హెచ్ 1బీ వీసాల కోసం చూస్తున్నవారికి గుడ్‌న్యూస్.. రిజిస్ట్రేషన్స్ ప్రారంభం, 15 రోజులే ఛాన్స్

ప్రపంచ దేశాల్లో నైపుణ్యం కలిగి ఉన్న నిపుణులను అమెరికాకు స్వాగతం పలికేందుకు అగ్రరాజ్యం ప్రతీ సంవత్సరం హెచ్ 1బీ వీసాలు జారీ చేస్తూ ఉంటుంది. ఈ నేపథ్యంలోనే 2026 ఏడాదికి సంబంధించి హెచ్ 1బీ వీసా కోసం దరఖాస్తు చేసుకోవాలని అమెరికా పౌరసత్వం, ఇమ్మిగ్రేషన్ సర్వీసెస్-యూఎస్‌సీఐఎస్ తాజాగా రిజిస్ట్రేషన్లు ఓపెన్ చేసింది. హెచ్ 1బీ వీసా రిజిస్ట్రేషన్ ప్రక్రియ మార్చి 7వ తేదీన (శుక్రవారం) ప్రారంభం అయింది. ఈ రిజిస్ట్రేషన్ ప్రక్రియ మార్చి 22వ తేదీ వరకు కొనసాగుతుందని యూఎస్‌సీఐఎస్ వెల్లడించింది. హెచ్ 1బీ వీసాలకు భారీగా డిమాండ్ ఉన్న నేపథ్యంలో వాటి కోసం దరఖాస్తు చేసుకునేవారు.. వారి స్పాన్సర్ యజమానుల ప్రక్రియ సజావుగా కొనసాగేందుకు ముందుగానే సిద్ధంగా ఉండాలని యూఎస్‌సీఐఎస్ సూచించింది.

హెచ్ 1బీ వీసా దరఖాస్తు కోసం ప్రతీ రిజిస్ట్రేషన్‌కు 215 డాలర్లు అంటే మన భారత కరెన్సీలో రూ.18,695.35 ఫీజు చెల్లించాల్సి ఉంటుంది. దరఖాస్తులను స్వీకరించిన తర్వాత వారిలో నుంచి అర్హులను ఎంపిక చేసేందుకు యూఎస్‌సీఐఎస్ లాటరీ పద్దతిని ఉపయోగిస్తుంటుంది. ఈ లాటరీ ఫలితాలను మార్చి 31వ తేదీన ప్రకటించనుంది. ఇక ఆ లాటరీలో ఎంపికైన వారు.. ఏప్రిల్ 1వ తేదీ నుంచి యూఎస్‌సీఐఎస్ వెబ్‌సైట్‌లో హెచ్ 1బీ అప్లికేషన్లను దాఖలు చేసుకునే అవకాశం ఉంటుందని తెలిపింది.

ఇక ఆయా ఉద్యోగులను తీసుకునే కంపెనీలు.. వారు హెచ్ 1బీ వీసాలు పొందేందుకు అవసరమైన అర్హతలు ఉన్నాయని నిరూపించడానికి అవసరమైన పత్రాలను సమర్పించాల్సి ఉంటుంది. ఆ తర్వాత హెచ్ 1 బీ వీసాలు పొందిన వారు.. ఈ ఏడాది అక్టోబర్ 1వ తేదీ నుంచి అమెరికాలో పనిచేసే అవకాశం ఉంటుంది. అయితే ఒక దరఖాస్తుదారుని పేరుతో అతడికి ఉద్యోగం ఇచ్చే కంపెనీ.. ఒకటి కంటే ఎక్కువ రిజిస్ట్రేషన్లు చేస్తే వాటిని యూఎస్‌సీఐఎస్ నిశితంగా పరిశీలిస్తుంది. ఇక గడువు ముగిసే సమయంలో కాకుండా దరఖాస్తులను మార్చి 22వ తేదీ కంటే ముందే రిజిస్ట్రేషన్ చేసుకోవాలని యూఎస్‌సీఐఎస్ అధికారులు సూచిస్తున్నారు.

హెచ్ 1బీ వీసా అనేది వలసేతర వీసా. ప్రపంచ దేశాలకు చెందిన టెక్నికల్ నైపుణ్యాలు ఉన్న ఉద్యోగులను తమ కంపెనీల్లో నియమించుకోవడానికి అమెరికా సంస్థలకు ఈ హెచ్ 1 బీ వీసా ద్వారా అనుమతి ఉంటుంది. ఈ హెచ్ 1బీ వీసాలు ముఖ్యంగా ఇన్ఫర్మేషన్ టెక్నాలజీ, ఇంజనీరింగ్, హెల్త్‌కేర్, ఫైనాన్స్, రీసెర్చ్ వంటి రంగాల్లో నైపుణ్యం కలిగిన వారి కోసం ఆయా కంపెనీలు దరఖాస్తు చేస్తూ ఉంటాయి. ఈ హెచ్ 1బీ వీసాల కోసం ఏటా వేలాది మంది దరఖాస్తులు చేసుకుంటారు. కానీ ప్రస్తుతం ఈ హెచ్ 1బీ వీసాల కోసం 85 వేల మంది పోటీ పడుతుండగా.. వారిలో సాధారణ పరిమితి కింద 65 వేల మంది ఉండగా, అమెరికా మాస్టర్స్ డిగ్రీ, అంతకంటే ఎక్కువ ఉన్న దరఖాస్తుదారులు 20 వేల మంది ఉన్నారు.