బేరమాడి మరీ.. నారా భువనేశ్వరికి చీర కొన్న చంద్రబాబు

ఆంధ్రప్రదేశ్ ముఖ్యమంత్రి నారా చంద్రబాబు నాయుడు తన సతీమణి నారా భువనేశ్వరి కోసం చీర కొనుగోలు చేశారు. సీఎం చంద్రబాబు నాయుడు ప్రకాశం జిల్లా మార్కాపురంలో పర్యటిస్తున్న సంగతి తెలిసిందే. మార్కాపురంలో నిర్వహించిన అంతర్జాతీయ మహిళా దినోత్సవం కార్యక్రమంలో చంద్రబాబు పాల్గొన్నారు. ఈ సందర్భంగా స్వయం సహాయక సంఘాల మహిళలు ఏర్పాటు చేసిన స్టాళ్లను చంద్రబాబు పరిశీలించారు. ఈ క్రమంలోనే ఓ స్టాల్ వద్దకు వెళ్లిన చంద్రబాబు.. స్టాల్‌లోని చీరలను పరిశీలించారు. అనంతరం సతీమణి భువనేశ్వరికి అంతర్జాతీయ మహిళా దినోత్సవం సందర్భంగా బహుమతిగా ఇవ్వడానికి ఓ చీరను కొనుగోలు చేశారు. ఈ సందర్భంగా స్టాల్‌లోని మహిళ.. చంద్రబాబు మధ్య ఆసక్తికర సంభాషణ జరిగింది.

చీరలు ఉన్న ఓ స్టాల్ వద్దకు వెళ్లిన చంద్రబాబు. .అక్కడ ఉన్న పలు చీరలను పరిశీలించారు. స్టాల్ లోని మహిళ సీఎం చంద్రబాబుకు ఉప్పాడ పట్టు, పొందూరు, మంగళగిరి పట్టు చీరలను చూపించారు. అలాగే ఆ చీరల విశేషాన్ని వివరించారు. అక్కడ ఉన్న చీరలలో నుంచి సతీమణి నారా భువనేశ్వరి కోసం చంద్రబాబు ఓ చీరను ఎంపిక చేశారు. దాని రేటు ఎంత అంటూ స్టాల్‌లోని మహిళను అడిగారు. ఆమె రూ. 26,400 అంటూ సమాధానం ఇవ్వగా.. చంద్రబాబు ఒకింత ఆశ్చర్యపడ్డారు. పక్కనే ఉన్న సిబ్బందికి రూ.25000 ఇవ్వాలంటూ చెప్పి.. ఆ మహిళ వ్యాపారం చేస్తున్న తీరును చంద్రబాబు అభినందించారు. వ్యాపారం బాగా చేస్తున్నావంటూ ప్రోత్సహించారు.

మరోవైపు మహిళా దినోత్సవం సందర్భంగా మార్కాపురం వేదికగా మహిళల కోసం వివిధ కార్యక్రమాలను చంద్రబాబు ప్రారంభించారు. స్వయం సహాయక బృందాలకు సెర్ప్ ద్వారా రూ.1826.43 కోట్ల బ్యాంకు లింకేజి రుణాలు పంపిణీ చేశారు. అలాగే స్త్రీనిధి ద్వారా లక్ష మంది మహిళలకు తక్కువ వడ్డీకి రూ.1,000 కోట్ల రుణాల పంపిణీ కార్యక్రమం ప్రారంభించారు. అలాగే చేనేత మహిళలకు ఉచితంగా నూలు పంపిణీ కార్యక్రమం ప్రారంభించారు. అలాగే 1.50 లక్షల మంది మహిళలకు ఉచితంగా కుట్టుమిషన్లు పంపిణీ కార్యక్రమాన్ని ప్రారంభించారు. ఆంధ్రప్రదేశ్ మహిళలకు ఉపాధి అవకాశాలు, శిక్షణ ఇచ్చేలా హోం ట్రైయాంగిల్, ఆశా ఫౌండేషన్, ర్యాపిడో, ఫ్లిప్ కార్ట్, నేచర్ అరకు కాఫీ సహా వివిధ సంస్థలతో ఒప్పందం చేసుకున్నారు. ఆయా కంపెనీల ప్రతినిధులతో నిర్వహించిన కార్యక్రమంలో చంద్రబాబు పాల్గొన్నారు.