వరకు పరీక్షలను నిర్వహించినా పేపర్ లీక్ కారణంగా రద్దు చేయాల్సి వచ్చింది. తరువాత పకడ్బందీగా పరీక్ష నిర్వహించి ఫలితాలను నవంబర్ 2024లో వెల్లడించారు. ఎంపికైన వారికి కౌన్సెలింగ్ పూర్తిచేయగా.. నియమాకపత్రాల కోసం ఎదురుచూస్తున్నారు. ఈ క్రమంలో మార్చి 9న వారికి నియమాకపత్రాలను అందజేయడానికి ముహూర్తం నిర్ణయించారు. కాగా, ఈ ఏడాది నవంబరు డిసెంబరులో బిహార్‌ శాసనసభకు ఎన్నికల జరగనున్నాయి. దీంతో పెద్ద సంఖ్యలో ప్రభుత్వ ఉద్యోగాలను నితీశ్ కుమార్ భర్తీ చేస్తున్నారు. నిరుద్యోగులను ప్రసన్నం చేసుకునే ప్రయత్నాలు చేస్తున్నారు.