వాచ్‌మెన్‌పై దాడికి వీధి కుక్కల యత్నం.. అడ్డుకోవాల్సింది పోయి అతడినే కొట్టి

మన కళ్లముందు ఎవరిపైనైనా వీధి కుక్కలు దాడి చేయబోతుంటే వీలయినంత వరకు మనం వాళ్లకు సాయం చేస్తాం. అవి ఎక్కువగా ఉండి.. మరీ దారుణంగా ప్రవర్తిస్తే భయంతో అరుస్తూ అందరినీ పిలవడమో, మనమే దాక్కోవడమో కూడా చేస్తుంటాం. కానీ ఈ రెండింటికి బదులుగా ఓ వ్యక్తి మరో పని చేశాడు. సభ్య సమాజం తలదించుకునేలా.. ఓ వాచ్‌మెన్‌పై వీధి కుక్కలు దాడి చేస్తుంటే వాటి నుంచి తప్పించుకోవడానికి ప్రయత్నిస్తున్న అతిడిపైనే దాడికి పాల్పడ్డాడు. ఇష్టం వచ్చినట్లుగా కొడుతూ.. శునకాలను ఏమీ అనొద్దని చెప్పాడు. ప్రస్తుతం ఇందుకు సంబంధించిన వీడియో నెట్టింట వైరల్ అవుతోంది. ఆ పూర్తి వివరాలు మీకోసం.

మహారాష్ట్ర ముంబయిలోని అంధేరికి చెందిన ఓ అపార్ట్‌మెంట్ కింద.. వాచ్‌మెన్‌ నిలబడి ఉన్నాడు. తన పనులు చేసుకుంటూ అపార్ట్‌మెంట్ లోపలికి వచ్చిపోయే వాళ్లను చూస్తున్నాడు. అయితే అదే సమయంలో అక్కడకు కొన్ని వీధి కుక్కలు వచ్చాయి. చూస్తుండగానే ఒక్కొక్కటి అతని చుట్టూ చేరాయి. దీంతో భయపడిపోయిన అతడు వాటిని అదిలించే ప్రయత్నం చేశాడు. కానీ అవి మాత్రం బెదిరి అక్కడి నుంచి వెళ్లిపోకుండా.. వాచ్‌మెన్‌పై దాడికి యత్నించాయి.

దీంతో తనను తాను రక్షించుకునేందుకు తన చేతిలో ఉన్న కర్రతోనే కుక్కలను కొట్టబోయాడు. ఆ సమయంలో మరో వ్యక్తి పక్కనే ఉండగా.. వాచ్‌మెన్‌కు సాయం చేయాల్సిందిపోయి అతడిపైనే కోప్పడ్డాడు. కుక్కలను ఎందుకు కొడుతున్నావంటూ కాపలాదారుడిపై దాడి చేశాడు. ఓవైపు ఇతడి దాడి, మరోవైపు కుక్కలు పైకి వస్తుండడంతో.. ఏం చేయాలో పాలుపోక వాచ్‌మెన్‌ నరకం చూశాడు.

అయితే విషయం గుర్తించిన మరికొందరు వ్యక్తులు అక్కడకు వచ్చి కుక్కలను వెళ్లగొట్టే ప్రయత్నం చేశారు. కానీ కాలపాదారుడిపై దాడికి పాల్పడుతున్న వ్యక్తిని మాత్రం ఆపలేదు. ఇదంతా అక్కడే ఉన్న సీసీటీవీ కెమెరాల్లో రికార్డు కాగా.. ఈ వీడియో సోషల్ మీడియాలో వైరల్ అయింది. ఇది చూసిన ప్రతీ ఒక్కరూ మానవత్వం మంటగలిసిందంటూ కామెంట్లు చేస్తున్నారు. కుక్కలపై ఉన్న ప్రేమ మనుషులపై లేని ఆ వ్యక్తిపై కఠిన చర్యలు తీసుకోవాలంటూ.. పోలీసులను ట్యాగ్ చేస్తున్నారు.

అయితే ఈ వీడియో చూసిన ముంబయి పోలీసులు సైతం దీనిపై స్పందించారు. దగ్గర్లోని పోలీస్ స్టేషన్‌లో ఈ ఘటనపై కేసు నమోదు చేయాలని బాధిత వాచ్‌మెన్‌కు సూచించారు. నిందితుడిపై కఠిన చర్యలు తీసుకుంటారని చెప్పారు. మీరు కూడా ఓసారి ఈ వీడియో చూసి ఏమనిపిస్తుందో కామెంట్లు రూపంలో వెల్లడించేయండి.