ఏకంగా 9.50 శాతం వడ్డీ.. అన్నింటికంటే ఈ బ్యాంకులోనే ఎక్కువ.. 1001 రోజుల్లో 5 లక్షలపై ఎంతొస్తుంది?

ఈ ఏడాది ఫిబ్రవరి నెలలో కేంద్ర బ్యాంక్ అయిన రిజర్వ్ బ్యాంక్ ఆఫ్ ఇండియా (RBI) కీలక రెపో రేట్లను తగ్గించిన సంగతి తెలిసిందే. దాదాపు ఐదేళ్ల తర్వాత ఈ వడ్డీ రేట్లు తగ్గించింది. దాదాపు రెండేళ్లుగా స్థిరంగా ఉండగా.. ఎట్టకేలకు 25 బేసిస్ పాయింట్లు తగ్గించడంతో అది 6.50 శాతం నుంచి 6.25 శాతానికి దిగొచ్చింది. అయితే.. ఆర్బీఐ రెపో రేట్లను తగ్గించడంతో.. బ్యాంకులు లోన్ వడ్డీ రేట్లు తగ్గించాల్సి ఉంటుంది. ఇదే సమయంలో ఫిక్స్‌డ్ డిపాజిట్లపైనా వడ్డీ రేట్లు తగ్గించే అవకాశం ఉంటుంది. ఇప్పటికే చాలా బ్యాంకులు.. ఆయా లోన్ వడ్డీ రేట్లు తగ్గిస్తూ.. ఎఫ్‌డీ రేట్లను తగ్గిస్తూ వస్తున్నాయి. అందుకే.. ఇప్పటికీ ఆకర్షణీయ స్థాయిలోనే డిపాజిట్ వడ్డీ రేట్లు ఉన్నందున తగ్గించకముందే డిపాజిట్లు చేసుకోవాలని చాలా మంది చెబుతున్నారు.

చాలా వరకు ప్రభుత్వ రంగ బ్యాంకుల కంటే ప్రైవేట్ బ్యాంకులు.. ప్రైవేట్ బ్యాంకుల కంటే స్మాల్ ఫైనాన్స్ బ్యాంకులు.. ఫిక్స్‌డ్ డిపాజిట్లపై అధిక వడ్డీ రేట్లు ఆఫర్ చేస్తుంటాయి. ఇప్పటికీ కొన్ని ప్రత్యేక టెన్యూర్లపై స్మాల్ ఫైనాన్స్ బ్యాంకులు 9 శాతం వరకు వడ్డీ ఆఫర్ చేస్తున్నాయి. ఇదే సమయంలో సీనియర్ సిటిజెన్లకు అదనంగా 50 బేసిస్ పాయింట్ల మేర అంటే గరిష్టంగా 9.50 శాతం వరకు వడ్డీ అందించే బ్యాంకులు ఉన్నాయి. వీటి గురించి తెలుసుకోవాల్సిన అవసరం ఉంది.

యూనిటీ స్మాల్ ఫైనాన్స్ బ్యాంకులో 1001 రోజుల ప్రత్యేక టెన్యూర్ డిపాజిట్‌పై సాధారణ ప్రజలకు అత్యధికంగా 9 శాతం వడ్డీ రేటు ఉంది. ఇదే సమయంలో సీనియర్ సిటిజెన్లకు చూస్తే ఇక్కడ అత్యధికంగా 9.50 శాతం వడ్డీ రేటు ఉంది. స్మాల్ ఫైనాన్స్ బ్యాంకుల్లో ఇదే ఎక్కువ కావడం విశేషం. ఇక రూ. 5 లక్షలు ఇక్కడ జమ చేస్తే.. 1001 రోజుల్లో సాధారణ ప్రజలకు 9 శాతం వడ్డీ రేటు లెక్కన రూ. 1,24,033 వడ్డీ వస్తుంది. ఇదే సమయంలో 9.50 శాతం వడ్డీ రేటు చొప్పున సీనియర్ సిటిజెన్లకు రూ. 1,30,912 వడ్డీ అందుతుంది.

నార్త్ ఈస్ట్ స్మాల్ ఫైనాన్స్ బ్యాంకులో 18 నెలల ఒక రోజు నుంచి 36 నెలల వ్యవధి డిపాజిట్లపై సాధారణ ప్రజలకు అత్యధికంగా 9 శాతం అందుతుంది. ఇక్కడ సీనియర్ సిటిజెన్లకు కూడా ఇదే స్థాయిలో వడ్డీ రేట్లు ఉన్నాయి. సూర్యోదయ్ స్మాల్ ఫైనాన్స్ బ్యాంకులో ఐదేళ్ల ఎఫ్‌డీపై 8.60 శాతం వడ్డీ రేటు ఉంది. ఉత్కర్ష్ స్మాల్ ఫైనాన్స్ బ్యాంకులో 2-3 ఏళ్ల డిపాజిట్‌పై, 1500 రోజుల డిపాజిట్‌పై 8.50 శాతం వడ్డీ రేటు ఉంది.