బంగారం స్మగ్లింగ్ కేసు.. నటి రన్యా రావు తొలి స్టేట్‌మెంట్‌లో సంచలన విషయాలు

బంగారం స్మగ్గింగ్ చేస్తూ ఇటీవల బెంగళూరు అంతర్జాతీయ విమానాశ్రయంలో కన్నడ నటి రన్యా రావు అడ్డంగా దొరికిన విషయం తెలిసిందే. డైరెక్టరేట్ ఆఫ్ రెవెన్యూ ఇంటెలిజెన్స్ అధికారుల కస్టడీలో ఉన్న ఆమె తాను 17 బంగారు కడ్డీలను అక్రమంగా తీసుకొచ్చినట్టు అంగీకరించింది. అంతేకాదు, దుబాయ్, మధ్య ఆసియా, పశ్చిమ దేశాలు సహా తన అంతర్జాతీయ పర్యటన వివరాలను కూడా ఆమె వెల్లడించింది. ‘నేను ఐరోపా, అమెరికా, మధ్య ఆసియా దేశాలతో పాటు దుబాయ్, సౌదీ అరేబియా పర్యటనలకు వెళ్లా... నాకు తగినంత విశ్రాంతి లేకపోవడంతో ప్రస్తుతం అలసిపోయిన పరిస్థితిలో ఉన్నాను’ అని రన్యా రావు ఇచ్చిన స్టేట్‌మెంట్ మీడియాకు లీకయ్యింది. ఏడాది కాలంలో ఆమె మొత్తం 27 సార్లు దుబాయ్‌కు వెళ్లొచ్చినట్టు గుర్తించారు.

డీఆర్ఐ అధికారులకు ఇచ్చిన స్టేట్‌మెంట్‌లో తన కుటుంబ వివరాలను కూడా నటి వెల్లడించారు. తన తండ్రి కేఎస్ హెగ్డేష్ రియల్ ఎస్టేట్ వ్యాపారి అని, తన భర్త పేరు జతిన్ హుక్కేరి అని.. ఆయన ఆర్కిటెక్చర్ అని తెలిపింది. కర్ణాటక రాష్ట్ర పోలీస్ హౌసింగ్ కార్పొరేషన్ డీజీపీ, సీనియర్ ఐపీఎస్ రామచంద్రరావు ఆమెకు సవతి తండ్రి. రన్యా రావు తల్లి అతడికి రెండో భార్య. మొదటి భర్త హెగ్డేష్ ద్వారా పుట్టిన ఇద్దరు కుమార్తెలలో రన్యా ఒకరు. 2014లో కిచ్చా సుదీప్ హీరోగా నటించిన కన్నడ సినిమా మానిక్య ద్వారా వెండితెరకు రన్యా రావు పరిచయమైంది.

ప్రస్తుతం జ్యుడీషియల్ కస్టడీలో ఉన్న ఆమె.. విచారణకు సహకరిస్తానని తెలిపింది. అయితే, దర్యాప్తు పారదర్శకంగా సాగాలని కోరుతోంది. తాను స్వచ్ఛందంగానే స్టేట్‌మెంట్ ఇచ్చానని, ఇందులో ఎవరి వత్తిడి లేదని స్పష్టం చేసింది. బెంగళూరు కెంపెగౌడ అంతర్జాతీయ విమానాశ్రయంలో సోమవారం రాత్రి రన్యా రావు 14.56 కిలోల బంగారంతో పట్టుబడిన విషయం తెలిసింది. ఇటీవల కాలంలో భారీగా పట్టుబడిన అక్రమ బంగారం కేసుల్లో ఇదీ ఒకటి. 15 రోజుల్లోనే నాలుగుసార్లు దుబాయ్ పర్యటనకు వెళ్లడంతో అనుమానించిన అధికారులు.. ఆమె కదలికలపై నిఘా పెట్టారు.